தற்போதைய அளவில் எரிபொருள் (எண்ணெய், நிலக்கரி, இயற்கை எரிவாயு) பயன்பாடு தொடர்ந்தால், இந்த நூற்றாண்டின் நடுப்பகுதிக்குள் உலக மக்கள்தொகையில் 50% பேர் கடுமையான வெப்பநிலை சூழலில் வாழ நேரிடும் என ஆக்ஸ்ஃபோர்டு பல்கலைக்கழகம் வெளியிட்ட புதிய ஆய்வு தெரிவிக்கிறது.
அபாயகரமான அளவிலான வெப்பத்தை எதிர்கொள்ளும் மக்களின் விகிதம் 2010 ஆம் ஆண்டில் இருந்த 23 சதவீதத்திலிருந்து, 2050 ஆம் ஆண்டுக்குள் 41 சதவீதமாக இரட்டிப்பு அளவுக்கு உயரக்கூடும் என்றும் அந்த ஆய்வு தெரிவித்துள்ளது. இதனால் சுமார் 3.79 பில்லியன் மக்கள் ஆபத்துக்கு உள்ளாகலாம்.
2 டிகிரி செல்சியஸ் வெப்ப உயர்வு – பெரும் அபாயம்
Nature Sustainability என்ற அறிவியல் இதழில் வெளியான இந்த ஆய்வு, தொழில்துறை புரட்சி காலத்துக்கு முந்தைய காலத்துடன் ஒப்பிடும்போது, உலக சராசரி வெப்பநிலை 2 டிகிரி செல்சியஸ் உயர்ந்தால் என்ன நடக்கும் என்பதைக் கணக்கில் கொண்டு தயாரிக்கப்பட்டது. எண்ணெய், நிலக்கரி மற்றும் எரிவாயு பயன்பாடு இப்படியே தொடர்ந்தால், இன்னும் 25 ஆண்டுகளுக்குள் இந்த 2 டிகிரி செல்சியஸ் வரம்பை உலகம் எட்டக்கூடும் என்று காலநிலை விஞ்ஞானிகள் தெரிவித்துள்ளனர்..
2010 ஆம் ஆண்டில் சுமார் 1.54 பில்லியன் மக்கள் கடும் வெப்பம் நிலவும் பகுதிகளில் வாழ்ந்து வந்தனர். ஆனால் நூற்றாண்டின் நடுப்பகுதியில் இந்த எண்ணிக்கை மிக அதிகமாக உயரும். இதில் அதிக பாதிப்பு வெப்ப மற்றும் துணை வெப்ப மண்டல நாடுகளுக்கு (tropics & subtropics) ஏற்படும்.
அதிக மக்கள் வாழும் பகுதிகளே அதிக வெப்பம்
இந்த ஆய்வின் முதன்மை ஆசிரியரும் ஆக்ஸ்ஃபோர்டு பல்கலைக்கழக பொறியியல் அறிவியல் துறை இணைப் பேராசிரியருமான டாக்டர் ஜீசஸ் லிசானா கூறுகையில், தேசிய சராசரி வெப்பநிலைக்கும் மக்கள் உண்மையில் வசிக்கும் இடங்களின் வெப்பநிலைக்கும் இடையே பெரும் இடைவெளி இருப்பதாக சுட்டிக்காட்டினார்.
“இந்தியா, நைஜீரியா, இந்தோனேஷியா, பங்களாதேஷ், பாகிஸ்தான் மற்றும் பிலிப்பைன்ஸ் ஆகிய நாடுகளில் மிக அதிகமான மக்கள் கடும் வெப்ப சூழலில் வாழ நேரிடும். இங்கு ‘கூலிங் டிகிரி டேஸ்’ (Cooling Degree Days – CDD) 3000-ஐ தாண்டும் பகுதிகளில் மக்கள் அதிகம் வசிக்கிறார்கள்,” என்று அவர் கூறினார்.
கூலிங் டிகிரி டேஸ் (CDD) என்றால் என்ன?
