இன்று அதிகாலை இந்தோனேசியாவின் பிரதான தீவான ஜாவாவில் ஒரு பயணிகள் பேருந்து விபத்துக்குள்ளானதில் குறைந்தது 16 பேர் உயிரிழந்தனர் என்று அதிகாரிகள் தெரிவித்தனர்.
34 பயணிகளை ஏற்றிச் சென்ற அந்தப் பேருந்து, ஒரு சுங்கச்சாவடி சாலையில் கட்டுப்பாட்டை இழந்து, ஒரு கான்கிரீட் தடுப்பில் மோதி, பின்னர் கவிழ்ந்து விபத்துக்குள்ளானது..
இந்த விபத்து நடந்தபோது, அந்த பேருந்து நாட்டின் தலைநகரான ஜகார்த்தாவிலிருந்து, நாட்டின் வரலாற்றுச் சிறப்புமிக்க அரச நகரமான யோக்யகர்த்தாவிற்குச் சென்று கொண்டிருந்தது என்றும் அதிகாரிகள் தெரிவித்துள்ளனர்.. காயமடைந்த பயணிகள் சிகிச்சைக்காக செமராங் நகரத்திற்கு கொண்டு செல்லப்பட்டனர்..
குறிப்பிடத்தக்க வகையில், இந்தோனேசியாவில் போக்குவரத்து விபத்துக்கள் சாதாரணமாக நிகழ்கின்றன. அங்கு பல வாகனங்கள் பழமையானவையாகவும், முறையாகப் பராமரிக்கப்படாதவையாகவும் உள்ளன, மேலும் போக்குவரத்து விதிகள் பெரும்பாலும் புறக்கணிக்கப்படுகின்றன தகவல்கள் தெரிவிக்கின்றன.. ஜகார்த்தாவில் ஒரு அலுவலகக் கட்டிடத்தில் தீ விபத்து ஏற்பட்டு குறைந்தது 22 பேர் உயிரிழந்த இரண்டு வாரங்களுக்குப் பிறகு இந்தச் சம்பவம் நிகழ்ந்துள்ளது.
2024 ஆம் ஆண்டில், ரம்ஜான் பண்டிகையை கொண்டாடப் பயணிகள் வெளியே சென்று கொண்டிருந்தபோது, பரபரப்பான நெடுஞ்சாலையில் ஒரு கார் பேருந்து மற்றும் மற்றொரு வாகனத்தின் மீது மோதியதில் குறைந்தது 12 பேர் இறந்தனர். 2019 ஆம் ஆண்டில், சுமத்ரா தீவின் மேற்கில் நடந்த ஒரு பேருந்து விபத்தில், வாகனம் ஒரு பள்ளத்தில் கவிழ்ந்ததில் குறைந்தது 35 பேர் உயிரிழந்தனர்.
இந்தோனேசிய அலுவலகக் கட்டிடத் தீ விபத்து
ஏழு மாடிகளைக் கொண்ட அந்தக் கட்டிடத்தில் தீப்பிழம்புகள் பரவி, கருப்புப் புகையை காற்றில் பரப்பியதுடன், மத்திய ஜகார்த்தா பகுதியில் வசிப்பவர்கள் மற்றும் தொழிலாளர்கள் மத்தியில் பீதியை ஏற்படுத்தியது.
கெமயோரன் பகுதியில் உள்ள கட்டிடத்தின் முதல் தளத்தில் தீ விபத்து தொடங்கி, பின்னர் மற்ற தளங்களுக்குப் பரவியதாக நம்பப்படுகிறது என்று காவல்துறை தெரிவித்துள்ளது. மத்திய ஜகார்த்தா காவல்துறைத் தலைவர் சுசாத்யோ பூர்ணோமோ கொண்ட்ரோ, தீயைக் கட்டுக்குள் கொண்டுவர நூற்றுக்கணக்கான பணியாளர்களும் 29 தீயணைப்பு வாகனங்களும் பயன்படுத்தப்பட்டதாகக் கூறினார். மூன்று மணி நேர முயற்சிக்குப் பிறகு தீ அணைக்கப்பட்டது. கட்டிடத்திலிருந்து குறைந்தது 22 உடல்கள் மீட்கப்பட்டு, அடையாளம் காண்பதற்காக கிழக்கு ஜகார்த்தாவில் உள்ள காவல் மருத்துவமனைக்கு கொண்டு செல்லப்பட்டன. உயிரிழந்தவர்களில் ஏழு ஆண்கள் மற்றும் 15 பெண்கள் அடங்குவர், அவர்களில் ஒரு கர்ப்பிணிப் பெண்ணும் இருந்தார்.
