லிபியாவின் மறைந்த அதிபர் முஅம்மர் கடாஃபியின் மகனும், முன்னாள் வாரிசுமான சைஃப் அல்-இஸ்லாம் கடாஃபி கொல்லப்பட்டதாக அந்நாட்டின் மூத்த அதிகாரிகள் தெரிவித்துள்ளனர். 53 வயதான அவர் அடையாளம் தெரியாத ஆயுதமேந்திய கும்பலால் சுட்டுக் கொல்லப்பட்டதாக கூறப்படுகிறது..
மேற்கு லிபியாவில் உள்ள ஸின்டான் நகரில் உள்ள அவரது இல்லத்தில், ஒரு ‘4 பேர் கொண்ட கமாண்டோ’ குழு ஒரு ‘படுகொலையை’ நடத்தியதாக கூறப்படுகிறது. லிபியாவை சேர்ந்த 2 லிபிய பாதுகாப்பு அதிகாரிகள் இந்தக் கொலையை உறுதிப்படுத்தினர், ஆனால் ஊடகங்களிடம் பேச அவர்களுக்கு அதிகாரம் இல்லாததால், விவரங்களைப் பகிர மறுத்துவிட்டனர். அவரது வழக்கறிஞர் காலித் அல்-சைதி, எந்த விளக்கமும் அளிக்காமல் ஃபேஸ்புக்கில் அவரது மரணத்தை அறிவித்தார்.
ஐ.நா தலைமையிலான அரசியல் பேச்சுவார்த்தையில் கடாஃபியைப் பிரதிநிதித்துவப்படுத்திய அப்துல்லா ஒத்மான் அப்துர்ரஹீமும் இந்தச் செய்தியை உறுதிப்படுத்தினார். லிபிய ஊடகமான ஃபவாசெல் மீடியா, ஆயுதம் ஏந்திய நபர்கள் சைஃப் அல்-இஸ்லாமை அவரது இல்லத்தில் வைத்து கொன்றதாக அப்துர்ரஹீம் கூறியதாக தெரிவித்துள்ளது. எந்த அதிகாரப்பூர்வ அறிக்கையும் வெளியிடப்படாத போதிலும், வழக்கறிஞர்கள் விசாரணையைத் தொடங்கியுள்ளதாக கூறப்படுகிறது..
ஜூன் 1972 இல் திரிபோலியில் பிறந்த சைஃப் அல்-இஸ்லாம், கடாஃபி ஆட்சியின் சீர்திருத்த மனப்பான்மை கொண்ட முகமாக அறியப்பட்டார். லண்டன் ஸ்கூல் ஆஃப் எகனாமிக்ஸில் முனைவர் பட்டம் பெற்ற அவர், ஒரு காலத்தில் தனது தந்தையின் சர்வாதிகார ஆட்சியில் நவீனமயமாக்கும் சக்தியாக முன்னிறுத்தப்பட்டார். 4 தசாப்த கால ஆட்சிக்குப் பிறகு, 2011 இல் நேட்டோ ஆதரவு கிளர்ச்சியால் முஅம்மர் கடாஃபி பதவியிலிருந்து அகற்றப்பட்டார். நாடு மோதலில் சிக்கியதால், அதே ஆண்டு இறுதியில் அவர் கொல்லப்பட்டார். அப்போதிருந்து, லிபியா போட்டி ஆயுதக் குழுக்கள் மற்றும் அரசியல் பிரிவுகளால் உந்தப்பட்ட பிளவு மற்றும் வன்முறையில் சிதைந்துள்ளது.
2011 ஆம் ஆண்டின் பிற்பகுதியில் நைஜருக்குத் தப்பிக்க முயன்றபோது, சைஃப் அல்-இஸ்லாம் சின்டான் போராளிகளால் பிடிக்கப்பட்டார். லிபியாவின் போட்டி அரசாங்கங்களில் ஒன்றால் அவருக்குப் பொது மன்னிப்பு வழங்கப்பட்ட பிறகு, ஜூன் 2017 இல் அவர்கள் அவரை விடுவித்தனர்.
ஒரு லிபிய நீதிமன்றம் 2015 இல் அவர் இல்லாத நிலையில் அவருக்குத் தண்டனை விதித்து, வன்முறையைத் தூண்டியதற்காகவும், போராட்டக்காரர்களைக் கொன்றதற்காகவும் மரண தண்டனை விதித்தது. 2011 கிளர்ச்சியுடன் தொடர்புடைய மனிதகுலத்திற்கு எதிரான குற்றச்சாட்டுகளுக்காக சர்வதேச குற்றவியல் நீதிமன்றத்தாலும் அவர் தேடப்பட்டு வந்தார்.
நவம்பர் 2021 இல், லிபியாவின் ஜனாதிபதித் தேர்தலில் தனது வேட்புமனுவை அறிவிப்பதன் மூலம் அவர் அரசியலில் மீண்டும் நுழைய முயன்றார். அவரது இந்த முடிவு நாடு முழுவதும் உள்ள கடாஃபிக்கு எதிரான குழுக்களிடமிருந்து கடுமையான எதிர்ப்பைத் தூண்டியது. உயர் தேசிய தேர்தல் குழு பின்னர் அவரை தகுதி நீக்கம் செய்தபோதிலும், போட்டியிடும் நிர்வாகங்களுக்கும் ஆயுதக் குழுக்களுக்கும் இடையிலான மோதல்களால் தேர்தல் ஒத்திவைக்கப்பட்டது.
