தமிழக உணவு மற்றும் நுகர்வோர் பாதுகாப்புத் துறை, மாநிலத்திலுள்ள கோடிக்கணக்கான ரேஷன் அட்டைதாரர்களுக்கு மிக முக்கியமான காலக்கெடு ஒன்றை விதித்துள்ளது. ரேஷன் விநியோக முறையில் நிலவும் முறைகேடுகளைக் களைந்து, போலி அட்டைகளை முற்றிலுமாக ஒழிக்கும் நோக்கில் இந்த அதிரடி நடவடிக்கை எடுக்கப்பட்டுள்ளது. இனிவரும் காலங்களில், ஒரு ரேஷன் அட்டையில் பெயர் இடம்பெற்றுள்ள உறுப்பினர்கள் அனைவரும் தங்களது கைரேகையை (Biometric) பதிவு செய்திருப்பது கட்டாயமாக்கப்பட்டுள்ளது.
பொது விநியோகத் திட்டத்தின் கீழ் அத்தியாவசியப் பொருட்கள் தகுதியான பயனாளிகளுக்குத் தடையின்றிச் சேருவதை உறுதி செய்ய அரசு பல்வேறு மாற்றங்களைக் கொண்டு வந்துள்ளது. அதன் ஒரு பகுதியாக, குடும்ப உறுப்பினர்கள் ஒவ்வொருவரும் தனித்தனியாகத் தங்களது கைரேகையை ரேஷன் கடைகளில் உள்ள இயந்திரங்களில் பதிவு செய்ய வேண்டும். இது குறித்த விழிப்புணர்வு மற்றும் அறிவுறுத்தல்கள் தற்போது மாவட்ட வாரியாக அந்தந்த கூட்டுறவுச் சங்கங்கள் மற்றும் வட்ட வழங்கல் அலுவலகங்கள் மூலம் முடுக்கிவிடப்பட்டுள்ளன.
இதுவரை கைரேகையைப் பதிவு செய்யாத உறுப்பினர்கள், வரும் பிப்ரவரி 25-ஆம் தேதிக்குள் தங்கள் குடும்ப அட்டைக்கு உட்பட்ட ரேஷன் கடைகளுக்குச் சென்று இப்பணியை முடிக்க வேண்டும் என அரசு வலியுறுத்தியுள்ளது. இந்தக் குறிப்பிட்ட காலக்கெடுவிற்குள் கைரேகை சரிபார்ப்பை மேற்கொள்ளாதவர்களின் ரேஷன் அட்டைகள் தற்காலிகமாக முடக்கப்படவோ அல்லது அந்த உறுப்பினர்களுக்கான பொருட்கள் நிறுத்தப்படவோ வாய்ப்புள்ளதாக அரசு வட்டாரங்கள் எச்சரிக்கின்றன.
பொதுமக்கள் செய்ய வேண்டியது என்ன..?
இந்த நடைமுறையை எளிதாக்க, ரேஷன் கடை ஊழியர்களுக்கு உரிய ஆலோசனைகள் வழங்கப்பட்டுள்ளன. முதியவர்கள் மற்றும் கைரேகை பதிவதில் சிக்கல் உள்ளவர்களுக்கு மாற்று வழிமுறைகள் குறித்துப் பரிசீலிக்கப்பட்டு வருகிறது. இருப்பினும், கால தாமதத்தைத் தவிர்க்கவும், குடும்ப அட்டையின் செயல்பாட்டைத் தடையின்றித் தக்கவைக்கவும் பிப்ரவரி 25-ஆம் தேதிக்குள் அனைத்து உறுப்பினர்களும் தங்கள் பதிவை உறுதி செய்து கொள்ளுமாறு கேட்டுக்கொள்ளப்படுகிறார்கள்.
