பிரபல ஜோதிடர் ஷெல்வி, ஜனவரி 15ஆம் தேதி முதல் இந்த ஆண்டின் இறுதி வரை (டிசம்பர் 31, 2026) 12 ராசிகளுக்கான விரிவான பலன்களை கணித்துள்ளார். கிரக நிலைகளின் அடிப்படையில் அமையும் இந்தப் பலன்கள், ஒவ்வொரு ராசியினருக்கும் வரவிருக்கும் மாற்றங்கள் மற்றும் மேற்கொள்ள வேண்டிய முன்னெச்சரிக்கை நடவடிக்கைகளை தெளிவாக விளக்குகின்றன.
மேஷம் : மேஷ ராசியினருக்கு இது நன்மைகள் துளிர்க்கும் காலம். அலுவலக சூழலில் உங்களுக்குச் சாதகமான மாற்றங்கள் நிகழும்; மேலதிகாரிகளின் பாராட்டு உங்கள் உற்சாகத்தை அதிகரிக்கும். குடும்பத்தில் நீண்ட நாள் எதிர்பார்த்த சுப நிகழ்ச்சிகள் அரங்கேறும். என்றாலும், பணப் பரிமாற்றங்களில் அதீத எச்சரிக்கை தேவை. உங்கள் குடும்ப ரகசியங்களை வெளியில் பகிர்வதைத் தவிர்க்கவும். அரசியலில் உள்ளவர்களுக்குப் புதிய பதவிகளும், கலைஞர்களுக்குப் புதிய வாய்ப்புகளும் தேடி வரும். ஆரோக்கியத்தில் முதுகு மற்றும் இடுப்புப் பகுதியில் கவனம் செலுத்துவது அவசியம். அனுமன் வழிபாடு உங்களுக்கு மனவலிமையைத் தரும்.
ரிஷபம் : தன்னம்பிக்கை மிளிரும் காலகட்டமாக இது ரிஷப ராசியினருக்கு அமையப்போகிறது. உங்கள் தனித்திறமைகள் பணியிடத்தில் அங்கீகரிக்கப்படும். கோபத்தைக் குறைத்துக்கொண்டால் குடும்பத்தில் அமைதி நிலவும். பிள்ளைகளால் பெருமைமிக்க செய்திகள் வந்து சேரும். ஆடை, ஆபரணச் சேர்க்கைக்கு வாய்ப்புண்டு. அரசு மற்றும் அரசியல் துறையில் இருப்பவர்கள் புகழின் உச்சிக்குச் செல்வார்கள். வாகனப் பயணங்களில் வேகம் தவிர்ப்பது நல்லது. குருவாயூரப்பன் வழிபாடு உங்கள் வாழ்வில் குதூகலத்தை நிறைக்கும்.
மிதுனம் : மிதுன ராசியினருக்கு இதுநாள் வரை இருந்த தேக்க நிலைகள் நீங்கி, வேகம் பிறக்கப்போகிறது. அலுவலகத்தில் கூடுதல் பொறுப்புகள் வந்து சேரும். வரவுக்கும் செலவுக்கும் சரியான திட்டமிடல் அவசியம். குடும்ப விவகாரங்களில் வெளிநபர்களின் தலையீட்டை துண்டிப்பது நல்லது. சுப காரியங்களுக்கான செலவுகள் அதிகரிக்கும். கலைஞர்கள் தங்கள் திறமைக்கு ஏற்ற அங்கீகாரத்தை பெறுவார்கள். நரம்பு தொடர்பான உபாதைகள் வந்து நீங்கும். சிவபெருமானை வணங்குவது உங்கள் காரிய வெற்றிகளுக்குத் துணை நிற்கும்.
