டிடிவி தினகரனின் அம்மா மக்கள் முன்னேற்றக் கழகம் கட்சியில் இருந்து நிர்வாகிகள் அடுத்தடுத்து விலகி, மீண்டும் தங்கள் தாய் கழகமான அ.தி.மு.க-வில் இணைந்து வருவது தமிழக அரசியலில் கவனத்தை ஈர்த்துள்ளது. அந்த வகையில், அ.ம.மு.க-வில் முக்கியப் பொறுப்பு வகித்த மதுரை வடக்கு மாவட்ட அண்ணா தொழிற்சங்கச் செயலாளர் ஆர். சுரேஷ் அ.தி.மு.கவில் தன்னை இணைத்துக் கொண்டார். அதிமுக-வின் அமைப்புச் செயலாளர் ராஜன் செல்லப்பா முன்னிலையில் அவர் மீண்டும் கட்சியில் இணைந்தார்.
முன்னாள் முதல்வர் ஜெயலலிதாவின் மறைவுக்குப் பிறகு, அதிமுகவில் ஏற்பட்ட பிளவின்போது டிடிவி தினகரனின் தலைமைக்கு ஆதரவாகப் பிரிந்து சென்றவர்கள் அ.ம.மு.க-வில் இணைந்தனர். எனினும், சமீப காலமாக அக்கட்சியில் எதிர்பார்த்த வளர்ச்சி இல்லாததாலும், அ.தி.மு.க வலுப்பெற்று வருவதாலும் பல நிர்வாகிகள் மீண்டும் தாய் கழகத்திற்கே திரும்பத் தொடங்கியுள்ளனர்.
தொடர்ந்து நிர்வாகிகள் அமமுக-விலிருந்து விலகிச் செல்வது குறித்து அக்கட்சியின் பொதுச்செயலாளர் டி.டி.வி. தினகரன் ஏற்கனவே தனது கருத்தைத் தெரிவித்திருந்தார். அவர் இதுகுறித்து வெளிப்படையாகப் பேசுகையில், “விசுவாசம் இல்லாதவர்கள் மட்டுமே கட்சி மாறிச் செல்கிறார்கள்” என்று சாடியிருந்தார்.
குறிப்பாக, தென் மாவட்டங்களில் உள்ள அ.ம.மு.க-வின் இரண்டாம் கட்ட நிர்வாகிகள் பலர் அ.தி.மு.க-வுக்குத் திரும்புவது, வரும் காலத் தேர்தல்களில் இந்த இரண்டு கட்சிகளுக்கு இடையே நிலவும் வாக்கு வங்கியில் மாற்றங்களை ஏற்படுத்தக்கூடும் என அரசியல் விமர்சகர்கள் கருதுகின்றனர்.
