தமிழக மற்றும் புதுவை மீனவர்களின் வாழ்வாதாரத்தை சிதைக்கும் நோக்கில், இலங்கை கடற்படையினர் அத்துமீறி நடத்தும் கைது நடவடிக்கைகள் மீண்டும் தமிழக கடலோரப் பகுதிகளில் கொந்தளிப்பை ஏற்படுத்தியுள்ளன. எல்லை தாண்டி மீன் பிடித்ததாகக் கூறி, மீனவர்களை கைது செய்வது மட்டுமின்றி, அவர்களின் பல லட்ச ரூபாய் மதிப்பிலான விசைப்படகுகளைப் பறிமுதல் செய்து அரசுடைமையாக்கும் போக்கை இலங்கை அரசு தொடர்ந்து கடைபிடித்து வருகிறது. இந்தப் பிரச்சனைக்கு இன்னும் நிரந்தரத் தீர்வு எட்டப்படாத நிலையில், கச்சத்தீவு அருகே மீன்பிடித்துக் கொண்டிருந்த தமிழக மீனவர்கள் மீது மீண்டும் ஒரு தாக்குதல் நடத்தப்பட்டுள்ளது.
நேற்று இரவு ராமேஸ்வரம் மற்றும் மண்டபம் பகுதிகளில் இருந்து கடலுக்குச் சென்ற மீனவர்கள் மீது பாய்ந்த இலங்கை கடற்படை, அங்கு மீன்பிடித்துக் கொண்டிருந்த 22 மீனவர்களையும் அவர்களின் 4 விசைப்படகுகளையும் சிறைபிடித்துச் சென்றது. கைது செய்யப்பட்ட மீனவர்கள் அனைவரும் தற்போது காங்கேசன்துறை கடற்படை முகாமுக்கு அழைத்துச் செல்லப்பட்டுள்ளனர். அங்குள்ள மீன்வளத்துறை அதிகாரிகளிடம் அவர்கள் ஒப்படைக்கப்பட்டு, பின்னர் சட்ட நடவடிக்கைகளுக்கு உட்படுத்தப்பட உள்ளதாக தகவல்கள் வெளியாகியுள்ளன.
இந்த திடீர் கைது நடவடிக்கை மீனவக் கிராமங்களில் பெரும் சோகத்தையும், கொந்தளிப்பையும் ஏற்படுத்தியுள்ளது. தங்கள் குடும்பத்தின் வாழ்வாதாரமாக திகழும் படகுகள் பறிபோனதாலும், உறவினர்கள் சிறைபிடிக்கப்பட்டதாலும் பாதிக்கப்பட்ட குடும்பத்தினர் கதறி துடிக்கின்றனர். “ஒவ்வொரு முறை கடலுக்குச் செல்லும்போதும் உயிருக்கு உத்தரவாதம் இல்லாத சூழலே நிலவுகிறது” என மீனவ சங்கங்கள் வேதனை தெரிவித்துள்ளன. எனவே, கைது செய்யப்பட்ட மீனவர்களையும், விசைப்படகுகளையும் உடனே மீட்டுத் தர வேண்டுமென்றும் கோரிக்கை விடுத்துள்ளனர்.
Read More : இறைவன் நம்மோடு பேசும் மொழி..!! கோயில்களில் நீங்கள் சாமி கும்பிடும்போது இந்த அறிகுறியை கவனிச்சிருக்கீங்களா..?