கடகம் : கடக ராசியினருக்கு அதிர்ஷ்ட காற்று வீசும் நேரமிது. புதிய வேலை வாய்ப்புகள் மற்றும் பதவி உயர்வுக்கான அறிகுறிகள் தென்படும். கணவன் – மனைவி இடையே நிலவும் சிறு கருத்து வேறுபாடுகளை பேசி தீர்த்துக்கொள்வது நல்லது. உறவினர்களால் ஆதாயம் உண்டாகும். தொழில் ரீதியான ஒப்பந்தங்களில் கையெழுத்திடும்போது சட்ட நுணுக்கங்களை கவனிப்பது அவசியம். அரசியல்வாதிகள் அமைதி காப்பது உசிதம். ஆரோக்கியத்தில் மூட்டு மற்றும் நரம்புப் பிரச்சனைகள் வரலாம். பார்வதி தேவியின் வழிபாடு உங்களுக்கு பாதுகாப்பு அளிக்கும்.
சிம்மம் : நிதானமாக செயல்பட வேண்டிய காலகட்டத்தில் சிம்ம ராசியினர் இருக்கிறீர்கள். பணியிடத்தில் தேவையற்ற விவாதங்களை தவிர்த்து, உங்கள் வேலையில் மட்டும் கவனம் செலுத்துங்கள். வார்த்தைகளில் நிதானம் காப்பது உங்கள் மதிப்பைக் கூட்டும். வாரிசுகளின் திருமண வாழ்க்கை தொடர்பாக நல்ல செய்திகள் வரும். அரசியலில் இருப்பவர்கள் கையெழுத்திடும் முன் ஆவணங்களை இருமுறை சரிபார்ப்பது நல்லது. அஜீரணக் கோளாறுகள் ஏற்பட வாய்ப்புள்ளதால் உணவில் கட்டுப்பாடு தேவை. பைரவர் வழிபாடு உங்கள் தடைகளைத் தகர்க்கும்.
கன்னி : கன்னி ராசியினருக்குத் திட்டமிட்டு செயல்பட்டால் வெற்றி நிச்சயம். வெளிநாட்டுப் பயணம் அல்லது வெளிநாட்டு நிறுவனத் தொடர்புகள் மூலம் நல்ல ஆதாயம் கிடைக்கும். குடும்பத்தில் நிலவிய குழப்பங்கள் மறைந்து அமைதி திரும்பும். உறவுகளிடம் பிடிவாதம் பிடிக்காமல் விட்டுக்கொடுத்துச் செல்வது நலம் தரும். தொழில் ரீதியாக எடுக்கும் புதிய முயற்சிகளுக்கு நல்ல வரவேற்பு கிடைக்கும். கலைஞர்களுக்குக் கடின உழைப்புக்குரிய பலன் உண்டு. அண்ணாமலையாரை வழிபடுவது உங்களுக்குத் தெளிவான பாதையைக் காட்டும்.
துலாம் : உங்கள் எண்ணங்கள் ஈடேறப்போகும் காலகட்டம் இது. அலுவலகத்தில் உங்கள் திறமை வெளிப்பட்டு, உயர் பதவிகளுக்கான கதவுகள் திறக்கும். குடும்பத்தில் மகிழ்ச்சியான சூழல் நிலவும். பழைய கடன்களைத் திருப்பிச் செலுத்த நல்ல வழி பிறக்கும். பங்குச்சந்தை மற்றும் வர்த்தகத்தில் லாபம் அதிகரிக்கும். அரசியல்வாதிகளுக்குச் சாதகமான சூழல் இருக்கும். கலைஞர்கள் எதிர்பாலினத்தவரிடம் எச்சரிக்கையாகப் பழகுவது நல்லது. இஷ்ட தெய்வ வழிபாடு உங்கள் வாழ்வை இனிமையாக்கும்.
விருச்சிகம் : விருச்சிக ராசியினர் எதிலும் பொறுப்புணர்வுடன் செயல்பட வேண்டியது அவசியம். அலுவலகக் கோப்புகளைக் கையாளுவதில் கூடுதல் கவனம் தேவை. நீண்ட நாள் நிலுவையில் இருந்த பணவரவுகள் கைக்கு வந்து சேரும். குடும்பத்தில் வாழ்க்கைத் துணையின் உடல்நலத்தில் சிறு அக்கறை காட்டுவது நல்லது. தொழிலில் சீரான வளர்ச்சி இருக்கும். அரசியலில் உள்ளவர்கள் பொது மேடைகளில் பேசும்போது நிதானம் காக்கவும். முருகப்பெருமானை வழிபடுவது உங்களுக்குத் தைரியத்தையும் வெற்றியையும் தரும்.
