மத்திய கிழக்கு பகுதியில் பதற்றம் தொடர்ந்து அதிகரித்து வரும் நிலையில், ஈரான் தற்போது அமெரிக்கா மற்றும் இஸ்ரேல் ஆகிய நாடுகளை எதிர்கொண்டு வருகிறது. இந்த மோதல் காரணமாக வளைகுடா பகுதிகளில் உள்ள சவுதி அரேபியா, கத்தார், பஹ்ரைன் போன்ற நாடுகளுக்கும் அச்சுறுத்தல் உருவாகியுள்ளது. ஆனால் நவீன கால போர்கள் வெறும் ஆயுதங்களால் மட்டுமல்லாமல், தந்திரம் மற்றும் உளவுத்தகவல் மூலம் நடத்தப்படுகின்றன என்பது குறிப்பிடத்தக்கது.
சீன பேராசிரியரின் வித்தியாசமான கருத்து
இந்த சூழ்நிலையில், ஒரு சீன பேராசிரியர் வித்தியாசமான கருத்தை முன்வைத்துள்ளார். ஈரான் தனது எதிரிகளை பலவீனப்படுத்த ஒரு குண்டு கூட சுட தேவையில்லை என்றும் ஒரே ஒரு தந்திரமான நடவடிக்கையால் கோடிக்கணக்கான மக்களிடையே பதற்றத்தையும் குழப்பத்தையும் ஏற்படுத்த முடியும் என்று அவர் கூறுகிறார். இது ஏவுகணை தாக்குதலை விட கூட அதிக பாதிப்பை ஏற்படுத்தக்கூடியதாக இருக்கலாம் என்றும் அவர் கூறுகிறார்..
வளைகுடா நாடுகளின் பலவீனம் – தண்ணீர்
மேலும் “ வளைகுடா நாடுகளுக்கு மிகப்பெரிய பலவீனம் ஒன்று உள்ளது. அதாவது அந்நாடுகளில் இயற்கையான குடிநீர் வளங்கள் மிகவும் குறைவாக உள்ளன.
அங்கு குடிநீரின் சுமார் 60 சதவீதம் கடல் நீரை சுத்திகரித்து பெறப்படுகிறது. இந்த செயல்முறை “உப்பு நீக்கம்” (Desalination) என்று அழைக்கப்படுகிறது. அதாவது கடல் நீரை குடிநீராக மாற்றும் செயல்முறை. இந்த வளைகுடா நாடுகள் தினசரி குடிநீர் தேவைக்காக மிகப்பெரிய உப்பு நீக்கும் நிலையங்களை மிகவும் அதிகமாக நம்பி இருக்கின்றன.
இந்த நிலையங்கள் செயல்படாமல் போனால் சில மணி நேரங்களுக்குள்ளேயே கடுமையான தண்ணீர் பற்றாக்குறை உருவாகும். இதனால் சமூக கலவரங்கள் ஏற்படும் வாய்ப்பும் உள்ளது என்று அவர் கூறுகிறார். இந்த சார்பு குறித்து உலகம் போதுமான கவனம் செலுத்தவில்லை என்றும் அவர் தெரிவித்துள்ளார்.
ஒரு ட்ரோன் தாக்குதல் போதுமா?
அந்த பேராசிரியரின் கருத்துப்படி, ஈரான் பெரிய அளவிலான ராணுவ நடவடிக்கை எடுக்க வேண்டிய அவசியமே இல்லை. ஒரு முக்கியமான உப்பு நீக்கும் நிலையத்தை ஒரு ட்ரோன் மூலம் தாக்கினாலே, கோடிக்கணக்கான மக்கள் தண்ணீர் இல்லாமல் தவிக்க நேரிடும்.
வளைகுடா நாடுகளில் சுமார் 80 சதவீத உணவு வெளிநாடுகளில் இருந்து இறக்குமதி செய்யப்படுகிறது. அந்த உணவுகளை தயாரிக்கவும், சுகாதாரத்தையும் தினசரி வாழ்க்கையையும் நடத்தவும் தண்ணீர் மிகவும் அவசியம்.
தண்ணீர் இல்லாமல் போனால் உணவு தயாரிப்பு, சுகாதாரம் மற்றும் அன்றாட வாழ்க்கை அனைத்தும் கடுமையாக பாதிக்கப்படும். இவ்வாறு எந்த நேரடி போர் இல்லாமல் கூட சமூக அமைப்பை குழப்பம் அடையச் செய்ய முடியும் என்று அவர் கூறுகிறார்.
மத்திய கிழக்கில் உள்ள அமெரிக்க படைகள்
மத்திய கிழக்கு பகுதியில் பணியில் உள்ள அமெரிக்க படைகளும் அங்கு உள்ள உள்ளூர் தண்ணீர் அமைப்புகளையே பெரிதும் நம்பி உள்ளன. அங்கு பொதுமக்கள் கடுமையான தண்ணீர் பற்றாக்குறையை எதிர்கொண்டு குழப்ப நிலை உருவானால், அந்த நிலையை சமாளிப்பது மிகவும் கடினமாக இருக்கும்.
அந்த பேராசிரியரின் கருத்துப்படி, அந்த சூழ்நிலையில் ராணுவம் பாதுகாப்பு நடவடிக்கைகளை விட மக்கள் குடிநீர் பெறுவதற்கான நடவடிக்கைகளில் கவனம் செலுத்த வேண்டிய நிலை உருவாகலாம். இதனால் ராணுவ நடவடிக்கைகளிலும் அழுத்தம் அதிகரிக்கும்.
உப்பு நீக்கும் நிலையங்கள் ஏன் ஆபத்தில் உள்ளன?
உப்பு நீக்கும் நிலையங்கள் பெரும்பாலும் கடற்கரை பகுதிகளில் அமைக்கப்பட்டிருக்கும். இதனால் அவற்றை முழுமையாக பாதுகாப்பது சிக்கலான ஒன்றாகிறது. மேலும் நவீன ட்ரோன் தொழில்நுட்பம் ரேடார் கண்காணிப்பை தவிர்த்து துல்லியமான தாக்குதல்களை நடத்தும் திறன் கொண்டது.
இந்த நிலையங்களில் முக்கியமான இயந்திரங்களுக்கு சிறிய சேதம் ஏற்பட்டாலும், அவற்றை சரி செய்ய பல மாதங்கள் ஆகலாம். காரணம், பழுது சரிசெய்யும் பணிகள் மிகவும் செலவானதும் நேரம் எடுத்துக்கொள்ளக்கூடியதுமானதாக இருக்கும்.
இதனால் இத்தகைய முக்கியமான கட்டமைப்புகளை அதிகமாக நம்பி இருப்பது வளைகுடா நாடுகளுக்கு ஒரு முக்கியமான தந்திர பலவீனமாக மாறக்கூடும் என்று அந்த பேராசிரியர் எச்சரித்துள்ளார்.
