அமெரிக்கா மற்றும் இஸ்ரேலுடனான தனது தொடர்ச்சியான மோதலை முடிவுக்குக் கொண்டுவர ஈரான் 3 முக்கிய நிபந்தனைகளை விதித்துள்ளது.. அவற்றில் தனது உரிமைகளை அங்கீகரிப்பது மற்றும் போரின் போது ஏற்பட்ட சேதங்களுக்கு இழப்பீடு வழங்குவது ஆகியவை அடங்கும். மோதலை முடிவுக்குக் கொண்டுவருவதற்கான ஒரே வழி சர்வதேச சமூகம் ஈரானின் சட்டப்பூர்வமான உரிமைகளை அங்கீகரிப்பதும், எதிர்கால ஆக்கிரமிப்பைத் தடுக்க உறுதியான உத்தரவாதங்களை வழங்குவதும் ஆகும் என்று ஈரானிய ஜனாதிபதி மசூத் பெஷேஷ்கியன் கூறினார்.
போரை முடிவுக்குக் கொண்டுவர ஈரானின் 3 நிபந்தனைகள் என்னென்ன..?
ஈரான் ஜனாதிபதி மசூத் பெஷேஷ்கியன் தனது பதிவில் ” ரஷ்யா மற்றும் பாகிஸ்தான் தலைவர்களுடன் பேசியபோது, பிராந்தியத்தில் அமைதியை நிலைநாட்ட ஈரானின் உறுதிப்பாட்டை நான் மீண்டும் உறுதிப்படுத்தினேன். இஸ்ரேல் மற்றும் அமெரிக்காவால் தூண்டப்பட்ட இந்த போரை முடிவுக்குக் கொண்டுவருவதற்கான ஒரே வழி ஈரானின் சட்டப்பூர்வமான உரிமைகளை அங்கீகரிப்பது, இழப்பீடுகளை வழங்குவது மற்றும் எதிர்கால ஆக்கிரமிப்புக்கு எதிரான உறுதியான சர்வதேச உத்தரவாதங்கள்” என்று குறிப்பிட்டுள்ளார்..
அமெரிக்காவும் இஸ்ரேலும் 16,000 க்கும் மேற்பட்ட குடியிருப்பு அலகுகள் மீது தாக்குதல் நடத்தியதாக ஈரான் தெரிவித்துள்ளது.. 19,734 இராணுவம் அல்லாத கட்டிடங்கள் குறிவைக்கப்பட்டுள்ளதாக ஈரான் ஊடகங்கள் செய்தி வெளியிட்டுள்ளன.. அவற்றில் 16,291 குடியிருப்புப் பிரிவுகள். கூடுதலாக, 77 மருத்துவ மையங்களும் 16 ரெட் கிரசென்ட் வசதிகளும் தாக்குதல்களுக்கு உள்ளானதாகவும் தெரிவிக்கப்பட்டுள்ளது..
‘ஈரானில் குறிவைக்க எதுவும் இல்லை’: டிரம்ப்
ஈரானுடன் நடைபெற்று வரும் மோதல் குறித்து பேசிய அமெரிக்க அதிபர் டிரம்ப், “இந்த போரை நான் விரும்பும் எந்த நேரத்திலும் முடிவுக்கு கொண்டு வர முடியும்” என்று தெரிவித்துள்ளார். மேலும் “சில சிறிய சம்பவங்கள் மட்டுமே நடக்கின்றன. நான் முடிக்க விரும்பும் நேரத்தில் இந்த போர் முடிந்து விடும்” என்று கூறினார். மேலும், ஈரானில் தாக்குவதற்கு பெரிதாக எதுவும் மீதமில்லை என்ற நிலை ஏற்பட்டுள்ளதாகவும் அவர் தெரிவித்தார்.
மேலும், ஈரானின் முக்கியமான ராணுவ திறன்கள் பெரும்பாலும் அழிக்கப்பட்டுவிட்டதாகவும் டிரம்ப் கூறினார். “அவர்களுடைய ஏவுகணைகள் சிதறிக் கிடக்கின்றன. அவர்கள் பயன்படுத்தும் ட்ரோன்கள் பல இடங்களில் அழிக்கப்பட்டு வருகின்றன. ட்ரோன் தயாரிப்பு மையங்களும் தாக்கப்பட்டுள்ளன” என்று அவர் தெரிவித்தார்.
Read More : ஹார்முஸ் ஜலசந்தி வழியாக இந்திய கப்பல்கள் செல்ல ஈரான் அனுமதி..! போருக்கு நடுவே முக்கிய முடிவு..!
