பீகாரில், கடந்த சில மாதங்களாக தங்கள் பெண் பிள்ளைகள் காணாமல் போனதாக அல்லது கடத்தப்பட்டதாக புகார் அளிக்கும் சம்பவங்கள் அதிகமாகி வருகின்றன. ஆனால் காவல்துறையினர் விசாரணையில் சிறுமிகள் கடத்தப்படவில்லை என்றும், அவர்களாகவே விருப்பபட்டு காதலனுடன் ஓடிவிட்டதாக கூறப்படுகிறது. காவல்துறையினரின் அறிக்கையின் படி, கடந்த 6 மாதங்களில், பீகாரில் இதுபோல 1870 சிறுமிகள் காதலனுடன் ஓடிப்போனதாக வழக்குகள் பதிவாகியுள்ளன.
இதில் ஜனவரி மாதத்தில் 240 வழக்குகளும், பிப்ரவரியில் 247 வழக்குகளும், மார்ச்சில் 297 வழக்குகளும், ஏப்ரலில் 330 வழக்குகளும், மே மாதத்தில் 383 வழக்குகளும், ஜூன் மாதத்தில் 373 வழக்குகளும் பதிவாகியுள்ளன. மேலும் இந்த எண்ணிக்கை தினசரி அடிப்படையில் பார்த்தால், பீகாரில் ஒவ்வொரு இரண்டரை மணி நேரத்திற்கும் ஒரு காதல் ஜோடி வீட்டை விட்டு ஓடியுள்ளனர். அதே சமயத்தில், இந்த வருடம், 2022 இல் இதுவரை 2778 இளம்பெண் கடத்தல் வழக்குகள் பதிவு செய்யப்பட்டுள்ளன.
தேசிய குற்ற ஆவணக் காப்பகத்தின் படி, இந்த வழக்கில் பீகார் இரண்டாவது இடத்தில் இருக்கிறது. 2020-ல் 5308 சம்பவங்கள் நடந்த நிலையில், 2021-ல் 6589 வழக்குகள் பதிவாகியுள்ளன. தற்போது, காதலனுடன் ஓடிப்போய்விட்டதாக காதலி முன் வந்து வெளிப்படையாக கூறுகின்ற வீடியோக்கள் சமூக வலைதளங்களில் பரவி வருகின்றன.
பீகாரில் கடந்த 2015-ஆம் வருடம் காதல் மற்றும் கல்யாணம் போன்ற நோக்கத்தில் கடத்தப்பட்டதாக 4229 வழக்குகள் பதிவாகி உள்ளன. 2016-ல், இந்த வழக்குகள் 4652 ஆக அதிகரித்துள்ளது. 2017 -ஆம் வருடத்தில், கடத்தல் வழக்குகள் அதிகரித்து 6217 வழக்குகள் பதிவு செய்யப்பட்டு உள்ளன. 2017- ஆம் வருடத்தை விட 2018 -ஆம் வருடத்தில் 2000 வழக்குகள் அதிகரித்து சுமார் 8 ஆயிரம் வழக்குகள் பதிவு செய்யப்பட்டு உள்ளன.
