திருச்சி மாவட்டம் லால்குடி அருகே அன்பில் ஜங்கமா ராஜபுரம் ஆசிரம வள்ளி அம்மன் கோவில் திருவிழாவை நடத்துவது தொடர்பாக இருதரப்பினர் இடையே மோதல் ஏற்பட வாய்ப்பு உள்ளது. இதனால், 8 நாட்களுக்கு அந்த பகுதியில் 144 தடை உத்தரவு அமல்படுத்தப்பட்டுள்ளது. அந்த பகுதியில் கோவில் திருவிழாவை இந்த ஆண்டு நடத்த முடியாது என இந்து சமய அறநிலையத்துறை இணை ஆணையர் உத்தரவிட்டுள்ளார்.
இந்த உத்தரவை மீறி மற்றொரு பிரிவினர் மாசி மாத காப்பு கட்டு தேர் திருவிழாவை தனியாக நடத்துவதற்கு ஏற்பாடு செய்து வருவதாக தகவல் வெளியானது. இதனையறிந்த மாவட்ட ஆட்சியர் ஜங்கமராஜபுரம், கீழ அன்பில், மங்கம்மாள்புரம் ஆகிய பகுதிகள் மற்றும் கோவில்கள் உள்ள பகுதிகளில் 144 தடை உத்தரவை அமல்படுத்த உத்தரவு பிறப்பித்துள்ளார். இதனால் அப்பகுதியில் பரபரப்பு நிலவி வருகிறது.
