முட்டைகள் இயற்கையின் ஒரு சிறந்த கொடையாகும். ஒரு முழு முட்டையில் சுமார் 6 கிராம் உயர்தர புரதம் உள்ளது. இதில் கார்போஹைட்ரேட் (மாவுச்சத்து) அறவே இல்லை. எனவே, உடல் எடையைக் குறைக்க விரும்புவோருக்கு இது ஒரு சிறந்த தேர்வாகும். இதுமட்டுமின்றி, முட்டையின் மஞ்சள் கருவில் மூளை வளர்ச்சி மற்றும் தசை செயல்பாட்டிற்குத் தேவையான ‘கோலின்’ (choline), நரம்பு மண்டலத்தைப் பாதுகாக்கும் வைட்டமின் B12 மற்றும் கண் பார்வையை மேம்படுத்தும் ‘லுடீன்’ (lutein) போன்ற சக்திவாய்ந்த சத்துக்கள் நிறைந்துள்ளன.
ஒரு நாளைக்கு எத்தனை முட்டைகள் சாப்பிடலாம்?: ஆரோக்கியமான ஒருவர் சமச்சீரான உணவின் ஒரு பகுதியாக ஒரு நாளைக்கு ஒன்று முதல் இரண்டு முட்டைகள் வரை பாதுகாப்பாகச் சாப்பிடலாம் என்று நிபுணர்கள் பரிந்துரைக்கின்றனர். இதய ஆரோக்கியத்திற்காக தினமும் ஒரு முழு முட்டை அல்லது இரண்டு முட்டையின் வெள்ளைக்கருவைச் சாப்பிட வேண்டும் என்று ‘அமெரிக்க இதயச் சங்கம்’ (American Heart Association) பரிந்துரைக்கிறது. முட்டையைச் சாப்பிட்ட பிறகு நீண்ட நேரம் பசி எடுக்காமல் இருக்கும்; இது அளவுக்கு அதிகமாகச் சாப்பிடுவதைத் தடுக்கவும், உடல் எடையை எளிதாகக் கட்டுப்படுத்தவும் உதவும்.
கொலஸ்ட்ரால்: முட்டையின் மஞ்சள் கருவில் உள்ள கொலஸ்ட்ரால் ரத்தத்தில் படிந்து இதய நோயை உண்டாக்கக்கூடும் என்று முன்பு எச்சரிக்கைகள் இருந்தன. ஆனால், உணவின் மூலம் நாம் உட்கொள்ளும் கொலஸ்ட்ரால் நமது இரத்தத்தில் உள்ள கொலஸ்ட்ரால் அளவை நேரடியாகப் பாதிப்பதில்லை என்று சமீபத்திய ஆய்வுகள் தெரிவிக்கின்றன. உடலுக்குத் தேவையான கொலஸ்ட்ராலை நமது கல்லீரலே தானாகவே உற்பத்தி செய்துகொள்கிறது. எனவே, முட்டையில் உள்ள கொலஸ்ட்ரால் குறித்துக் கவலைப்படத் தேவையில்லை என்பதைத் தெளிவுபடுத்தும் வகையில், அமெரிக்காவின் உணவு வழிகாட்டுதல்களிலிருந்து பழைய எச்சரிக்கைக் குறிப்புகள் நீக்கப்பட்டுள்ளன.
யார் கவனமாக இருக்க வேண்டும்?: முட்டைகள் உடலுக்கு மிகவும் நல்லது என்றாலும், ஏற்கனவே தீவிரமான இதய நோய்கள், டைப்-2 நீரிழிவு நோய் அல்லது அதிக இரத்தக் கொலஸ்ட்ரால் பிரச்சனை உள்ளவர்கள் சற்று கவனமாக இருக்க வேண்டும். அவர்கள் வாரத்திற்கு 3 முதல் 4 முட்டைகளை மட்டுமே மஞ்சள் கருவுடன் சேர்த்துச் சாப்பிட வேண்டும். அல்லது, மருத்துவர்களின் அறிவுரைப்படி, மஞ்சள் கருவை நீக்கிவிட்டு, புரதம் மட்டுமே கொண்ட வெள்ளைக்கருவை மட்டும் தாராளமாகச் சாப்பிடலாம்.
சமைக்கும்போது இந்தச் சிறிய மாற்றத்தைச் செய்யுங்கள்: முட்டையின் ஆரோக்கிய நன்மைகள் நாம் அதைச் சமைக்கும் முறையையும் பொறுத்தது. முட்டையை வறுக்கும்போதோ அல்லது ஆம்லெட் (omelet) செய்யும்போதோ வெண்ணெய் அல்லது விலங்கு கொழுப்பைப் பயன்படுத்துவதற்குப் பதிலாக, தாவர எண்ணெய் அல்லது ஆலிவ் எண்ணெயைப் பயன்படுத்துவது இதய ஆரோக்கியத்தை மேம்படுத்தும் என்று நிபுணர்கள் பரிந்துரைக்கின்றனர்.
Read More : ஆட்டு இறைச்சியின் இந்தப் பகுதிகளை சாப்பிடாதீங்க.. உடல் எடை அதிகரிப்பதுடன், இதய நோய்க்கும் வழிவகுக்கும்..!