CDD என்பது ஒரு காலநிலை அளவுகோல். ஒரு இடத்தில் பாதுகாப்பான உட்புற வெப்பநிலையை பராமரிக்க எவ்வளவு மின்சாரம் தேவைப்படும் என்பதை இது கணக்கிடுகிறது. CDD அதிகரித்தால், ஏர் கண்டிஷனர் போன்ற குளிரூட்டும் சாதனங்களின் தேவை அதிகரிக்கும் என்பதைக் குறிக்கும். இந்த ஆய்வின் படி, 1 டிகிரி செல்சியஸ் உலகம் (2006–2016 காலகட்டம்) மற்றும் 2 டிகிரி செல்சியஸ் உலகம் ஆகியவற்றை ஒப்பிட்டால்:
நைஜீரியா: 16% அதிகரிக்கும்
பிரேசில்: 20% அதிகரிக்கும்
உகாண்டா மற்றும் லாவோஸ்: சுமார் 25% அதிகரிக்கும்
குளிர் பகுதிகள் குறையும், சமத்துவமின்மை உயரும்
இந்த ஆய்வு இன்னொரு முக்கிய விஷயத்தையும் சொல்கிறது. உலகம் வெப்பமடையும்போது, மிகக் குளிரான பகுதிகளில் வாழும் மக்களின் விகிதம் 14% இலிருந்து 7% ஆகக் குறையும்.
இதன் விளைவுகள் சமமாக இருக்காது. மத்திய ஆப்பிரிக்க குடியரசு, நைஜீரியா, தென் சூடான், லாவோஸ் மற்றும் பிரேசில் போன்ற நாடுகளில் ஒருவருக்கு தேவையான குளிரூட்டல் தேவை மிக அதிகமாக உயரும். ஆனால் கனடா, ரஷ்யா, ஃபின்லாந்து, ஸ்வீடன் மற்றும் நார்வே போன்ற நாடுகளில் வெப்பமூட்டும் (heating) தேவைகள் குறையும்.
இதனால், ஏற்கனவே வசதி குறைந்த நாடுகள் அதிக மின்சார தேவையைச் சந்திக்க வேண்டியிருக்கும். ஆனால் செல்வந்தமான வடக்கு நாடுகள் இதனால் பலன் அடையும் நிலை உருவாகும்.
1.5 டிகிரி செல்சியஸ் வரம்புக்குள் கூட பெரும் மாற்றங்கள்
“குளிர்ச்சியூட்டும் மற்றும் வெப்பமூட்டும் தேவைகளில் ஏற்படும் பெரும்பாலான மாற்றங்கள், 1.5 டிகிரி செல்சியஸ் வரம்பை எட்டுவதற்கு முன்பே நிகழ்கின்றன. அதனால், விரைவில் ஏற்படும் மாற்றங்களுக்கு முன்கூட்டியே தழுவல் நடவடிக்கைகள் தேவை,” என்று டாக்டர் லிசானா தெரிவித்தார்.
உதாரணமாக, அடுத்த 5 ஆண்டுகளுக்குள் பல வீடுகளில் ஏர் கண்டிஷனர் பொருத்த வேண்டிய நிலை வரும். ஆனால் உலக வெப்பநிலை 2 டிகிரி செல்சியஸ் வரை உயர்ந்தால், அதன் தாக்கம் அதற்குப் பிறகும் தொடரும்.
