சிறப்பு தீவிர திருத்த முறைமை (Special Intensive Revision – SIR) தொடர்பான முடிவுகளில் தேர்தல் ஆணையத்திற்குள் உட்கட்சிப் பூசல் மற்றும் கருத்து வேறுபாடுகள் இருப்பதாக வெளியான ஊடக செய்திகளை இந்திய தேர்தல் ஆணையத்தின் வட்டாரங்கள் மறுத்துள்ளன. தேர்தல் ஆணையத்தின் அனைத்து முடிவுகளும் மூன்று ஆணையர்களின் ஒப்புதலுடன் ஒருமனதாகவே எடுக்கப்பட்டதாகத் தெரிவிக்கப்பட்டுள்ளது.
“தலைமை தேர்தல் ஆணையர் மற்றும் இரு தேர்தல் ஆணையர்களின் ஒப்புதலுடன் தான் SIR உள்ளிட்ட இந்திய தேர்தல் ஆணையத்தின் அனைத்து முடிவுகளும் ஒருமனதாக எடுக்கப்பட்டுள்ளன. எந்தவொரு விவகாரத்திலும் தேர்தல் ஆணையர்களுக்கு தனிப்பட்ட கருத்துக்கள் இருக்கக்கூடும் என்ற போதிலும், இறுதி முடிவுகள் அனைத்தும் ஒருமனதாகவே எட்டப்படுகின்றன” என்று தேர்தல் ஆணைய வட்டாரங்கள் தெரிவித்துள்ளன.
முன்னதாக, ‘தி இந்தியன் எக்ஸ்பிரஸ்’ நாளிதழ் வெளியிட்ட புலனாய்வு செய்தியில், SIR செயல்முறைகள் தொடர்பாக எடுக்கப்பட்ட முடிவுகளுக்கு 3 உறுப்பினர்களைக் கொண்ட தேர்தல் ஆணையத்தில் உள்ள இரண்டு தேர்தல் ஆணையர்கள் எதிர்ப்பு தெரிவித்ததாகக் குறிப்பிடப்பட்டிருந்தது.
நவம்பர் 2025 முதல் ஆகஸ்ட் 2026 வரையிலான 10 மாத காலத்தில், தங்களுக்குத் தெரியாமல் எடுக்கப்பட்ட முடிவுகள் மற்றும் பிறப்பிக்கப்பட்ட உத்தரவுகளுக்கு தேர்தல் ஆணையர்களான சுக்பீர் சிங் சந்து மற்றும் விவேக் ஜோஷி ஆகியோர் குறைந்தது 14 முறை எழுத்துப்பூர்வமாக எதிர்ப்பு பதிவு செய்துள்ளதாக அந்த அறிக்கையில் தெரிவிக்கப்பட்டது.
SIR நடைமுறை, படிவம் 6-ல் (Form 6) செய்யப்பட்ட மாற்றங்கள், வாக்காளர் பட்டியலில் பெயர்களைச் சேர்ப்பது மற்றும் நீக்குவது, வாக்காளர் பட்டியல் முடிவுகள் தொடர்பான மேல்முறையீடுகள் மற்றும் வாக்காளர் தரவுத்தள அணுகல் (data access) போன்ற முக்கிய அம்சங்களில் இந்த எதிர்ப்புகள் தெரிவிக்கப்பட்டதாக அந்த நாளிதழ் செய்தி வெளியிட்டிருந்தது. மேலும் இந்த புகார்கள் தலைமை தேர்தல் ஆணையர் ஞானேஷ் குமாருக்கும் அனுப்பப்பட்டதாகக் கூறப்பட்டது.
இந்த ஊடக அறிக்கை வெளியானதைத் தொடர்ந்து, நாட்டில் கடும் அரசியல் புயல் வீசத் தொடங்கியுள்ளது. எதிர்க்கட்சிகள் தேர்தல் ஆணையத்தின் செயல்பாடுகளைக் கடுமையாகக் விமர்சித்து, தலைமை தேர்தல் ஆணையர் ஞானேஷ் குமார் பொறுப்பேற்க வேண்டும் என வலியுறுத்தி வருகின்றன.
பிரதமர் நரேந்திர மோடியின் கட்டளைப்படி தலைமை தேர்தல் ஆணையர் ஞானேஷ் குமார் தன்னிச்சையாக செயல்படுகிறார் என்று குற்றம் சாட்டியுள்ளது. “மூன்று உறுப்பினர்களைக் கொண்ட ஆணையத்தில் ஞானேஷ் குமாரின் ஆதிக்கம் மட்டுமே நடப்பது இந்த புகார்கள் மூலம் தெளிவாகிறது. மோடியும் ஞானேஷ் குமாரும் இணைந்து நாட்டின் ஜனநாயகத்திற்குப் பெருங்கேடு விளைவித்துள்ளனர். இதற்கான தண்டனையை அவர்கள் நிச்சயம் அனுபவிப்பார்கள்” என்று காங்கிரஸ் விமர்சித்துள்ளது.
சமாஜ்வாதி கட்சி (அகிலேஷ் யாதவ்): இந்த அறிக்கை மிகவும் ஆபத்தானது என்று கூறிய சமாஜ்வாதி கட்சித் தலைவர் அகிலேஷ் யாதவ், “அரசியலமைப்புச் சட்ட அமைப்பின் உறுப்பினர்கள் சுதந்திரமாகச் செயல்பட முடியாவிட்டால், அது ஜனநாயகத்திற்குப் பேரபாயமாகும்” எனக் குறிப்பிட்டதுடன், இந்த விவகாரத்தில் உச்ச நீதிமன்றம் தாமாக முன்வந்து (Suo Motu) விசாரணை நடத்த வேண்டும் என வலியுறுத்தியுள்ளார்.
திரிணமூல் காங்கிரஸ் (அபிஷேக் பானர்ஜி): தலைமை தேர்தல் ஆணையரை உடனடியாகப் பதவிநீக்கம் செய்ய வேண்டும் என்றும், நீதிமன்றத்தின் மேற்பார்வையில் விசாரணை நடத்தப்பட வேண்டும் என்றும் திரிணமூல் காங்கிரஸ் எம்பி அபிஷேக் பானர்ஜி கோரிக்கை விடுத்துள்ளார்.
திமுக (டி.கே.எஸ். இளங்கோவன்): “பாஜக அரசு SIR நடைமுறையைக் கொண்டு விளையாடுகிறது. சிறுபான்மையினரின் வாக்களிக்கும் உரிமையைப் பறிப்பதே அவர்களின் நோக்கம்” என்று திமுக செய்தித் தொடர்பாளர் டி.கே.எஸ். இளங்கோவன் குற்றம் சாட்டினார்.
ஆம் ஆத்மி (சௌரப் பரத்வாஜ்): “அனைத்து எதிர்க்கட்சிகளும் இணைந்து முதலில் இந்த தலைமை தேர்தல் ஆணையரை சரிசெய்ய வேண்டும்” என்று வலியுறுத்தினார்.
சிவசேனா UBT (சஞ்சய் ராவத்): “தலைமை தேர்தல் ஆணையர் ஞானேஷ் குமார் விரைவில் சிறை செல்ல வேண்டி வரும்” எனக் காட்டமாகப் பதிவிட்டுள்ளார்.
சிபிஐ(எம்) (ஜான் பிரிட்டாஸ்): “தேர்தல் ஆணையம் என்பது இப்போது தலைமை தேர்தல் ஆணையரின் ஒரு நபர் சர்வாதிகாரமாக மாறியுள்ளது” என்று விமர்சித்துள்ளார்.
