‘உள்ளொழுக்கு’ படத்தில் நடித்ததற்காக சிறந்த துணை நடிகைக்கான விருது நடிகை ஊர்வசிக்கு அறிவிக்கப்பட்டது.. இதற்கு பல்வேறு பிரபலங்களும் ஊர்வசிக்கு வாழ்த்து தெரிவித்த நிலையில் நடிகை ஊர்வசி, தேசிய விருது நடுவர்களுக்கு சரமாரி கேள்விகளை முன்வைத்துள்ளார்..
பிரபல செய்தித் தொலைக்காட்சிக்கு அளித்த பேட்டியில் நடிகை ஊர்வசி அடுக்கடுக்கான கேள்விகளையும், தனது அதிருப்தியையும் வெளிப்படுத்தினார். .. குறிப்பாக ‘ஜவான்’ படத்திற்காக ஷாருக்கான் எப்படி சிறந்த நடிகராகத் தேர்ந்தெடுக்கப்பட்டார் என்று நடிகை ஊர்வசி கேள்வி எழுப்பியுள்ளார். மேலும், நடிகர்கள் ஷாருக்கானையும் விஜயராகவனையும் தேர்வு செய்ததற்கான அளவுகோல்கள் என்ன? விஜயராகவன் எப்படி துணை நடிகராகக் குறைக்கப்பட்டார்? என்று கேள்வி எழுப்பினார்..
தேசிய விருது தேர்வு செயல்முறை நிலைத்தன்மையும் நியாயமும் இல்லை என்பதைக் குறிக்கிறது என்று கூறிய அவர், விஜயராகவன் ஒரு மூத்த நடிகர். குறைந்தபட்சம், சிறப்பு ஜூரி பிரிவுக்கு கூட அவர் ஏன் பரிசீலிக்கப்படவில்லை?” என்று கேள்வி எழுப்பினார்..
‘பூக்காலம்’ படத்திற்கான திரைக்குப் பின்னால் நடந்த ஒரு கதையை ஊர்வசி பகிர்ந்து கொண்டார், ஆரம்பத்தில் விஜயராகவனுக்கு ஜோடியாக நடிக்க வாய்ப்பு கிடைத்ததாகவும், ஆனால் தினமும் 9 மணி நேரத்திற்கும் மேலான ஒப்பனை வேலை உட்பட கடுமையான உடல் உழைப்பு காரணமாக அவர் மறுத்துவிட்டதாகவும் தெரிவித்தார். மேலும் “கோடி கோடிகள் கொடுத்தாலும், என்னால் அதைச் செய்ய முடியவில்லை. ஆனால் விஜயராகவன் அதையெல்லாம் தாங்கிக்கொண்டு ஆழ்ந்த அர்ப்பணிப்புடன் நடித்தார்.. அதை எப்படி துணை வேடம் என்று அழைக்க முடியும்?” என்று ஊர்வசி கேள்வி எழுப்பினர்..
சிறந்த நடிகை பிரிவில் தானும் பார்வதியும் போட்டியிட்ட நிலையில், தனது பாத்திரத்தை ‘துணை’ என்று வகைப்படுத்தியதன் பின்னணியில் உள்ள தர்க்கத்தை ஊர்வசி கேள்வி எழுப்பினார். “நடிப்பதற்கு ஏதேனும் நிலையான அளவுகோல் உள்ளதா? அல்லது ஒரு குறிப்பிட்ட வயதிற்குப் பிறகு, இதுதான் உங்களுக்குக் கிடைக்குமா?” என்று அவர் கேள்வி எழுப்பினார்..
