ராமநாதபுரம் மாவட்டம் திருப்பாலைக்குடியை சேர்ந்தவர்கள் செல்வம் – வனிதா தம்பதியினர். இவர்களது இரண்டாவது மகள் பிரியங்கா. காரைக்குடி அடுத்த ஆறாவயலில் செயல்பட்டு வந்த பஞ்சுமில்லில் பணியாற்றி வந்த நிலையில், அங்கு தன்னுடன் பணிபுரிந்து வந்த மணிகண்டன் என்பவரை காதலித்து கடந்த 2 மாதங்களுக்கு முன்பு கலப்பு திருமணம் செய்துகொண்டனர். இந்நிலையில், கடந்த 2 நாட்களுக்கு முன்பு தனது தாயிடம் பேசிய பிரியங்கா, தன்னை மாமியார் சாதியை சொல்லி திட்டியதாகவும், வரதட்சணையாக நகை பணம் ஏதுவும் கொண்டு வரவில்லை என்றும் அவமானப்படுத்தி வருவதாகவும், அதற்கு தனது கணவரும் உடந்தையாக இருப்பதாகவும் கூறி அழுதுள்ளார்.
அதன் பின்னர் மகளை தொடர்பு கொள்ள இயலாத நிலையில், காதலர் தினத்தன்று மாலையில் பிரியங்கா வீட்டில் தூக்கிட்டு தற்கொலை செய்துகொண்டதாக அவரது பெற்றோருக்கு தகவல் தெரிவிக்கப்பட்டது. இதையடுத்து, சம்பவ இடத்திற்கு விரைந்து பிரியங்காவின் சடலத்தை மீட்ட காளையார்கோவில் போலீசார், உடற்கூராய்வுக்காக அரசு மருத்துவமனைக்கு அனுப்பி வைத்தனர். இந்நிலையில், காதல் திருமணம் செய்து காதலனை நம்பி வாழச்சென்ற தனது மகளை சாதி ரீதியாக துன்புறுத்தி இருப்பதால், இறப்பில் மர்மம் இருப்பதாகவும் அதற்கு காரணமானவர்கள் மீது நடவடிக்கை எடுக்க கோரியும் அதுவரை தனது மகளின் உடலை வாங்க மறுப்பதாகவும் தாய் வனிதா, சிவகங்கை எஸ்.பி அலுவலகத்தில் புகார் மனு அளித்தார். இச்சம்பவம் அங்கு பெரும் பரபரப்பை ஏற்படுத்தியுள்ளது.
