பல்லாயிரம் ஆண்டுப் பழமை வாய்ந்த பண்பாட்டில், ஒவ்வொரு செயலுக்கும் ஒரு உட்பொருள் உண்டு என சகுன சாஸ்திரங்கள் விளக்குகின்றன. ஒரு முக்கியப் பணிக்காகப் புறப்படும்போதோ அல்லது சுபகாரியங்கள் பேசும்போதோ நிமித்தங்கள் பார்ப்பது நம் முன்னோர்களின் வழக்கமாக இருந்துள்ளது. குறிப்பாக, மன சுமையோடு கோயில்களுக்கு சென்று இறைவனிடம் சரணடையும் தருணத்தில், நம்மைச் சுற்றி நடக்கும் சில சிறு சிறு மாற்றங்கள் சாதாரணமானவை அல்ல. அவை இறைவன் நமக்கு வழங்கும் ‘அருள் சமிக்ஞைகள்’ என்றே ஆன்மிக பெரியோர்கள் குறிப்பிடுகின்றனர்.
ஆலய கருவறையில் தீபாராதனை நடக்கும் போதோ அல்லது நாம் ஆழ்ந்து வேண்டி கொண்டிருக்கும் போதோ, சுவாமி சிலையின் மீதுள்ள மலர் தானாக கீழே விழுவது ஒரு உன்னதமான அறிகுறியாகும். இதனை “பூ வாக்கு” என்று கிராமப்புறங்களில் இன்றும் கூறுகின்றனர். அந்த மலர் வலதுபுறமாக விழுந்தால் நாம் நினைத்த காரியம் மிக விரைவில் கைகூடும் என்றும், இடதுபுறமாக விழுந்தால் சற்றுத் தாமதமானாலும் அந்தப் பணி நிச்சயமாக வெற்றியடையும் என்பது நம்பிக்கையாகும். இறைவன் நமது வேண்டுதலை ஏற்றுக்கொண்டதை காட்டும் முதல் அடையாளமாக இது கருதப்படுகிறது.
நாம் மனமுருகி வேண்டும் அந்தப் புனித நொடியில், கோவிலில் மணி ஓசை ஒலித்தால் அது நம்மைச் சுற்றியுள்ள எதிர்மறை ஆற்றல்களை அகற்றி, நேர்மறை அதிர்வுகளை உருவாக்குகிறது. “அப்படியே ஆகட்டும்” என்று அந்தப் பரம்பொருள் நமக்கு இடும் உத்தரவாகவே அந்த ஒலியை உணரலாம். அதேபோல், கருவறையில் காற்றே இல்லாத நிலையிலும், தீபம் திடீரெனப் பளிச்சென பிரகாசமாக எரிந்தால், அது நமது வாழ்வில் இருள் நீங்கி ஒளி பிறக்கப் போகிறது என்பதற்கான அறிகுறியாகும்.
ஆலயங்களுக்குள் நாம் இருக்கும்போது, ஒரு சிறு குழந்தை நம்மைப் பார்த்துச் சிரிப்பதும் இறைவனின் ஆசியாகவே பார்க்கப்படுகிறது. குழந்தைகளின் சிரிப்பில் ஈசன் வசிக்கிறான் என்பது ஐதீகம். மேலும், நல்ல விஷயங்களைப் பேசும்போதும், பூஜிக்கும் போதும் பல்லி சத்தமிடுவது ஒரு உறுதிமொழியைப் போன்றது. குறிப்பாக கருவறைத் திசையில் இருந்து வரும் பல்லியின் ஓசை, நமது பிரார்த்தனைகள் நிச்சயம் நிறைவேறும் என்பதற்கான சாட்சியாக சொல்லப்படுகிறது.
இறைவன் உருவமாக மட்டும் இன்றி, அருவமாகவும் நம்மிடம் பேசுகிறான். நாம் கேட்கும் சொற்களுக்கு அவர் இத்தகைய அறிகுறிகள் மூலமே பதில் அளிக்கிறார். இத்தகைய தெய்வீக மொழிகளை புரிந்து கொண்டு பக்தி செலுத்தும்போது, நம் மன உறுதி மேலோங்குவதோடு, இறைவனின் அரவணைப்பை நாம் ஒவ்வொரு கணமும் உணர முடியும்.
Read More : AI உணர்வு கொண்டதாக மாறுகிறதா..? ஆய்வாளர்களை திகைக்க வைத்த AI மாடல்கள்..!
