தமிழ்நாட்டில் இன்று (டிசம்பர் 1) முதல், சொந்தப் பயன்பாட்டிற்காக வாங்கப்படும் புதிய இரு சக்கர மற்றும் 4 சக்கர வாகனங்களைப் பதிவு செய்வதற்காக, அவற்றை வட்டாரப் போக்குவரத்து அலுவலகங்களுக்கோ (RTO) அல்லது யூனிட் அலுவலகங்களுக்கோ நேரில் கொண்டு வர வேண்டியதில்லை என்ற புதிய நடைமுறை அமலுக்கு வந்துள்ளது.
தமிழ்நாடு முழுவதும் சுமார் 150-க்கும் மேற்பட்ட வட்டாரப் போக்குவரத்து அலுவலகங்கள் செயல்பட்டு வருகின்றன. இங்கே ஓட்டுநர் உரிமம், வாகனப் பதிவு, சாலை வரி செலுத்துதல் போன்ற பணிகள் செய்யப்பட்டு வருகின்றன. பொதுவாக, புதிய இரு சக்கர வாகனம் அல்லது கார் வாங்கிய பிறகு, அதை வாகன டீலர்கள் அல்லது உரிமையாளர்களே தங்கள் முகவரிக்குட்பட்ட ஆர்.டி.ஓ. அலுவலகத்திற்கு நேரில் கொண்டு சென்று ஆய்வு செய்த பின்னரே பதிவு செய்ய வேண்டியிருந்தது.
தமிழ்நாடு முழுவதும் ஒரு நாளைக்குச் சராசரியாக 8 ஆயிரத்திற்கும் மேற்பட்ட வாகனங்கள் பதிவு செய்யப்படும் நிலையில், இதில் சொந்தப் பயன்பாட்டிற்கான வாகனங்கள் மட்டும் சுமார் 4 ஆயிரம் வரை உள்ளன. இந்த பழைய நடைமுறையால், டீலர்கள் தனி கட்டணம் வசூலிப்பதும், பொதுமக்களுக்குக் கால விரயம் ஏற்படுவதும் வாடிக்கையாக இருந்தது.
மத்திய மோட்டார் வாகனச் சட்டத்தின் புதிய திருத்தத்தில், சொந்தப் பயன்பாட்டு வாகனப் பதிவின்போது அவற்றை ஆர்.டி.ஓ. அலுவலகத்திற்கு நேரில் கொண்டு செல்லத் தேவையில்லை என்று விலக்கு அளிக்கப்பட்டிருந்தது. ஆனால், இந்த நடைமுறை தமிழகத்தில் இதுவரை அமல்படுத்தப்படாமல் இருந்தது.
இந்நிலையில், ஆட்டோமொபைல் டீலர்கள் சங்கம் தொடர்ந்த வழக்கில், இந்தச் சட்டத் திருத்தத்தை உடனடியாக அமல்படுத்த வேண்டும் என்று தமிழக அரசுக்குச் சென்னை உயர் நீதிமன்றம் உத்தரவிட்டது.
உயர் நீதிமன்றத்தின் உத்தரவைத் தொடர்ந்து, சொந்தப் பயன்பாட்டிற்கான இரு சக்கர வாகனங்கள், கார்கள் உள்ளிட்ட புதிய வாகனங்களைப் பதிவு செய்ய, இனி அவற்றை வட்டாரப் போக்குவரத்து அலுவலகத்திற்கோ, பகுதி அலுவலகத்திற்கோ நேரில் கொண்டு வரத் தேவையில்லை.
இந்த முக்கியமான புதிய உத்தரவை இன்று (டிசம்பர் 1) முதல் அமல்படுத்த வேண்டும் என அனைத்து வட்டாரப் போக்குவரத்து அலுவலகங்களுக்கும் தமிழகப் போக்குவரத்துத் துறை ஆணையர் கஜலட்சுமி உத்தரவிட்டுள்ளார். இந்த நடைமுறை மாற்றம், சொந்த வாகனம் வாங்கும் ஆயிரக்கணக்கானோருக்குப் பெரும் நிம்மதியை அளித்துள்ளது.
