தமிழகத்தின் கிராமப்புறங்களில் மிகவும் முக்கியத்துவம் வாய்ந்த காவல் தெய்வம் கருப்பசாமி. சங்கிலி கருப்பு, ஒண்டி கருப்பு, நொண்டி கருப்பு, மலையாள கருப்பு, சின்ன கருப்பு என பல பெயர்களிலும் வடிவங்களிலும் வழிபடப்படும் இவருக்கு, பெரும்பாலான அம்மன் கோவில்களில் காவல் தெய்வமாக தனி சன்னதி அமைக்கப்பட்டிருப்பது சாதாரணமல்ல.
கருப்பசாமி தமிழகம் வந்ததற்கான முக்கியக் காரணம் மதுரை. மதுரையில் அழகர்கோவிலை காவலாக காத்து நிற்கும் பதினெட்டாம் படி கருப்பணசாமி எனும் வடிவமே, தமிழகத்தில் கருப்பசாமி வழிபாட்டுக்கு அடித்தளமாக அமைந்தது. புராண கதைகளின்படி, கேரள அரசன் ஒருவர் திருமாலிருஞ்சோலையில் உள்ள அழகரை தரிசிக்க வந்தார். அழகரின் அழகில் மயங்கி, அவரைத் தம் தேசத்திற்கு கொண்டு செல்ல வேண்டுமென ஆசைப்பட்டார்.
அதற்காக 18 மந்திரவாதிகளை அனுப்பி, அழகரின் சக்தியை “மந்திர-தந்திர” வழியில் கைப்பற்ற கட்டளையிட்டார். அவர்களுக்கு பாதுகாவலனாக வெள்ளை குதிரை மீது ஏறிய கருப்பசாமி வந்தார். அனைவரும் அழகர்மலையை அடைந்தனர். ஆனால், அழகரின் அழகு மற்றும் ஆபரணங்களில் மயங்கிய மந்திரவாதிகள், கருப்பசாமியை மறந்து கருவறை நோக்கிச் சென்றனர்.
இந்த மோசமான முயற்சியை உணர்ந்த பக்தர் ஒருவர் ஊரினரிடம் தகவல் சொல்ல,
மக்கள் அனைவரும் திரண்டு 18 பேரையும் கொன்று, பதினெட்டு படிகளில் புதைத்தனர். அந்த நேரத்தில், கருப்பசாமிக்கு காட்சி தந்த அழகர், “என்னை மற்றும் இம்மலையை காவல் காப்பாயாக” என்று கூறி அருள் வழங்கினார். அன்றிலிருந்து கருப்பசாமி அழகர்மலையை காவலாக காத்து வருகிறார்.
Read more: “இது லேப்டாப் இல்ல.. வெடிகுண்டு” விமானத்தில் பீதியை கிளப்பிய நபர்.. அவசர அவசரமாக தரையிறக்கம்..!!
