உத்தரப்பிரதேச மாநிலத்தில் இரண்டரை வயது குழந்தையை மாடு ஒன்று முட்டிய சம்பவம் அப்பகுதியில் பரபரப்பு ஏற்படுத்தியது. குழந்தைகளை பொறுப்பில்லாமல் பொது இடங்களில் விட்டுச் செல்வது பல நேரங்களில் அவர்களுக்கு ஆபத்தாகவே அமையும். அதுபோன்ற ஒரு சம்பவம் தான் உத்தரப்பிரதேச மாநிலத்தில் நடைபெற்று இருக்கிறது. உத்தரப்பிரதேசம் மாநிலம் அலிகார் நகரில் உள்ள காந்தி பார்க் காவல் நிலைய எல்லைக்குட்பட்ட பரமானந்த் காலனியைச் சார்ந்த முதியவர் ஒருவர் இரண்டரை வயது பெண் குழந்தையை சாலையில் விட்டு அருகில் உள்ள இடத்திற்கு சென்று இருக்கிறார். அப்போது அங்கிருந்த காளை மாடு ஒன்று பாய்ந்து வந்து குழந்தையை ஆக்ரோஷமாக முட்டி தள்ளியது.
குழந்தையின் பெற்றோர் காளை மாட்டிடம் இருந்து போராடி அதன் அடியில் சிக்கிக் கொண்ட குழந்தையை மீட்டு மருத்துவமனையில் அனுமதித்தனர். குழந்தைக்கு பலத்த காயம் ஏற்பட்டுள்ளதாக மருத்துவர்கள் தெரிவித்தனர். குழந்தைக்கு தீவிரமான சிகிச்சையளிக்கப்பட்டு வருவதாகவும் அவர்கள் கூறினர். இது தொடர்பான வீடியோ ஒன்று சமூக வலைதளங்களில் பரவி வைரலாகி இருக்கிறது. குழந்தையை முட்டித் தூக்கும் அந்த வீடியோ காட்சி பார்ப்பவர்களின் நெஞ்சை பதற வைக்கும் வகையில் அமைந்துள்ளது. இது தொடர்பாக இந்த வீடியோ காட்சிகளை இணையதளத்தில் பரப்பியது யார் என காவல்துறை தீவிரமாக விசாரணை செய்து வருகின்றனர். குழந்தைகளை பாதுகாப்பில்லாமல் தனி இடங்களில் விட்டுச் செல்ல வேண்டாம் எனவும் பெற்றோருக்கு கோரிக்கை வைத்துள்ளனர் காவல்துறையினர்.
