’Cooku with Comali’ புகழ் அம்மு அபிராமி மோசடி புகார் ஒன்றில் சிக்கியுள்ள சம்பவம் சினிமா வட்டாரத்தில் பரபரப்பை கிளப்பியுள்ளது.
சமீபகாலமாக நூதன முறையில் பல பண மோசடி நடந்து வருகிறது. தொழில்நுட்ப வளர்ச்சி ஒரு பக்கம் நன்மையை தந்தாலும் மறுபுறம் தீமைகளுக்கும் வழி வகுத்து வருகிறது. அதுவும் துல்கர் சல்மானின் கண்ணும் கண்ணும் கொள்ளையடித்தால் படத்தில் இருந்து நவீன திருட்டை காண்பித்து இருப்பார்கள். அவ்வாறு இப்போது ஒரு மோசடியில் சிக்கி உள்ளார் அசுரன் பட நடிகை அம்மு அபிராமி. விஜய் நடிப்பில் வெளியான பைரவா படத்தின் மூலம் அறிமுகமான இவர் ராட்சசன், அசுரன், தானா சேர்ந்த கூட்டம் போன்ற படங்களில் நடித்துள்ளார். அதுமட்டுமின்றி விஜய் டிவியில் ஒளிபரப்பான குக் வித் கோமாளி நிகழ்ச்சியில் பங்கேற்றார். இதன் மூலம் இவருக்கு ஏராளமான ரசிகர்கள் கிடைத்தது மட்டுமின்றி பட வாய்ப்புகளும் குவிந்து வருகிறது.
இந்நிலையில் அம்மு அபிராமி பல பிரபலங்கள் போல யூடியூப் சேனல் ஒன்று தொடங்கி வீடியோக்களை பதிவிட்டு வந்துள்ளார். இவரின் யூடியூப் சேனல் போலவே மர்ம ஆசாமி ஒருவர் போலி கணக்கை தொடங்கியுள்ளார். இதில் அம்மு அபிராமியின் ரசிகர் ஒருவரிடம் உங்களுக்கு பரிசு அனுப்புவதாக சொல்லி ரூ.5000 டெலிவரி சார்ஜ் கேட்டுள்ளார். அந்த ரசிகரும் அம்மு அபிராமி தான் கேட்கிறார் என நினைத்து பணத்தை அனுப்பி வைத்துள்ளார். ஆனால், தான் ஏமாற்றப்பட்டதை பின்னர் தான் உணர்ந்தார்.
இதனையறிந்த அம்மு அபிராமி, இப்படி எல்லாம் பிராடு பண்ணுவீங்களா என்று கோபமாக பேசி ஒரு வீடியோ பதிவிட்டுள்ளார். அதில், ”எனது பெயரை சொல்லி மோசடி செய்ததை கேட்டு நான் அதிர்ச்சி அடைந்தேன். இவ்வாறு அடுத்தவரின் காசை திருடும் அளவிற்கு கேவலமான செயலை யாரும் செய்யாதீர்கள். நான் இதுவரை யாருக்கும் பரிசு பொருட்கள் எதுவும் அனுப்பவில்லை. இனியும் யாரும் இது போல் ஏமாறாமல் மிகவும் எச்சரிக்கையாக இருக்குமாறு” கேட்டுக்கொண்டுள்ளார்.
