இந்திய பொருளாதார சந்தையில் பெரும் மாற்றத்தை ஏற்படுத்தக்கூடிய ஒரு முக்கிய நகர்வாக, இந்திய ரிசர்வ் வங்கி (RBI) வரும் பிப்ரவரி 6-ஆம் தேதி நடைபெறவுள்ள பணவியல் கொள்கை ஆய்வுக் கூட்டத்தில், ரெப்போ வட்டி விகிதத்தை 0.25 சதவீதம் குறைக்க வாய்ப்புள்ளதாக தகவல்கள் வெளியாகியுள்ளன. சர்வதேச நிதி நிறுவனமான ‘பேங்க் ஆஃப் அமெரிக்கா’ (Bank of America) வெளியிட்டுள்ள ஆய்வறிக்கையின்படி, தற்போதைய வட்டி குறைப்புச் சுழற்சியின் இறுதி மாற்றமாக இது அமையக்கூடும் எனக் கணிக்கப்பட்டுள்ளது. பணவீக்கம் கட்டுக்குள் இருக்கும் என எதிர்பார்க்கப்படுவதாலும், பொருளாதார வளர்ச்சியை ஊக்குவிக்க வேண்டிய கட்டாயம் இருப்பதாலும், ரிசர்வ் வங்கி வட்டி விகிதத்தை 5.25 சதவீதமாகக் குறைக்கும் எனப் பொருளாதார நிபுணர்கள் நம்புகின்றனர்.
இந்த 0.25 சதவீத வட்டி குறைப்பு என்பது சாதாரணமானதாகத் தோன்றினாலும், நீண்டகால வீட்டுக் கடன்களை (Home Loans) வைத்திருப்பவர்களுக்கு இது மிகப்பெரிய நிதியியல் மாற்றத்தை ஏற்படுத்தும். உதாரணமாக, 50 லட்சம் ரூபாய் வீட்டுக் கடனை 20 ஆண்டுகள் தவணையில் 9 சதவீத வட்டியில் செலுத்தி வரும் ஒருவருக்கு, வட்டி 8.75 சதவீதமாகக் குறைந்தால், மாதத் தவணையில் (EMI) சுமார் 800 ரூபாய் வரை மிச்சமாகும். இது ஒட்டுமொத்தக் கடன் கால முடிவில் சுமார் 1.92 லட்சம் ரூபாய் வரையிலான வட்டி சுமையை குறைக்கும்.
மறுபுறம், வாடிக்கையாளர்கள் தங்களின் மாதாந்திரத் தவணையை (EMI) குறைக்காமல் அதே தொகையைத் தொடர்ந்து செலுத்தி வந்தால், கடனைத் திருப்பிச் செலுத்தும் காலம் (Tenure) கணிசமாகக் குறையும். வட்டி விகிதக் குறைப்பிற்குப் பிறகும் பழைய இஎம்ஐ தொகையையே செலுத்துபவர்களுக்கு, 20 ஆண்டுகாலக் கடனானது சுமார் 12 மாதங்களுக்கு முன்னதாகவே முடிந்துவிடும். இந்த முறையில் கடன் காலத்தை குறைப்பதன் மூலம், வட்டித் தொகையில் மட்டும் சுமார் 4.40 லட்சம் ரூபாய் வரை வாடிக்கையாளர்கள் பெரும் சேமிப்பை ஈட்ட முடியும் என்பது குறிப்பிடத்தக்கது.
பொதுவாக வட்டி விகிதம் குறையும்போது வங்கிகள் தானாகவே கடன் காலத்தைத்தான் குறைக்கும். ஒருவேளை வாடிக்கையாளர்கள் தங்களின் மாதத் தவணைத் தொகை குறைய வேண்டும் என விரும்பினால், அவர்கள் சம்பந்தப்பட்ட வங்கியை நேரில் அணுகி முறையான விண்ணப்பத்தை அளிக்க வேண்டும். நடுத்தர வர்க்கத்தினருக்குப் பெரும் நிம்மதியை அளிக்கக்கூடிய இந்த வட்டி குறைப்பு அறிவிப்பு பிப்ரவரி முதல் வாரத்தில் வெளியாகலாம் என்று கூறப்படுகிறது.
