கேரளா நரபலி விவகாரத்தில் போலீசார் நடத்திய விசாரணையில், புதிய தகவல் ஒன்று வெளியாகி பெரும் அதிர்ச்சிக்குள்ளாக்கியுள்ளது.
கேரளாவில் 2 பெண்கள் நரபலி கொடுக்கப்பட்ட சம்பவம் நாட்டையே உலுக்கிய நிலையில், இந்த வழக்கில் கைது செய்யப்பட்ட முகமது ஷாஃபி, பகவல் சிங் மற்றும் அவரது மனைவி லைலா ஆகியோரை போலீசார் கஸ்டடி எடுத்து விசாரணை நடத்தி வருகின்றனர். ஏற்கெனவே, முகமது ஷாஃபி-யை அழைத்துச் சென்று கொச்சியில் உள்ள அவரது வீடு, ஹோட்டல் ஆகியவற்றில் விசாரணை நடத்தப்பட்டது. விசாரணையில் கொலை செய்யப்பட்ட பத்மா-வின் 39 கிராம் நகைகளை அடகு வைத்ததற்கான ரசீது கண்டுபிடிக்கப்பட்டது. இந்நிலையில், நரபலி கொடுக்கப்பட்ட பகவல் சிங்கின் வீட்டில் மோப்பநாய் உதவியுடன் சோதனை மேற்கொள்ளப்பட்டது. பகவல் சிங் வீட்டைச் சுற்றியுள்ள பகுதியில் வேறு உடல்கள் ஏதேனும் புதைக்கப்பட்டுள்ளனவா என்பதை கண்டறிவதற்காக சோதனை மேற்கொள்ளப்பட்டது. சந்தேகத்துக்கு இடமான பகுதிகளில் தோண்டி பார்க்கப்பட்டது.
அதில், பகவல் சிங் வீட்டில் சில இடங்களிலில் ரத்தகறைகள் கண்டுபிடிக்கப்பட்டன. வீட்டில் உள்ள ஃபிரிட்ஜிக்கு உள்ளும் ரத்தக்கரை இருப்பது தெரியவந்தது. அவை பழைய ரத்தக்கறை மற்றும் புதிய ரத்தகறைகள் எனத் தெரியவந்துள்ளது. ரத்தக்கறைகள் நரபலி கொடுக்கப்பட்ட ரோஸ்லி மற்றும் பத்மா ஆகியோருடையதாக இருக்க வாய்ப்பு உள்ளதாகவும், இருப்பினும் அதை ஆய்வு மூலம் முடிவு செய்யவும் போலீசார் நடவடிக்கை எடுத்து வருகின்றனர். நரபலி கொடுத்தபின் சிறு துண்டுகளாக வெட்டப்பட்ட உடல்களை அடக்கம் செய்ய காலதாமதம் ஆனதால், உடலை பிரிட்ஜில் வைத்திருக்கலாம் என்று போலீசார் கருதுகின்றனர்.
பத்மாவின் உடலை புதைக்க காலதாமதம் ஆனதற்கான சாட்சிகளும் கண்டறியப்பட்டுள்ளன. கொலை நடந்த நாளுக்கு பிறகு தொழிலாளி ஒருவரை அழைத்து வீட்டு வளாகத்தில் குப்பைகளை கொட்டுவதற்காக ஒரு குழி தோண்ட வேண்டுமென பகவல் சிங் கூறியதாக போலீஸ் விசாரணையில் தெரியவந்தது. எனவே அந்த குழி வெட்டப்படுவது வரை உடல் பாகங்கள் அழுகிப்போகாமல் இருக்க ஃபிரிட்ஜில் வைக்கப்பட்டிருக்கலாம் என்றும் அதன் பின்னர் உடல் துண்டுகளை அவர்கள் புதைத்திருக்கலாம் எனவும் சந்தேகம் எழுந்துள்ளது. பகவல் சிங் வீட்டின் அருலில் உள்ள ஆயுர்வேத மசாஜ் சென்டரிலிருந்து, நரபலிக்கு பயன்படுத்திய கத்தி, உடலை கூறுபோட பயன்படுத்திய வெட்டரிவாள் ஆகியவை கண்டறியப்பட்டுள்ளன.
பகவல் சிங் வீட்டு வளாகத்தில் எலும்புத்துண்டு ஒன்று கண்டுபிடிக்கப்பட்டுள்ளது. அது நரபலி கொடுக்கப்பட்ட ரோஸ்லி அல்லது பத்மா-வின் உடல் பாகத்தில் உள்ளதா எனவும் இல்லையென்றால் வேறு யாருடைய உடல் பாகமாக இருக்குமா என கண்டறியவும் போலீசார் நடவடிக்கை எடுத்து வருகின்றனர். நரபலி கொடுத்து பூஜை செய்யப்பட்டதாக வீட்டின் ஓரிடத்தையும், அங்கு பூஜைக்கு பயன்படுத்திய சில உபகரணங்களையும் போலீசார் கண்டுபிடித்துள்ளனர். பகவல் சிங் வீட்டில் இரண்டு இடங்களில் முகமது ஷாஃபியின் கைரேகை பதிந்திருப்பதை ஃபாரன்சிக் நிபுணர்கள் கண்டுபிடித்துள்ளனர். இதன் மூலம் கொலை நடந்த சமயத்தில் ஷாஃபி அங்கு இருந்தது உறுதி செய்யப்பட்டுள்ளதாக போலீஸ் தரப்பில் கூறப்படுகிறது.
