காஞ்சிபுரம் என்றாலே தமிழ்நாட்டின் ஆன்மிக வரலாற்றில் தனி இடம் உண்டு. எண்ணற்ற சிவத் தலங்கள், வைணவ திவ்ய தேசங்கள், சக்தி வழிபாட்டு மையங்கள் என ஆன்மிகத்தின் பல்வேறு பரிமாணங்கள் ஒருங்கே செறிந்த நகர் இது. இந்தப் புனித மண்ணில், கைலாசநாதர் சமேத கனகாம்பிகை தாயார் திருக்கோவில் தனித்துவமான ஆன்மிக மகிமையுடன் விளங்குவது மறுக்க முடியாத உண்மை.
இந்தத் தலத்தின் சிறப்பே, புராண வரலாறும் இயற்கை அமைப்பும் ஆன்மிக நம்பிக்கையும் ஒன்றிணைந்திருப்பதுதான். புராணங்களின் படி, ஈசன் பூலோக அழகை காண வந்தபோது நத்தம் எனும் ஊரில் தங்கியதாகவும், பாலாற்றின் நடுவே அமைந்த மலைப்பகுதியில் தபஸ் செய்ததாகவும் சொல்லப்படுகிறது. அப்போது மழை பொழிந்த வேளையில், ஈசனை நனைக்காதபடி ஒரு பசுமாடு காவல் நின்றதாம். அதனுடன், ராஜநாகமும் தன்னை குடையாக விரித்து, இறைவனை காத்ததாகப் புராணம் கூறுகிறது.
பக்தியின் உச்சமாக விளங்கிய இந்த இரு உயிர்களின் அன்பை உணர்ந்த சிவபெருமான், “இத்தலத்தில் நான் குடியிருந்து பக்தர்களின் வேண்டுதல்களை நிறைவேற்றுவேன்” என வரம் அருளியதாக நம்பப்படுகிறது. அதன் தொடர்ச்சியாக, கைலாசத்திலிருந்து லிங்க வடிவில் வெளிப்பட்டு, கைலாசநாதராக இத்தலத்தில் அருள்பாலிக்கிறார்.
சுமார் ஐந்து அடி உயரத்தில் பத்மபீடத்தில் எழுந்தருளிய சிவலிங்கம், தன்னருகே கருணை முகம் கொண்ட கனகாம்பிகை தாயாருடன் பக்தர்களுக்கு அருள் வழங்குகிறது. தாய் – தந்தை என இரட்டை அருளின் சங்கமமாக இத்தலம் விளங்குகிறது. விநாயகர், நவகிரகங்கள், சண்டிகேஸ்வரர், வள்ளி–தெய்வானை சமேத முருகப்பெருமான், தக்ஷிணாமூர்த்தி ஆகிய திருவுருவங்கள் கோவிலின் ஆன்மிக வட்டத்தை மேலும் விரியச் செய்கின்றன.
இந்தக் கோவிலின் வழிபாட்டு மரபிலும் தனிச்சிறப்பு இல்லை என்று சொல்ல முடியாது. பங்குனி உத்திரத் திருவிழா இத்தலத்தின் முக்கிய விழாவாகக் கருதப்படுகிறது. அந்நாளில் தரிசனம் செய்தால் திருமணத் தடைகள் நீங்கும், குடும்ப வாழ்வு அமைதியாக அமையும் என்ற ஆழ்ந்த நம்பிக்கை பக்தர்களிடையே நிலவுகிறது. அதேபோல், சிவராத்திரி நான்கு கால பூஜைகள், பிரதோஷ வழிபாடு, அன்னாபிஷேகம் போன்ற வழிபாடுகள் தொடர்ந்து நடைபெற்று வருகின்றன.
தலவிருட்சமாக விளங்கும் வில்வமரம், சிவ வழிபாட்டின் அடையாளமாகவும், ஆன்மிக சக்தியின் பிரதிபலிப்பாகவும் பார்க்கப்படுகிறது. மேலும், நீரின் மேல் அமைந்துள்ள தக்ஷிணாமூர்த்தி சன்னதி, குரு அருளை நாடி வரும் பக்தர்களுக்கு தனிப்பட்ட புண்ணிய மையமாக விளங்குகிறது.
Read more: திருமணம் தாமதம் முதல் சொத்து பிரச்சனை வரை.. வாழ்க்கை சிக்கல்களுக்கு பரிகாரம் சொல்லும் ஓலைச்சுவடி..!!
