அமெரிக்கா மத்தியஸ்தம் செய்ததால் தான் இந்தியா – பாகிஸ்தான் இடையே போர் நிறுத்தம் ஏற்பட்டதாக கூறி வந்த நிலையில் தற்போது யூ டர்ன் அடித்துள்ளார்.
அணு ஆயுத மோதலாக மாறக்கூடிய சாத்தியம் இருப்பதாகக் கூறிய ஒரு இராணுவ மோதலை நிறுத்த முடிவு செய்ததற்காக இந்தியா மற்றும் பாகிஸ்தான் தலைவர்களுக்கு அமெரிக்க அதிபர் டொனால்ட் ட்ரம்ப் பாராட்டு தெரிவித்தார். இதற்கு முன்பு வரை அமெரிக்கா மத்தியஸ்தம் செய்ததால் தான் இந்தியா – பாகிஸ்தான் இடையே போர் நிறுத்தம் ஏற்பட்டதாக கூறி வந்த நிலையில் தற்போது யூ டர்ன் அடித்துள்ளார்.
வெள்ளை மாளிகையில் பாகிஸ்தானின் இராணுவத் தளபதி ஜெனரல் அசிம் முனிரை சந்தித்த பின்னர் ஓவல் அலுவலகத்தில் செய்தியாளர்களை சந்தித்தார். அப்போது பேசிய ட்ரம்ப், “இரண்டு புத்திசாலிகள்… இரண்டு மிகவும் புத்திசாலிகள் அந்தப் போரைத் தொடர வேண்டாம் என்று முடிவு செய்ததில் நான் மிகவும் மகிழ்ச்சியடைகிறேன். அது ஒரு அணுசக்திப் போராக இருந்திருக்கலாம். அவர்கள் இரண்டு அணுசக்தி சக்திகள்.. ஆனால் போரை தவிர்க்க முடிவு செய்தனர்” என்று தெரிவித்தார்.
பிரதமர் நரேந்திர மோடியும் ஜெனரல் முனிரும் விரோதப் போக்கிலிருந்து பின்வாங்குவதில் முக்கிய பங்கு வகித்தனர் என்றும் ட்ரம்ப் கூறினார். “நான் [முனிரை] இங்கு வைத்திருந்ததற்குக் காரணம்… போருக்குச் செல்லாமல், போரை முடிவுக்குக் கொண்டு வந்ததற்கு அவருக்கு நன்றி சொல்ல விரும்புகிறேன். பிரதமர் மோடிக்கும் நன்றி சொல்ல விரும்புகிறேன்,” என்று அவர் கூறினார்.
சமீபத்தில் மோடியை அழைத்துப் பேசியதாகவும், இரு நாடுகளும் ஒரு வர்த்தக ஒப்பந்தத்தில் பணியாற்றி வருவதாகவும் டிரம்ப் தெரிவித்தார். மேலும் “நாங்கள் இந்திய மோடியுடன் ஒரு வர்த்தக ஒப்பந்தம் செய்யப் போகிறோம். ஆனால் நான் பாகிஸ்தானுக்கும் இந்தியாவுக்கும் இடையிலான போரை நிறுத்தினேன்,” என்று அவர் அன்றைய தினம் ட்ரம்ப் கூறினார்.
மோடி- ட்ர்ம்ப் உரையாடல்
கனடாவின் கனனாஸ்கிஸில் நடைபெறும் ஜி7 தலைவர்கள் உச்சிமாநாட்டின் போது மோடியும் டிரம்பும் சந்திப்பார்கள் என்று எதிர்பார்க்கப்பட்டாலும், டிரம்ப் முன் கூட்டியே வெளியேறியதால் அவர்களின் நேரடி சந்திப்பு நடக்கவில்லை. இருப்பினும், குரோஷியாவிற்கு தனது மூன்று நாடுகளுக்கான சுற்றுப்பயணத்தின் இறுதிக் கட்டத்திற்கு மோடி புறப்படுவதற்கு முன்பு இரு தலைவர்களும் 35 நிமிட தொலைபேசி உரையாடலை நடத்தினர்.
வெளியுறவுச் செயலாளர் விக்ரம் மிஸ்ரி இதுகுறித்து விளக்கம் அளித்தார். மேலும்”, ஏப்ரல் 22 அன்று பஹல்காமில் 26 பேரைக் கொன்ற பயங்கரவாதத் தாக்குதலுக்கு இந்தியாவின் தொடர்ச்சியான ஆபரேஷன் சிந்தூரின் போது, இந்தியா-அமெரிக்க வர்த்தக ஒப்பந்தம் அல்லது மத்தியஸ்த திட்டம் எதுவும் விவாதிக்கப்படவில்லை என்று மோடி டிரம்பிடம் கூறினார். இந்தியா மூன்றாம் தரப்பு மத்தியஸ்தத்தை ஒருபோதும் ஏற்றுக்கொள்ளாது என்றும், இஸ்லாமாபாத்தின் வேண்டுகோளின் பேரில் பாகிஸ்தானுடனான தற்போதைய இராணுவ தொடர்பு வழிகள் மூலம் பகைமையை நிறுத்துவதற்கான முடிவு எடுக்கப்பட்டது என்றும் மிஸ்ரி மீண்டும் வலியுறுத்தினார்.