வடக்கு நாடுகளும் தப்ப முடியாது
வெப்ப மண்டல நாடுகளுக்கு அதிக பாதிப்பு இருந்தாலும், குளிர் நாடுகளும் பாதுகாப்பாக இல்லை. 1 டிகிரி செல்சியஸ் இருந்து 2 டிகிரி செல்சியஸ் வரை வெப்பம் உயர்ந்தால்:
ஆஸ்திரியா, கனடா: CDD 100% அதிகரிக்கும்
ஐக்கிய இராச்சியம், ஸ்வீடன், ஃபின்லாந்து: 150% வரை அதிகரிக்கும்
நார்வே: 200%
அயர்லாந்து: 230% வரை அதிகரிக்கும்
இந்த நாடுகளில் உள்ள கட்டிடங்கள் குளிரை தடுக்க வடிவமைக்கப்பட்டவை. வெப்பத்தை வெளியேற்ற ஏற்றதாக இல்லாததால், சிறிய வெப்ப உயர்வே பெரிய பாதிப்பை ஏற்படுத்தும் என்று ஆய்வாளர்கள் எச்சரிக்கின்றனர்.
ஆக்ஸ்ஃபோர்டு மார்டின் Future of Cooling Programme தலைவர் டாக்டர் ராதிகா கோஸ்லா பேசிய போது “ “1.5 டிகிரி செல்சியஸ் வரம்பை தாண்டுவது கல்வி, சுகாதாரம், குடியேற்றம், விவசாயம் என அனைத்திலும் முன்னெப்போதும் இல்லாத தாக்கத்தை ஏற்படுத்தும்,” என்றார்.
“நெட்-சீரோ” (net zero) நிலைத்த வளர்ச்சிதான் இந்த போக்கை மாற்றக்கூடிய ஒரே பாதை என்றும், அரசியல்வாதிகள் இதில் உடனடியாக நடவடிக்கை எடுக்க வேண்டும் என்றும் அவர் வலியுறுத்தினார்.
இந்த ஆய்வில் ஈடுபடாத இயற்கை பாதுகாப்பு அமைப்பான The Nature Conservancy-யின் டாக்டர் லூக் பார்சன்ஸ் பேசிய போது “இந்த ஆய்வு மாற்றங்கள் வேகமாக அதிகரித்து வருவதை காட்டுகிறது. காலநிலை மாற்றத்தின் பாதிப்புகளை நாம் இந்த நூற்றாண்டின் இறுதியில் மட்டுமல்ல, இப்போதே அனுபவிக்க ஆரம்பித்துவிட்டோம்,” என்றார்.
மேலும், “குறைந்த வருமான நாடுகளே அதிக பாதிப்பைச் சந்திக்கின்றன. இது ஒரு சமூக நீதி பிரச்சினையாகவும் உள்ளது,” என்றும் அவர் கூறினார்.
நடவடிக்கைக்கான தரவுகள்
ஆய்வாளர்கள், ஐரோப்பிய வானிலை மையம் உருவாக்கிய HadAM4 காலநிலை மாதிரியை பயன்படுத்தி இந்த கணிப்புகளை செய்துள்ளனர். இதன் மூலம் வெவ்வேறு வெப்ப உயர்வு நிலைகளுக்கான உயர்தர வரைபடங்கள் தயாரிக்கப்பட்டன.
மேலும், 60 கிலோமீட்டர் தீர்மானத்தில் உலகளாவிய வெப்பமூட்டும் மற்றும் குளிர்ச்சியூட்டும் தேவைக்கான திறந்த மூல தரவுத்தொகுப்பையும் அவர்கள் வெளியிட்டுள்ளனர். இது அரசுகள் மற்றும் திட்டமிடுபவர்களுக்கு காலநிலை அபாயத்தை வளர்ச்சி கொள்கைகளில் சேர்க்க உதவும்.
இறுதி எச்சரிக்கை
உலகம் 1.5 டிகிரி செல்சியஸ் வெப்ப உயர்வை நெருங்கிக் கொண்டிருக்கும் நிலையில், இந்த ஆய்வு ஒரு தெளிவான செய்தியை தருகிறது: கடும் வெப்பத்தின் காலம் எதிர்கால பிரச்சினை அல்ல – அது இப்போதே வேகமாக நிஜமாகிக் கொண்டிருக்கிறது.
Read More : இந்த நாட்டில் பெண்கள் தான் பவர்ஹவுஸ்.. ஆண்களை விட அதிகம் சம்பாதிக்கின்றனர்..!
