பாலியல் தொல்லை வழக்கில் கைது செய்யப்பட்டுள்ள சைதன்யானந்த் சரஸ்வதி வழக்கில் புதிய தகவல்கள் வெளியாகியுள்ளன. டெல்லி வசந்த் குஞ்சில் உள்ள அவரது நிறுவன வளாகத்தில் போலீசார் நடத்திய சோதனையின் போது, உலகத் தலைவர்களுடன் மார்பிங் செய்யப்பட்ட படங்கள் இருந்தது கண்டறியப்பட்டுள்ளது.. மேலும் பல ஆட்சேபனைக்குரிய பொருட்களை போலீசார் மீட்டனர்.
விசாரணையின் ஒரு பகுதியாக புதன்கிழமை சர்ச்சை சாமியாரின் இடத்தில் அதிகாரிகள் மீண்டும் சோதனை நடத்தினர்.. அதில் ஒரு பாலியல் பொம்மை, ஆபாச வீடியோக்கள் அடங்கிய ஐந்து சிடிக்கள் மற்றும் உலகத் தலைவர்களுடன் போலி புகைப்படங்கள் உள்ளிட்ட பொருட்களைக் கண்டுபிடித்தனர். கைப்பற்றப்பட்ட போலி படங்களில், முன்னாள் அமெரிக்க ஜனாதிபதி பராக் ஒபாமா மற்றும் முன்னாள் இங்கிலாந்து பிரதமர் டேவிட் கேமரூனுடன் சாமியார் இருப்பதைக் காட்டும் புகைப்படங்களும் அடங்கும்.
தலைமறைவாக இருந்த காலத்தில், அவர் பாகேஷ்வர் மற்றும் அல்மோராவுக்குச் சென்றார் என்றும், அங்கு அவர் சிறிது காலம் தங்கியிருந்தார் என்றும் தகவல்கள் தெரிவிக்கின்றன. மேலும் விசாரணைகளை மேற்கொள்ள காவல் குழுக்கள் அந்த இடங்களை அடைந்துள்ளன. முந்தைய விசாரணைகள் ஏற்கனவே சாமியாரின் மொபைல் போனில் இருந்து அதிர்ச்சியூட்டும் விவரங்களை அம்பலப்படுத்தியுள்ளன, இதில் இளம் பெண்களுடன் பல ஆபாச செய்திகள் அனுப்பியதும் தெரியவந்தது..
பல விமானப் பணிப்பெண்களுடன் அவர் இருக்கும் புகைப்படங்களும், அவரது சாதனத்தில் சேமிக்கப்பட்ட இளம் பெண்களின் மொபைல் டிபிகளின் ஸ்கிரீன்ஷாட்களும் காணப்பட்டன. மேலும் அந்த சாமியார் நேரடியாக உடல் உறவுகளைப் பற்றி விவாதித்த வெளிப்படையான பாலியல் உரையாடல்களையும் போலீசார் மீட்டெடுத்தனர். பல அரட்டைகள் நீக்கப்பட்டன, ஆனால் இப்போது ஆதாரத்திற்காக மீட்டெடுக்கப்படுகின்றன.
ஞாயிற்றுக்கிழமை டெல்லி நீதிமன்றம், அவருக்கு 5 நாட்கள் நீதிமன்றக் காவல் விதித்து உத்தரவிட்டது.. விசாரணையின் போது, சைதன்யானந்த் சரஸ்வதி தெளிவற்ற பதில்களைக் கொடுத்து, அழுத்தத்தின் கீழ் மட்டுமே ஒத்துழைத்ததாகக் கூறப்படுகிறது. எனினும் ஒவ்வொரு சுற்று விசாரணையும் மேலும் திடுக்கிடும் வெளிப்பாடுகளுக்கு வழிவகுத்தது, இது அவரது நடவடிக்கைகள் குறித்த விசாரணையை மேலும் தீவிரப்படுத்தியது.
முன்னதாக, சைதன்யானந்த் பல பெண்களுக்கு அனுப்பியதாகக் கூறப்படும் வாட்ஸ்அப் செய்திகளின் ஸ்கிரீன்ஷாட்கள் வெளியானது.. அந்த அரட்டைகளில், சைதன்யானந்தா ஒரு பெண்ணை தனது “அன்பான குழந்தை பொம்மை ” என்று அழைத்ததாகக் கூறப்படுகிறது. மேலும் மாணவிகளுடான உரையாடல்களில் ஆண்களுடன் உடலுறவு வைத்துள்ளீர்களா, அவர்கள் காண்டம் பயன்படுத்தி இருக்கிறார்களா என்பது போன்ற கேள்விகளையும் அவர் கேட்டதும் அம்பலமானது..