தனுசு : தனுசு ராசியினருக்கு நன்மைகள் தேடி வரும் காலமாக இது அமையும். அலுவலகத்தில் இடமாற்றம் ஏற்பட்டால் அதைத் தயக்கமின்றி ஏற்றுக்கொள்ளுங்கள். அது உங்களின் உயர்வுக்கே வழிவகுக்கும். குடும்பத்தில் சுப காரியங்கள் அடுத்தடுத்து நிகழும். ஆடம்பரச் செலவுகளைக் குறைத்துச் சேமிப்பில் ஆர்வம் காட்டுங்கள். அரசியலில் உள்ளவர்களுக்கு இது ஏறுமுகமான காலம். கலைஞர்கள் சோம்பலைத் தவிர்த்து உழைத்தால் மட்டுமே வெற்றி பெற முடியும். காளியம்மன் வழிபாடு உங்கள் மனக்குறைகளைத் தீர்க்கும்.
மகரம் : மகர ராசியினருக்குப் பல வழிகளில் மேன்மைகள் வந்து சேரும். பணியிடத்தில் பதவி உயர்வு அல்லது ஊதிய உயர்வுக்கான வாய்ப்புகள் மிக அருகிலேயே உள்ளன. பழைய கசப்பான நினைவுகளைப் பேசிக் குடும்ப அமைதியைக் குலைக்க வேண்டாம். தொழிலில் நேரடியாகக் கவனம் செலுத்துவது லாபத்தை இரட்டிப்பாக்கும். வாகனங்களைச் சரியான நேரத்தில் பழுதுபார்ப்பது தேவையற்ற செலவுகளைத் தவிர்க்கும். விநாயகப் பெருமானை வழிபடுவது உங்களுக்கு அனைத்துத் திசைகளிலும் நன்மைகளைத் தரும்.
கும்பம் : இதுவரை இருந்து வந்த மனக்கவலைகளும் சங்கடங்களும் குறையப்போகும் காலகட்டம் இது. அலுவலகத்தில் உங்கள் பேச்சுக்கு மதிப்பு கூடும்; புதிய பொறுப்புகள் தேடி வரும். தம்பதியரிடையே அன்யோன்யம் அதிகரிக்கும். பிள்ளைச் செல்வம் வேண்டுவோருக்கு நற்செய்தி கிடைக்கும். தொழிலில் முழு கவனத்தைச் செலுத்தினால் மட்டுமே போட்டி நிறுவனங்களைச் சமாளிக்க முடியும். கலைஞர்களின் நீண்ட நாள் கனவுகள் நனவாகும். சண்முகப் பெருமானின் வழிபாடு உங்கள் வாழ்வில் மகிழ்ச்சியை நிலைநாட்டும்.
மீனம் : சுமுகமான போக்கை எதிர்பார்க்கும் மீன ராசியினருக்கு, சமூகம் மற்றும் உறவினர்கள் மத்தியில் செல்வாக்கு அதிகரிக்கும். மற்றவர்களின் தனிப்பட்ட விவகாரங்களில் தலையிடாமல் இருப்பது உங்கள் நற்பெயரைக் காக்கும். பண விவகாரங்களில் நிதானம் தேவை. அதிக வட்டிக்குக் கடன் வாங்குவதைத் தவிர்க்கவும். அரசியலில் உள்ளவர்களுக்கு மக்கள் ஆதரவு பெருகும். இரவு நேரப் பயணங்களைத் தவிர்ப்பது விபத்துகளிலிருந்து காக்கும். பார்வதி தேவியின் வழிபாடு உங்களுக்கு மங்கலமான நன்மைகளை தரும்.
Read More : இந்த பொங்கல் தினத்தில் இந்த 5 பொருட்களை தானம் செய்தால், வறுமை நீங்கும், அதிர்ஷ்டத்தை கொண்டு வரும்!
