இந்தியாவிற்கும் பாகிஸ்தானுக்கும் இடையிலான தற்போதைய பதட்டங்கள் காரணமாக, தொலைத்தொடர்பு நிறுவனங்களுக்கு அரசாங்கம் ஒரு புதிய உத்தரவை பிறப்பித்துள்ளது.
கடந்த 22ம் தேதி பஹல்காமில் நடத்தப்பட்ட பயங்கரவாத தாக்குதலில் 22 பேர் கொல்லப்பட்டதற்கு பழிவாங்கும் முயற்சியாக பாகிஸ்தானுக்கு எதிராக சிந்துநதி நீர் ஒப்பந்த நிறுத்தம் உள்ளிட்ட இந்தியா பல்வேறு தடை நடவடிக்கைகளை எடுத்தது. இருப்பினும், போர் நிறுத்தத்தை மீறி ஜம்மு காஷ்மீரில் எல்லைக் கிராமத்தில் இரவு நேரங்களில் பாகிஸ்தான் ராணுவம் தொடர்ந்து பொதுமக்கள் வசிக்கும் பகுதிகளை குறிவைத்து தாக்குதல் நடத்தி வருகிறது. இதற்கு இந்தியா தரப்பிலும் பதிலடி கொடுக்கப்பட்டு வருகிறது.
பயங்கரவாதத்திற்கு எதிராக பாகிஸ்தானின் பயங்கவாத முகாம்களை குறிவைத்து ஆப்ரேஷன் சிந்தூர் என்ற நடவடிக்கையை இந்தியா கையில் எடுத்தது. அதன்படி நடத்தப்பட்ட தாக்குதலில் பாகிஸ்தானில் 9 பயங்கரவாத முகாம்கள் அழிக்கப்பட்டதாகவும், 80க்கும் மேற்பட்ட தீவிரவாதிகள் கொல்லப்பட்டதாகவும் கூறப்படுகிறது. இதனிடையே இருநாடுகளுக்கிடையே பதட்டங்கள் அதிகரித்து வருகின்றன.
இந்தச் சூழ்நிலையில், பேரிடர் சூழ்நிலைகளுக்குத் தயாராக இருக்குமாறு தனியார் மற்றும் அரசு தொலைத்தொடர்பு நிறுவனங்களுக்கு தொலைத்தொடர்புத் துறை (DoT) எச்சரிக்கை விடுத்துள்ளது. சைபர் தாக்குதலின் சாத்தியமான அச்சுறுத்தல் காரணமாக நெட்வொர்க் செயல்பாடுகளைப் பாதுகாக்க வேண்டியதன் அவசியத்தை அவர்கள் வலியுறுத்தியுள்ளனர். பேரிடர் காலத்தில் தடையற்ற இணைப்பை உறுதி செய்வதற்காக, நம்பகமான நெட்வொர்க் செயல்திறனைப் பராமரிக்க ஏர்டெல், ஜியோ, பிஎஸ்என்எல் மற்றும் விஐ உள்ளிட்ட தொலைத்தொடர்பு நிறுவனங்களை தொடர்பு அமைச்சகம் கட்டாயப்படுத்தியுள்ளது.
தொலைத்தொடர்பு உள்கட்டமைப்பிற்கு தடையின்றி மின்சாரம் வழங்குவதற்காக, DG பெட்டிகளுக்கு போதுமான டீசல் இருப்பு வைத்திருக்குமாறு தொலைத்தொடர்பு நிறுவனங்களுக்கு அறிவுறுத்தப்பட்டுள்ளது. அவசரகால சூழ்நிலைகளில் தொலைத்தொடர்பு சேவைகளை விரைவாக மீட்டெடுக்க ரிசர்வ் குழுக்களை மூலோபாய ரீதியாக பணியமர்த்துமாறு தொலைதொடர்பு துறை அறிவுறுத்தியது.
பேரிடர் காலங்களில், தொலைத்தொடர்பு நிறுவனங்கள் பொதுவாக இன்ட்ரா-சர்க்கிள் ரோமிங் சேவைகளை செயல்படுத்துகின்றன, இதனால் பயனர்கள் இணைப்பு சிக்கல்களை எதிர்கொள்வதைத் தடுக்கின்றன. உதாரணமாக, கடந்த ஆண்டு ஒரிசாவில் ஏற்பட்ட புயலின் போது, இன்ட்ரா-சர்க்கிள் ரோமிங் செயல்படுத்தப்பட்டது பயனுள்ளதாக நிரூபிக்கப்பட்டது.
இதனால் பயனர்கள் தொந்தரவு இல்லாமல் தகவல்தொடர்புகளைப் பராமரிக்க முடிந்தது. இந்த சேவை செயல்படுத்தப்படும்போது, பயனர்கள் எந்த டெலிகாம் ஆபரேட்டரின் நெட்வொர்க்குடனும் இணைக்க முடியும், இதனால் அவர்கள் நெட்வொர்க் இல்லாவிட்டாலும் கூட அழைப்புகளைச் செய்ய முடியும்.
Read more: “எல்லையில் சந்தேகத்திற்கிடமான நபர்களை கண்டால் சுட்டு வீழ்த்துங்கள்..!!” – மத்திய அரசு உத்தரவு
