‘பிரதம மந்திரி கிசான் சம்மான் நிதி’ (PM-Kisan) திட்டத்தின் 22-வது தவணைப் பணம் எப்போது கிடைக்கும் என்ற எதிர்பார்ப்பு தகுதியுள்ள விவசாயிகள் மத்தியில் அதிகரித்துள்ளது. ஆண்டுக்கு 6,000 ரூபாயை மூன்று தவணைகளாக வழங்கி வரும் மத்திய அரசு, மார்ச் முதல் வாரத்தில் அடுத்த தவணையை வெளியிடத் திட்டமிட்டுள்ளதாக தகவல்கள் தெரிவிக்கின்றன. இருப்பினும், அதிகாரப்பூர்வ அறிவிப்பு வெளியாகாத நிலையில், இந்த முறை நிதி விடுவிப்பதில் ஏற்பட்டுள்ள தாமதத்திற்கான பின்னணி குறித்த முக்கிய விவரங்கள் வெளியாகியுள்ளன.
இந்த திட்டத்தில் நிலவி வந்த முறைகேடுகளை கண்டறிந்து, தகுதியற்ற பயனாளிகளை நீக்கும் பணியில் மத்திய அரசு தற்போது தீவிரமாக ஈடுபட்டுள்ளது. கடந்த ஓராண்டில் மட்டும் சுமார் ஒரு கோடிக்கும் அதிகமான தகுதியற்ற நபர்களின் பெயர்கள் பட்டியலில் இருந்து நீக்கப்பட்டுள்ளன. நிலப் பதிவேடுகளில் முறைகேடு செய்தவர்கள் மற்றும் அரசு விதிகளை மீறிப் பயன் பெற்று வந்தவர்களைக் கண்டறிய பெரிய அளவிலான மறு சரிபார்ப்பு பணிகள் நடைபெற்று வருகின்றன.
ஒவ்வொரு மாதமும் சராசரியாக 7 முதல் 8 லட்சம் பெயர்கள் நீக்கப்பட்டு வருவதால், பயனாளிகளின் எண்ணிக்கையை சரியாக கணக்கிட்ட பின்னரே 22-வது தவணைப் பணத்தை விடுவிக்க அரசு முடிவு செய்துள்ளது. மத்திய அரசின் புதிய விதிமுறைகளின்படி, பிப்ரவரி 1, 2019-க்குப் பிறகு நிலம் வாங்கியவர்கள் இத்திட்டத்தின் கீழ் பயன்பெற முடியாது. அதேபோல், ஒரே குடும்பத்தில் கணவன் மற்றும் மனைவி ஆகிய இருவரும் தனித்தனியாகப் பலன் பெற்று வந்தால், அவர்களில் ஒருவரது பெயர் நீக்கப்படும்.
நிலப் பதிவேடுகளில் தவறான தகவல்களை அளித்தவர்களும் தகுதியற்றவர்களாக கருதப்படுவார்கள். pmkisan.gov.in இணையதளத் தரவுகளின்படி, கடந்த 8 மாதங்களில் மட்டும் சுமார் 71 லட்சம் போலிப் பயனாளிகள் கண்டறியப்பட்டுள்ளனர். இந்தச் சுத்திகரிப்புப் பணிகளால்தான் தவணைப் பணம் விடுவிப்பதில் காலதாமதம் ஏற்படுவதாக கூறப்படுகிறது.
தகுதியுள்ள விவசாயிகள் தங்களது பெயர் நீக்கப்படாமல் இருப்பதை உறுதி செய்ய e-KYC பணிகளை முடிப்பது அவசியமாகும். இதற்காகப் பயனாளிகள் அதிகாரப்பூர்வ இணையதளத்தில் உள்ள ‘Farmers Corner’ பகுதிக்குச் சென்று, தங்களது 12 இலக்க ஆதார் எண் மற்றும் மொபைல் எண்ணிற்கு வரும் OTP மூலம் சரிபார்ப்பைச் செய்துகொள்ளலாம். ஒருவேளை உங்கள் பெயர் தவறுதலாக நீக்கப்பட்டிருந்தால், மீண்டும் e-KYC செய்வதன் மூலம் இழந்த சலுகைகளைப் பெற முடியும். மேலும், ‘Know Your Status’ வசதி மூலம் உங்களது தற்போதைய நிலையை அவ்வப்போது சரிபார்த்துக் கொள்வது நல்லது.
பயனாளிகள் பட்டியலில் பெயர் விடுபட்டிருந்தாலோ அல்லது ஆதார்-வங்கி இணைப்பில் சிக்கல் இருந்தாலோ, உடனடியாக அருகில் உள்ள வேளாண் அதிகாரிகளை அணுகித் தீர்வு காணலாம். நிலப் பதிவுகள் சரியாகப் பராமரிக்கப்படுவதை உறுதி செய்வது மார்ச் மாதம் கிடைக்கவுள்ள 22-வது தவணைப் பணத்தைப் பெறுவதற்கு மிகவும் அவசியமாகும்.
Read More : தமிழக சட்டமன்ற தேர்தல் எப்போது..? வெளியாகிறது அதிகாரப்பூர்வ தேதி..!! பரபரப்பு தகவல்..!!
