ஆசிரியர், தலைமுடியை வெட்டிவிட்டு பள்ளிக்கு வரச் சொன்னதால், மாணவன் பூச்சி மருந்து குடித்து தற்கொலைக்கு முயன்ற சம்பவம் விருத்தாச்சலத்தில் அரங்கேறியுள்ளது.
கடலூர் மாவட்டம் விருத்தாச்சலம் அடுத்த முகாசபரூர் கிராமத்தைச் சேர்ந்த ஜெயக்குமார் என்ற மாணவன், அப்பகுதியில் உள்ள அரசு மேல்நிலைப் பள்ளியில் படித்து வருகிறார். வழக்கமாக பள்ளிக்கு வந்த மாணவனை அழைத்த தலைமை ஆசிரியர் மரியா ஜோசப் ராஜா, தலையில் முடி அதிகமாக இருப்பதால், அதனை வெட்டி விட்டு பள்ளிக்கு வருமாறு அறிவுரை கூறியதாக தெரிகிறது. அதற்கு அந்த மாணவன் மறுப்பு தெரிவிக்கவே, பெற்றோரை அழைத்து வருமாறு தலைமை ஆசிரியர் கூறியுள்ளார்.
இதனால், மனவேதனை அடைந்த மாணவன், பள்ளியில் இருந்து வெளியேறி, நேராக கடைக்குச் சென்று பூச்சி மருந்தை வாங்கி, தண்ணீரில் கலந்து குடித்துள்ளார். பின்னர், மதிய வேளையில் பள்ளிக்கு வந்த மாணவன், சக மாணவரிடம் பூச்சி மருந்து குடித்துவிட்டதாக கூறியுள்ளார். பிறகு இந்த தகவல் ஆசிரியர்களுக்கு தெரியவந்ததை அடுத்து, பெற்றோருக்கு தகவல் அளித்துள்ளனர். இதையடுத்து, அந்த மாணவனை மீட்டு உடனடியாக மருத்துவமனையில் அனுமதிக்கப்பட்டு தீவிர சிகிச்சை அளிக்கப்பட்டு வருகிறது.
