தமிழக அரசின் மிக முக்கியமான திட்டமான ‘கலைஞர் மகளிர் உரிமைத்தொகை’ திட்டத்தில் விடுபட்டவர்களை இணைப்பதற்கான பணிகள் தற்போது இறுதிக்கட்டத்தை எட்டியுள்ளன. ‘உங்களுடன் ஸ்டாலின்’ மற்றும் சிறப்பு முகாம்கள் வாயிலாக விண்ணப்பித்து, தொழில்நுட்ப காரணங்களால் நிராகரிக்கப்பட்ட சுமார் 7 லட்சம் பெண்கள் மேல்முறையீடு செய்திருந்தனர். இவர்களின் மனுக்களை தீர ஆராய்ந்து, தகுதியுள்ள ஒவ்வொரு பெண்ணுக்கும் அரசின் பலன் சென்றடைவதை உறுதி செய்ய முதலமைச்சர் மு.க. ஸ்டாலின் அதிகாரிகளுக்கு உத்தரவிட்டுள்ளார்.
மேல்முறையீடு செய்தவர்களின் தகுதியை உறுதி செய்ய, வருவாய்த்துறை அதிகாரிகள் தற்போது நேரடியாகப் பயனாளிகளின் வீடுகளுக்கே சென்று கள ஆய்வை மேற்கொண்டு வருகின்றனர். குறிப்பாக, விண்ணப்பதாரர்களின் ரேஷன் கார்டு விவரங்கள், ஆதார் எண் மற்றும் வீட்டு மின் இணைப்பு எண் ஆகியவற்றை அடிப்படையாகக் கொண்டு விரிவான விசாரணை நடத்தப்படுகிறது. குடும்பத்தின் ஆண்டு வருமானம் மற்றும் சொத்து விவரங்கள் அரசின் வழிகாட்டு நெறிமுறைகளுக்கு உட்பட்டு இருக்கிறதா என்பதை அதிகாரிகள் கணினி மூலமும், நேரடியாகவும் சரிபார்த்து வருகின்றனர்.
2026 சட்டமன்றத் தேர்தலுக்கு முன்னதாகவே, தகுதியுள்ள லட்சக்கணக்கான புதிய பயனாளிகளை இத்திட்டத்தில் இணைத்து, அவர்களுக்கு முதல் தவணைத் தொகையை வழங்க அரசு திட்டமிட்டுள்ளது. தற்போதைய நிலையில் ரூ.1,000 வழங்கப்பட்டு வரும் நிலையில், புதிய பயனாளிகள் சேர்க்கைக்குப் பிறகு இந்தத் தொகை ரூ.2,000 ஆக உயர்த்தப்படலாம் என்ற தகவலும் கோட்டை வட்டாரங்களில் பலமாக அடிபடுகிறது. இது குறித்த அதிகாரப்பூர்வ அறிவிப்பு விரைவில் வெளியாகக்கூடும் என எதிர்பார்க்கப்படுகிறது.
அதிகாரிகளின் கள ஆய்வு முடிந்து, தகுதியானவர்களின் இறுதிப் பட்டியல் தயார் செய்யப்பட்டவுடன், அவர்களின் வங்கி கணக்குகளுக்கு ‘நேரடி பணப்பரிமாற்றம்’ (DBT) முறையில் தொகை செலுத்தப்படும். இதற்கான மென்பொருள் சரிபார்ப்புப் பணிகளும் ஒருபுறம் விறுவிறுப்பாக நடைபெற்று வருகின்றன. விண்ணப்பம் நிராகரிக்கப்பட்டவர்கள் முறையான ஆதாரங்களைச் சமர்ப்பிக்கும் பட்சத்தில், அவர்களுக்கும் முன்னுரிமை அளிக்கப்படும் எனத் தெரிவிக்கப்பட்டுள்ளது. இந்த அதிரடி நடவடிக்கை இல்லத்தரசிகளிடையே பெரும் வரவேற்பைப் பெற்றுள்ளது.
