மிக்ஜாம் புயல் வெள்ளத்தால் பாதிக்கப்பட்ட வெளிமாவட்டத்தை சேர்ந்தவர்களும் 6,000 ரூபாய் நிவாரண தொகை பெறலாம் என அறிவிக்கப்பட்டுள்ளது.
மிக்ஜாம் புயல் காரணமாக சென்னை, செங்கல்பட்டு, காஞ்சிபுரம், திருவள்ளூரில் பெரும்பாலான கடலோர பகுதிகளிலும் வெள்ள பாதிப்பு அதிகமாக ஏற்பட்டது. இதனால் அப்பகுதியில் வசித்து வந்தோர் பெரிதாக பாதிக்கப்பட்டனர். இன்னும் புறநகரில் சில பகுதிகளில் மழைநீர் தேங்கி நிற்கிறது. அதனை வெளியேற்றும் பணிகளும் நடைபெற்று வருகிறது.
மழை வெள்ளத்தால் பாதிக்கப்பட்ட மக்களுக்கு முதல்வர் மு.க.ஸ்டாலின் அரசு சார்பில் நிவாரண தொகையை அறிவித்தார். சென்னை அனைத்து ரேஷன் அட்டைதாரர்களுக்கும், திருவள்ளூர், செங்கல்பட்டு, காஞ்சிபுரம் மாவட்டத்தில் வெள்ளத்தால் பாதிக்கப்பட்ட பகுதியைச் சேர்ந்தவர்களுக்கும் ரூ.6,000 நிவாரண தொகை வழங்கப்படும் என அறிவிக்கப்பட்டது.
இதனால், மேற்குறிப்பிட்ட 4 மாவட்டங்களில் ரேஷன் கார்டு வைத்து இருப்பவர்களுக்கு மட்டுமே நிவாரணத் தொகை வழங்கப்படும் என்றும், வெளிமாவட்டத்தை சேர்ந்தவர்கள் எப்படி விண்ணப்பிப்பது என்ற கேள்வியும் எழுந்தது. இந்நிலையில், வெளிமாவட்டத்தை சேர்ந்தவர்களும் 6,000 ரூபாய் நிவாரண தொகை வாங்க ஏற்பாடு செய்யப்பட்டுள்ளது.
வெளிமாவட்டத்தினர் என்ன செய்ய வேண்டும்..?
— தாங்கள் தங்கியிருக்கும் பகுதிக்கு அருகில் உள்ள ரேஷன் கடையில் நிவாரணத் தொகை விண்ணப்பம் பெற்றுக்கொள்ள வேண்டும்.
— அந்த விண்ணப்பத்தில் பெயர், தற்போது உள்ள முகவரி, ரேஷன் கடை எண் ஆகியவை நிரப்ப வேண்டும்.
— நிரப்பிய விண்ணப்பத்தை ரேஷன் கடையில் சமர்ப்பிக்க வேண்டும்.
— பிறகு அரசு அதிகாரிகள் தற்போது தங்கியுள்ள வீட்டிற்கு வந்து நேரில் ஆய்வு செய்வர்.
— பின்னர் 6,000 ரூபாய் நிவாரணத் தொகை வழங்கப்படும்.
