அமெரிக்காவில் உரிய ஆவணங்கள் இல்லாமல் தங்கியிருந்த 104 இந்தியர்களை அமெரிக்க அரசு தனது ராணுவ விமானத்தில் ஏற்றி இந்தியாவில் தரையிறக்கியது. இந்த விஷயம் தற்போது நாடு முழுவதும் பெரும் விவாத பொருளாக மாறியுள்ளது. இந்த நிலையில், இந்தியா திரும்பும் 40 மணி நேர பயணத்தின் போது கை விலங்குகள் போடப்பட்டதாகக் குற்றம் சாட்டியுள்ளனர்.புதன்கிழமை அமிர்தசரஸ் வந்து சேரும் வரை, தாங்கள் நாடுகடத்தப்பட்டது குறித்து தங்களுக்குத் தெரியாது என்று பலர் கூறினர்.
அமெரிக்க இராணுவத்தின் C-17 குளோப்மாஸ்டர் விமானத்தில் வந்த அங்கித், “அவர்கள் ‘தடுப்பு மையம்’ என்று அழைக்கும் முகாமில் எங்கள் கைகளுக்கு விலங்குகள் போடப்பட்டன. குழந்தைகள் அல்லது 18 வயதுக்குட்பட்டவர்களைத் தவிர, பெண்கள் உட்பட அனைவரின் கைகளுக்கும் விலங்குகள் போடப்பட்டன. எங்களுக்கு கழிப்பறை வசதிகள் வழங்கப்படவில்லை, சாப்பிடுவதற்கு கூட அவர்கள் விலங்குகளை அகற்றவில்லை” என்று கூறியதாக ராய்ட்டர்ஸ் செய்தி வெளியிட்டுள்ளது.
ஏன் சட்டவிரோத வழியைத் தேர்ந்தெடுத்தார் என்று கேள்விக்கு அங்கித் பதிலளித்தார், “இங்கே வேலைவாய்ப்பு இல்லாததால் பணம் சம்பாதிக்க சென்றதாகவும், இதற்காக நான் சுமார் 4 முதல் 4.5 மில்லியன் ரூபாய் வரை செலவிட்டேன்,” என்று அவர் மேலும் கூறினார். ஹோஷியார்பூரில் உள்ள தஹ்லி கிராமத்தைச் சேர்ந்த ஹர்விந்தர் சிங் கூறுகையில், பனாமா காட்டில் ஒருவர் இறப்பதையும், மற்றொருவர் கடலில் மூழ்கி இறப்பதையும் தான் கண்டதாகக் கூறினார்.
அமெரிக்காவிற்குள் செல்ல முயற்சிப்பதற்கு முன்பு, கத்தார், பிரேசில், பெரு, கொலம்பியா, பனாமா, நிகரகுவா மற்றும் மெக்ஸிகோ உள்ளிட்ட பல நாடுகள் வழியாக அழைத்துச் செல்லப்பட்டதாக அவர் தெரிவித்தார். “நாங்கள் மலைகளைக் கடந்தோம். மற்றவர்களுடன் என்னையும் அழைத்துச் சென்ற ஒரு படகு கடலில் கவிழ்ந்துவிடும் நிலையில் இருந்தது, ஆனால் நாங்கள் உயிர் பிழைத்தோம்,” என்று கூறினார்.
