திருவள்ளூர்: கருத்து வேறுபாட்டின் காரணமாக பிரிந்து சென்ற தன்னுடைய மனைவியுடன் கள்ளத்தனமாக வாழ்ந்து வந்த வாலிபரை, நண்பர்கள் உதவியுடன் அப்பெண்ணின் கணவர் வீடு புகுந்து வெட்டிக் கொலை செய்த சம்பவம் பெரும் பரபரப்பை ஏற்படுத்தியுள்ளது.
திருவள்ளூர் மாவட்டம் மீஞ்சூர் அடுத்துள்ள கேசவபுரத்தில் சென்னை ராயபுரத்தைச் சேர்ந்த கணேஷ்குமார் என்ற வாலிபர் சபரிதா என்ற பெண்ணுடன் தனியாக வசித்து வந்துள்ளார். முன்னதாக சபரிதாவுக்கும், அவருடைய கணவர் பசுபதிக்கும் இடையே கருத்து வேறுபாடு ஏற்பட்டதன் காரணமாக இருவரும் பிரிந்து வாழ்ந்து வந்துள்ளனர். இதனைத்தொடர்ந்து தான் கணேஷ்குமாருடன் கணேஷ்குமாருடன் தனது வாழ்க்கையை வாழ்ந்து வந்துள்ளார் சபரிதா. இதனால் பசுபதிக்கும், கணேஷ்குமாருக்கும் இடையே அடிக்கடி தகராறு ஏற்பட்டு வந்துள்ளது.
இந்தநிலையில், கொரோனா ஊரடங்கை தனக்கு சாதகமாகப் பயன்படுத்திக் கொண்ட பசுபதி, எப்படியாவது கணேஷ்குமாரினை கொலை செய்துவிடவேண்டும் என திட்டம் தீட்டியுள்ளார். இதற்காக கணேஷ்குமார் – சபரிதா வீட்டில் தனியாக இருந்த சமயம், தன்னுடைய நண்பர்களின் உதவியோடு , பட்டப் பகலில் சபரிதா கண்முன்னே கணேஷ்குமாரை சரமாரியாக அரிவாளால் வெட்டி சாய்த்துள்ளார்.
இதில் ரத்த வெள்ளத்தில் கீழே சரிந்து விழுந்த கணேஷ்குமார் சம்பவ இடத்திலேயே பரிதாபமாக பலியானார். கொலையினை நேரில் பார்த்த சபரிதாவின் அலறல் சத்தம் கேட்டு அக்கம் பக்கத்தினர் வருவதை கண்டவர்கள் தப்பித்து சென்றுவிட்டனர்.
இதையடுத்து, தகவலறிந்து சம்பவ இடத்திற்கு விரைந்து வந்த மீஞ்சூர் போலீசார், இறந்தவரின் சடலத்தை கைப்பற்றி பிரேத பரிசோதனைக்காக பொன்னேரி அரசு மருத்துவமனைக்கு அனுப்பி வைத்தனர். மேலும், கணவனை பிரிந்து வாழ்ந்து வரும் சபரிதாவை காவல்நிலையத்திற்கு அழைத்துச் சென்று போலீசார் தீவிர விசாரணை மேற்கொண்டு வருவதோடு கொலை செய்த பசுபதி மற்றும் அவரது நண்பர்களை வலைவீசி தேடி வருகின்றனர்..
