கச்சா எண்ணெய் விலை உயர்வு, சர்வதேச அளவில் நீடிக்கும் புவிசார் அரசியல் பதற்றம் உள்ளிட்ட காரணங்களால் இந்தியாவில் வட்டி விகித உயர்வு குறித்த எதிர்பார்ப்பு அதிகரித்துள்ளது. குறிப்பாக, பிரென்ட் கச்சா எண்ணெய் ஒரு பேரலுக்கு 100 டாலரை கடந்துள்ள நிலையில், பணவீக்கம் மீண்டும் வேகமெடுக்குமா என்ற கவலை உருவாகியுள்ளது.
இதன் தாக்கம் பொதுமக்களின் கடன் சுமையிலும் எதிரொலிக்க வாய்ப்புள்ளது. ரிசர்வ் வங்கி (RBI) ரெப்போ விகிதத்தை உயர்த்தினால், வங்கிகளின் கடன் வட்டி விகிதங்களிலும் மாற்றம் ஏற்படலாம். குறிப்பாக, ஃப்ளோட்டிங் வட்டி விகிதத்தில் உள்ள வீட்டுக்கடன் உள்ளிட்ட கடன்களின் மாத தவணை (EMI) அதிகரிக்கலாம் அல்லது மீதமுள்ள கடன் காலம் நீட்டிக்கப்படலாம்.
RBI எப்போது வட்டி விகிதத்தை உயர்த்தும்?
வட்டி விகித உயர்வு தொடர்பாக Moneycontrol நடத்திய கருத்துக்கணிப்பில் 9 பொருளாதார நிபுணர்கள் மற்றும் வங்கி கருவூலப் பிரிவு தலைவர்கள் பங்கேற்றனர். இதில் பெரும்பாலானோர் வரும் டிசம்பர் மாதத்திற்குள் ரிசர்வ் வங்கி வட்டி விகிதத்தை உயர்த்தும் வாய்ப்பு இருப்பதாக கணித்துள்ளனர்.
சில நிபுணர்கள் அக்டோபர் மாத நிதிக் கொள்கை கூட்டத்திலேயே 25 அடிப்படைப் புள்ளிகள் அளவுக்கு முதல் கட்ட வட்டி உயர்வு இருக்கலாம் எனக் கருதுகின்றனர். இதைத் தொடர்ந்து 2027 பிப்ரவரியில் மேலும் 25 அடிப்படைப் புள்ளிகள் உயர்த்தப்படலாம் என்றும் அவர்கள் தெரிவித்துள்ளனர். இந்த இரு உயர்வுகளும் நிகழ்ந்தால், ரெப்போ விகிதம் 5.75 சதவீதமாக உயரக்கூடும்.
ICRA-வின் தலைமை பொருளாதார நிபுணர் அதிதி நாயர், அடுத்த MPC கூட்டம் வரை கச்சா எண்ணெய் விலை தொடர்ந்து அதிகமாக இருந்தால் பணவீக்கத்தில் தாக்கம் ஏற்படலாம் என குறிப்பிட்டுள்ளார். குறிப்பாக பெட்ரோல், டீசல் விலைகளில் உயர்வு ஏற்பட்டால், அக்டோபரிலேயே வட்டி விகித உயர்வுக்கான முடிவு எடுக்கப்படுவதற்கான வாய்ப்பு அதிகரிக்கலாம் என்றும் அவர் கூறியுள்ளார்.
அதிகரிக்குமா கடன் EMI?
ரெப்போ விகிதம் உயர்ந்தால், வங்கிகளின் கடன் வட்டி விகிதங்களிலும் அதன் தாக்கம் இருக்கலாம். இதனால் ஃப்ளோட்டிங் வட்டி விகிதத்தில் இருக்கும் வீட்டுக்கடன் போன்ற கடன்களுக்கு மாத தவணை அதிகரிக்க வாய்ப்புள்ளது.
மாற்றாக, EMI தொகையை பெரிய அளவில் மாற்றாமல் கடனை திருப்பிச் செலுத்தும் காலத்தை வங்கிகள் நீட்டிக்கலாம். புதிய வீட்டுக்கடன் அல்லது பிற ஃப்ளோட்டிங் வட்டி கடன்களைப் பெறுபவர்களுக்கும் அதிக வட்டி விகிதம் அமைய வாய்ப்பு உள்ளது.
எனவே, வரும் மாதங்களில் வீடு வாங்க திட்டமிடுபவர்கள் அல்லது பெரிய அளவில் கடன் பெற நினைப்பவர்கள் வட்டி விகிதங்களில் ஏற்படும் மாற்றங்களை கவனத்தில் கொள்ள வேண்டியது அவசியம். இருப்பினும், EMI எவ்வளவு அதிகரிக்கும் என்பது ஒவ்வொரு வங்கியின் வட்டி விகிதம், நிலுவையில் உள்ள கடன் தொகை மற்றும் மீதமுள்ள கடன் காலம் ஆகியவற்றைப் பொறுத்தே அமையும்.
பணவீக்கமும் RBI-க்கு சவால்
கச்சா எண்ணெய் விலை உயர்வுடன் நாட்டின் பணவீக்க நிலையும் கவனத்தை ஈர்த்துள்ளது. ஆகஸ்ட் மாத CPI பணவீக்கம் 4.82 சதவீதமாக பதிவானது. இது ஜூலை மாதத்தில் இருந்த 4.45 சதவீதத்தை விட அதிகமாகும். உணவு மற்றும் எரிபொருள் விலைகளில் ஏற்பட்ட உயர்வு இதற்கு முக்கிய காரணமாக அமைந்தது.
தற்போதைய பணவீக்கம் RBI நிர்ணயித்துள்ள 2 முதல் 6 சதவீத இலக்கு வரம்புக்குள் இருந்தாலும், கச்சா எண்ணெய் விலை தொடர்ந்து உயர்ந்தால் நிலைமை மாறக்கூடும் என்ற கவலை உள்ளது. பெட்ரோல், டீசல் விலைகள் உயரும்போது, போக்குவரத்து செலவு உள்ளிட்ட பல்வேறு துறைகளின் செலவுகளும் அதிகரித்து, பிற பொருட்களின் விலைகளிலும் தாக்கத்தை ஏற்படுத்தலாம்.
SBI பொருளாதார நிபுணர்களின் மதிப்பீட்டின்படி, CPI பணவீக்கம் 6.5 சதவீதத்தைக் கூட தாண்டும் வாய்ப்பு உள்ளது. இருப்பினும், 2027 தொடக்கத்தில் அது மீண்டும் 6 சதவீதத்துக்கும் கீழ் குறையக்கூடும் என எதிர்பார்க்கப்படுகிறது. அதே நேரத்தில், கச்சா எண்ணெய் விலை அடுத்த சில காலத்திற்கு ஒரு பேரலுக்கு 100 டாலருக்கு மேல் நீடிக்கலாம் என்றும் அவர்கள் கணித்துள்ளனர்.
Also Read: தண்ணீர் குடித்தும் தாகம் தீரவில்லையா? உடலில் நடக்கும் இந்த மாற்றத்தை அலட்சியப்படுத்தாதீங்க!
