கொரோனாவால் பாதிக்கப்பட்ட அரசு ஊழியருக்கு எத்தனை நாட்கள் விடுப்பு என்பது குறித்து மனிதவள மேலாண்மைத் துறை புதிய அறிவிப்பு வெளியிட்டுள்ளது.
நாட்டில் கொரோனா பாதிப்பு படிப்படியாகக் குறைந்து வந்த நிலையில், தற்போது பாதிக்கப்படுவோரின் எண்ணிக்கை மீண்டும் அதிகரிக்க தொடங்கியுள்ளது. தொற்று பரவலைக் குறைக்கும் வகையில், விழிப்புணர்வு நிகழ்ச்சிகள் மற்றும் பல்வேறு நடவடிக்கைகளை அரசு மேற்கொண்டு வருகிறது. சமூக இடைவெளியைக் கடைப்பிடிக்கவும், முகக்கவசம் அணியவும் பொதுமக்கள் அறிவுறுத்தப்பட்டு வருகின்றனர்.
இந்நிலையில், கொரோனாவால் பாதிக்கப்பட்ட அரசு ஊழியர்களுக்கான விடுப்பு குறித்து மனிதவள மேலாண்மைத் துறை புதிய அறிவிப்பை வெளியிட்டுள்ளது. இதுகுறித்து, வெளியிடப்பட்டுள்ள அறிவிப்பில், ”கொரோனாவால் பாதிக்கப்பட்டவர்கள், தனிமைப்படுத்தலில் இருந்தாலும், சிகிச்சையில் இருந்தாலும் அத்தனை நாட்களும் சிறப்பு தற்செயல் விடுப்பு வழங்கப்படும். மருத்துவரின் சான்றிதழ் அடிப்படையில் தனிமைப்படுத்தலில் இருந்த நாட்கள், சிகிச்சையில் இருந்த நாட்களுக்கு விடுப்பு வழங்கப்படும். கட்டுப்பாட்டுப் பகுதிகளில் வசிப்பவர்கள், அதற்கான அறிவிப்பை சமர்ப்பித்தால், அவர்களுக்கும் சிறப்பு தற்செயல் விடுப்பு வழங்கப்படும்” எனத் தெரிவிக்கப்பட்டுள்ளது.
