டெக்சாஸில் ஏற்பட்ட திடீர் வெள்ளத்தில் சிக்கி பலியானோர் எண்ணிக்கை 78 ஆக அதிகரித்துள்ள நிலையில், வரும் வெள்ளிக்கிழமை அதிபர் டிரம்ப் வெள்ளம் பாதித்த பகுதிகளை பார்வையிடவுள்ளார்.
அமெரிக்காவின், தென்- மத்திய டெக்சாஸ் மாகாணத்தின், மலைப் பகுதியில் அமைந்துள்ள கெர் கவுன்டியில் கடந்த 2 நாட்களாக பலத்த காற்றுடன் திடீரென கனமழை கொட்டித்தீர்த்து வருகிறது. இதனால் குவாடலுாப் ஆற்றில் வெள்ளப்பெருக்கு ஏற்பட்டது. குவாடலுாப் நதியில் 45 நிமிடங்களில் 26 அடி அளவுக்கு நீர்மட்டம் உயர்ந்து, கரையில் இருந்த குடியிருப்புகளை வெள்ளம் சூழ்ந்தது. இந்த பயங்கர வெள்ளத்தில் சிக்கி 28 குழந்தைகள் உட்பட இதுவரை பலியானோர் எண்ணிக்கை 78 ஆக உயர்ந்துள்ளது. மேலும் குவாடலுாப் ஆற்றங்கரையோரம் இருந்த கிறிஸ்துவ கோடைக்கால முகாமில் தங்கியிருந்தவர்களில், 27 பெண்கள் மாயமாகி இருப்பதாகத் தெரியவந்துள்ளது.
கேம்ப் மிஸ்டிக் உட்பட பல இளைஞர் முகாம்கள் அமைந்துள்ள கெர் கவுண்டியில் மட்டும், மீட்புப் பணியாளர்கள் குழந்தைகள் உட்பட 68 பேரின் உடல்களைக் கண்டுபிடித்துள்ளனர். டிராவிஸ், பர்னெட், கெண்டல், டாம் கிரீன் மற்றும் வில்லியம்சன் மாவட்டங்களில் மேலும் 10 பேர் பலியாகியுள்ளதாக தெரிவிக்கப்பட்டுள்ளது. டெக்சாஸ் அதிகாரிகள் கூறுகையில், 40க்கும் மேற்பட்டோர் இன்னும் காணவில்லை, மேலும் இந்த எண்ணிக்கை அதிகரிக்கக்கூடும். அவர்களில் பலர் வெள்ளிக்கிழமை வெள்ளத்தால் மோசமாக சேதமடைந்த கேம்ப் மிஸ்டிக் என்ற அனைத்து பெண்களுக்கான கோடைக்கால முகாமைச் சேர்ந்த குழந்தைகள் மற்றும் ஊழியர்கள் ஆவர். மீட்புப் பணிகளுக்கு ஆதரவாக அமெரிக்க கடலோர காவல்படை கூடுதல் விமானப்படைகளை அனுப்பியுள்ளது.
மீட்புப் பணிகள் நடைபெற்று வரும் நிலையில், இந்த வார இறுதியில் டெக்சாஸுக்குச் செல்ல திட்டமிட்டுள்ளதாக அமெரிக்க அதிபர் டொனால்ட் டிரம்ப் ஞாயிற்றுக்கிழமை தெரிவித்தார். ” வெள்ளத்தை “நடந்த ஒரு பயங்கரமான விஷயம்” என்று அழைத்த டிரம்ப், கெர் கவுண்டிக்கான ஒரு பெரிய பேரிடர் அறிவிப்பிலும் கையெழுத்திட்டார். இந்த நடவடிக்கை, பேரிடரால் பாதிக்கப்பட்ட மக்களுக்கு உதவத் தொடங்க மத்திய அவசரநிலை மேலாண்மை நிறுவனம் (FEMA) ஐ அனுமதிக்கிறது.
வெள்ளப் பெருக்கால் சிக்கித் தவிக்கும் மக்களை மீட்கவும், ஹெலிகாப்டர்கள், படகுகள், ட்ரோன்கள் மற்றும் கனரக இயந்திரங்களைப் பயன்படுத்தி வெள்ளிக்கிழமை முதல் மீட்புக் குழுவினர் இடைவிடாமல் பணியாற்றி வருகின்றனர். இதுவரை 850க்கும் மேற்பட்டோர் மீட்கப்பட்டுள்ளதாக டெக்சாஸ் பொதுப் பாதுகாப்புத் துறை தெரிவித்துள்ளது.
Readmore: உலகளவில் பிரபலமடைந்த இந்தியாவின் UPI!. இனி இந்த கரீபியன் நாட்டிலும் ஆன்லைன் மூலம் பணம் செலுத்தலாம்!
