மருத்துவத் தொழில்நுட்ப உலகில் மற்றுமொரு மைல்கல்லாக, மூளை தொடர்பான பாதிப்புகளை கண்டறிவதில் செயற்கை நுண்ணறிவு (AI) புதிய புரட்சியை ஏற்படுத்தியுள்ளது. மிச்சிகன் பல்கலைக்கழக விஞ்ஞானிகள் உருவாக்கியுள்ள ‘பிரைமா’ (PRIMA) என்ற அதிநவீன AI தொழில்நுட்பம், மருத்துவத் துறையினரை வியப்பில் ஆழ்த்தியுள்ளது.
சுமார் 2.2 லட்சம் மூளை MRI ஸ்கேன்களைக் கொண்டு விரிவான பயிற்சி அளிக்கப்பட்ட இந்தத் தொழில்நுட்பம், மனித மூளையில் ஏற்படும் 50-க்கும் மேற்பட்ட வெவ்வேறு பாதிப்புகளை அடையாளம் காணும் திறன் கொண்டது. குறிப்பாக, ஒரு எம்.ஆர்.ஐ ஸ்கேனை ஆய்வு செய்து முடிவுகளை வழங்க இது எடுத்துக்கொள்ளும் காலம் வெறும் சில விநாடிகளே. வேகத்தில் மட்டுமின்றி, துல்லியத்திலும் அசத்தி வரும் இந்தத் தொழில்நுட்பம், சுமார் 97.5 சதவீத துல்லியத்துடன் முடிவுகளை கண்டறிந்து சாதனை படைத்துள்ளது.
நரம்பியல் நிபுணர்களின் பற்றாக்குறை நிலவும் பின்தங்கிய பகுதிகளில், இந்த ‘பிரைமா’ தொழில்நுட்பம் ஒரு வரப்பிரசாதமாக அமையும் என எதிர்பார்க்கப்படுகிறது. சிக்கலான மூளை நோய்களை ஆரம்பக்கட்டத்திலேயே மிகத் துல்லியமாகக் கண்டறிந்து, விரைவான சிகிச்சையை தொடங்க இது பெரிதும் உதவும் என ஆய்வாளர்கள் தெரிவிக்கின்றனர்.