இந்த ஆண்டு சிறந்த நடிகைக்கான விருது ஏன் பகிரப்படவில்லை? நெறிமுறை என்ன? ஏதேனும் நிலையான அளவுகோல் உள்ளதா?” என்றும் ஊர்வசி கேள்வி எழுப்பினார்.. தொடர்ந்து பேசிய அவர் “ விருதை அமைதியாக வீட்டிற்கு எடுத்துச் செல்லக்கூடாது.. இது ஓய்வூதியப் பணம் அல்ல. நீங்கள் எனக்கு ஏதாவது கொடுத்தால், அதைப் பெறுவதில் நான் மகிழ்ச்சியடைய வேண்டும். மலையாள சினிமா ஏன் புறக்கணிக்கப்பட்டது என்பதை மத்திய அமைச்சர் சுரேஷ் கோபி விசாரிக்க வேண்டும்..” என்றும் தெரிவித்தார்..
இதனிடையே, கேரள முதல்வர் பினராயி விஜயனும் தி கேரளா ஸ்டோரிக்கு தேசிய விருது கிடைத்ததை விமர்சித்தார். இதுகுறித்து தனது எக்ஸ் பக்கத்தில் பதிவிட்டுள்ள அவர் “கேரளாவின் நற்பெயரை கெடுக்கும் மற்றும் வகுப்புவாத வெறுப்பு விதைகளை விதைக்கும் தெளிவான நோக்கத்துடன் அப்பட்டமான தவறான தகவல்களைப் பரப்பும் ஒரு படத்திற்கு மரியாதை செலுத்துவதன் மூலம், #NationalFilmAwards இன் நடுவர் குழு, சங்க பரிவாரின் பிளவுபடுத்தும் சித்தாந்தத்தில் வேரூன்றிய ஒரு கதைக்கு சட்டப்பூர்வ அங்கீகாரத்தை வழங்கியுள்ளது. வகுப்புவாத சக்திகளுக்கு எதிராக எப்போதும் நல்லிணக்கம் மற்றும் எதிர்ப்பின் கலங்கரை விளக்கமாக நிற்கும் நிலமான கேரளா, இந்த முடிவால் கடுமையாக அவமதிக்கப்பட்டுள்ளது. மலையாளிகள் மட்டுமல்ல, ஜனநாயகத்தில் நம்பிக்கை கொண்ட அனைவரும், உண்மை மற்றும் நாம் விரும்பும் அரசியலமைப்பு மதிப்புகளைப் பாதுகாக்க தங்கள் குரலை எழுப்ப வேண்டும்.” என்று குறிப்பிட்டுள்ளார்..
71வது தேசிய திரைப்பட விருதுகள் வெள்ளிக்கிழமை இரவு அறிவிக்கப்பட்டன. சிறந்த நடிகர் விருதை ஷாருக் கான் மற்றும் விக்ராந்த் மாஸ்ஸி பகிர்ந்து கொண்டனர், அதே நேரத்தில் ராணி முகர்ஜி சிறந்த நடிகை விருதை வென்றார். 12th Fail திரைப்படம் சிறந்த படமாக வென்றது. இந்த ஆண்டு தங்கள் துறையிலிருந்து நல்ல படங்கள் மற்றும் நடிப்பு புறக்கணிக்கப்பட்டதாக மலையாளத் திரையுலகம் குரல் கொடுத்து வருகிறது, ஆடுஜீவிதம் – தி கோட் லைஃப் திரைப்படத்தில் நடித்த பிரித்விராஜ் சுகுமாரனுக்கு அங்கீகாரம் கிடைக்கவில்லை என்று பலரும் கருத்து பதிவிட்டு வருகின்றன…
மலையாள திரையுலகை பொறுத்தவரை, உள்ளொழுக்கு சிறந்த மலையாளப் படமாகவும், 2018 சிறந்த தயாரிப்பு வடிவமைப்பாகவும், பூக்காலம் சிறந்த எடிட்டிங்காகவும் விருதை வென்றது. படத்தில் நடித்ததற்காக விஜயராகவன் சிறந்த துணை நடிகருக்கான விருதை வென்றார் என்பது குறிப்பிடத்தக்கது..