மத்தியஸ்தத்தை நிராகரிக்கும் இந்தியா
கிட்டத்தட்ட 4 நாட்கள் ட்ரோன் மற்றும் ஏவுகணைத் தாக்குதல்களுக்குப் பிறகு, மே 10 முதல் எல்லை தாண்டிய இராணுவ நடவடிக்கையை நிறுத்த இந்தியா மற்றும் பாகிஸ்தானின் இராணுவ நடவடிக்கைகளின் இயக்குநர் ஜெனரல்கள் (DGMOக்கள்) பரஸ்பர உடன்பாட்டை எட்டியதாக மத்திய அரசு வட்டாரங்கள் கூறுகின்றன. இந்த முடிவுகளின் போது மூன்றாம் தரப்பு தலையீடு எதுவும் நடக்கவில்லை என்று அதிகாரிகள் திட்டவட்டமாக கூறியுள்ளனர்..
இந்தியாவின் கவலைகளுக்கு ட்ரம்ப் அனுதாபம் தெரிவித்ததாகவும், அவர்களின் அழைப்பின் போது பஹல்காம் தாக்குதல் குறித்து இரங்கல் தெரிவித்ததாகவும் மிஸ்ரி கூறினார். பயங்கரவாதத்தை இந்தியா ஒரு நேரடிப் போராகக் கருதுகிறது, வெறும் மறைமுக மோதலாக அல்ல என்றும் மோடி தெளிவுபடுத்தினார்.
முனீரின் பங்கை பாராட்டிய ட்ரம்ப்
ஜெனரல் முனீரின் வெள்ளை மாளிகை வருகையின் முக்கியத்துவம் குறித்த கேள்விகளுக்கு பதிலளித்த டிரம்ப், பாகிஸ்தான் இராணுவத் தலைவர் பாகிஸ்தான் தரப்பிலிருந்து [மோதலை] நிறுத்துவதில் மிகவும் செல்வாக்கு மிக்கவர்” என்று விவரித்தார், மேலும் இந்தியத் தரப்பில் மோடியின் பங்கை மீண்டும் குறிப்பிட்டார். “அவர்கள் அதைச் செய்யத் தொடங்கினர், அவை இரண்டும் அணுசக்தி நாடுகள். நான் அதை நிறுத்தினேன்,” என்று அவர் தனது முந்தைய கதைக்குத் திரும்பினார்.
இருப்பினும், மோதலை நிறுத்துவதில் தனது பங்கு ஊடக கவனத்தைப் பெறவில்லை என்ற விரக்தியையும் அவர் வெளிப்படுத்தினார்: “அதைப் பற்றி ஒரு செய்தி கூட எழுதப்படவில்லை என்று நான் நினைக்கிறேன். ஆனால் மக்களுக்குத் தெரியும்.”
பின்னணி:
ஏப்ரல் 22 அன்று பஹல்காமில் நடந்த பயங்கரவாதத் தாக்குதலைத் தொடர்ந்து, பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் உள்ள பயங்கரவாத உள்கட்டமைப்பை குறிவைத்து இந்தியா ஆபரேஷன் சிந்தூர் நடவடிக்கையைத் தொடங்கியது. இதை தொடர்ந்து இரு நாடுகளும் ட்ரோன் மற்றும் ஏவுகணைத் தாக்குதல்களை நடத்தி வந்தன. இதனால் இந்தியா – பாகிஸ்தான் இடையே போர் மூளும் அபாயம் ஏற்பட்டது.
மே 10 அன்று, இந்தியாவும் பாகிஸ்தானும் விரோதத்தை நிறுத்த ஒரு உடன்பாட்டை எட்டின. அதைத் தொடர்ந்து அமெரிக்கா மத்தியஸ்தம் செய்ததால் போர் நிறுத்தம் ஏற்பட்டதாக ட்ரம்ப் மீண்டும் மீண்டும் கூறிவந்தார். ஆனால், பதற்றத்தைக் குறைப்பதற்கான பேச்சுவார்த்தை இரு நாடுகளின் இராணுவ அதிகாரிகளிடமும் நேரடியாகப் பேச்சுவார்த்தை நடத்தப்பட்டது, அமெரிக்க மத்தியஸ்தம் இதில் ஈடுபடவில்லை என்று இந்திய அரசு வட்டாரங்கள் தெரிவிக்கின்றன.
