சில அன்றாட உணவுப் பழக்கங்கள் உடல் ஆரோக்கியத்தை மட்டுமல்ல, கூந்தல் ஆரோக்கியத்தையும் மறைமுகமாக பாதிக்கக்கூடும் என மருத்துவ நிபுணர்கள் எச்சரிக்கின்றனர். குறிப்பாக அழற்சி (Inflammation), ஹார்மோன் சமநிலையின்மை மற்றும் ஊட்டச்சத்து உறிஞ்சுதலில் ஏற்படும் குறைபாடுகள் ஆகியவை முடி உதிர்தலுக்கு முக்கிய காரணிகளாக அமையலாம் என கூறப்படுகிறது.
சர்க்கரை உணவுகள்: வெள்ளை ரொட்டி, பேஸ்ட்ரிகள் மற்றும் சர்க்கரை அதிகமுள்ள தானியங்கள் போன்ற உணவுகள் இரத்தத்தில் சர்க்கரை அளவை திடீரென உயர்த்துகின்றன. இதனால் இன்சுலின் அளவில் மாற்றம் ஏற்பட்டு உடலில் அழற்சி அதிகரிக்கிறது. இந்த நிலை தொடர்ந்தால் மயிர்க்கால்கள் பலவீனமடைந்து முடி உதிர்தல் பிரச்சனை அதிகரிக்கக்கூடும் என நிபுணர்கள் தெரிவிக்கின்றனர்.
எண்ணெய் உணவுகள்: பொரித்த உணவுகள் அதிகமாக உட்கொள்வதும் கூந்தல் ஆரோக்கியத்திற்கு பாதிப்பை ஏற்படுத்தக்கூடியதாக பார்க்கப்படுகிறது. இவற்றில் உள்ள ஆரோக்கியமற்ற கொழுப்புகள் மற்றும் அதிக உப்பு உடலில் ஆக்ஸிஜனேற்ற அழுத்தத்தை அதிகரிக்கிறது. இதனால் இயல்பான முடி வளர்ச்சி சுழற்சி பாதிக்கப்பட்டு முடி மெலிதாகும் நிலை உருவாகலாம்.
பாதரசம் உள்ள மீன்கள்: சில பெரிய மீன்கள், குறிப்பாக சூரை போன்றவற்றில் பாதரசம் அதிகமாக இருக்க வாய்ப்பு உள்ளது. அதிக அளவில் இத்தகைய மீன்களை உட்கொண்டால் உடலில் நச்சுத்தன்மை சேர்ந்து, சிலருக்கு திடீர் முடி உதிர்தல் போன்ற பிரச்சனைகள் ஏற்படக்கூடும் என ஆய்வுகள் குறிப்பிடுகின்றன.
இறைச்சி: அதேபோல் அதிக சிவப்பு இறைச்சி உட்கொள்வதும் சிலருக்கு கூந்தல் ஆரோக்கியத்தில் மாற்றத்தை ஏற்படுத்தலாம். இது உச்சந்தலையில் எண்ணெய் சுரப்பிகளின் செயல்பாட்டை அதிகரித்து, முடி வேர்களை பலவீனப்படுத்தும் சூழ்நிலையை உருவாக்கக்கூடும் என மருத்துவர்கள் எச்சரிக்கின்றனர்.
இனிப்புப் பானங்கள்: குளிர்பானங்கள் மற்றும் இனிப்புப் பானங்கள் அதிகமாகக் குடிப்பதும் குடல் ஆரோக்கியத்தையும் ஊட்டச்சத்து உறிஞ்சுதலையும் பாதிக்கக்கூடும். இதனால் முடி வளர்ச்சிக்கு தேவையான முக்கிய சத்துக்கள் குறைந்து, முடி வலிமை குறைய வாய்ப்பு இருப்பதாக நிபுணர்கள் தெரிவிக்கின்றனர்.
Read more: காலை உணவை தவிர்த்து டீ மட்டும் குடிக்குறீங்களா..? உடலில் இந்த பிரச்சனைகள் வருவது கன்பார்ம்..!
