மதுராந்தகம் மற்றும் தாராபுரம் சட்டப்பேரவை தொகுதிகளில் வரும் அக்டோபர் 6-ஆம் தேதி இடைத்தேர்தல் வாக்குப்பதிவு நடைபெறவுள்ளதை முன்னிட்டு, அவ்விரு தொகுதிகளிலும் உள்ள வாக்குப்பதிவு மையப் பள்ளிகளுக்கு அக்டோபர் 5 மற்றும் 6 ஆகிய இரு தேதிகளிலும், தனியார் பள்ளிகளுக்கு வாக்குப்பதிவு அன்றும் பள்ளிக்கல்வித்துறை சார்பில் விடுமுறை அறிவிக்கப்பட்டுள்ளது.
கடந்த சட்டப்பேரவைப் பொதுத்தேர்தலில் அதிமுக சார்பில் போட்டியிட்டு வெற்றிபெற்ற மரகதம் குமரவேல் (மதுராந்தகம்) மற்றும் சத்தியபாமா (தாராபுரம்) ஆகிய இருவரும் தங்களது சட்டமன்ற உறுப்பினர் பதவிகளைத் துறந்து, ஆளுங்கட்சியான தமிழக வெற்றிக் கழகத்தில் (தவெக) இணைந்தனர். இதையடுத்து காலியானதாக அறிவிக்கப்பட்ட இவ்விரு தொகுதிகளுக்கும் இடைத்தேர்தலைத் தேர்தல் ஆணையம் அறிவித்தது. இதில் திமுக, அதிமுக, தவெக, நாம் தமிழர் கட்சி மற்றும் இடதுசாரிகள் என 5 முனைப் போட்டி நிலவுவதால், தொகுதி முழுவதும் அனல் பறக்கும் தேர்தல் பிரசாரம் இறுதி கட்டத்தை எட்டியுள்ளது.
வரும் அக்டோபர் 6-ஆம் தேதி காலை வாக்குப்பதிவு தொடங்கப்பட்டு, அக்டோபர் 9-ஆம் தேதி வாக்குகள் எண்ணப்பட்டு முடிவுகள் அறிவிக்கப்பட உள்ளன. வாக்குப்பதிவு முன்னேற்பாடுகள், மின்னணு வாக்குப்பதிவு இயந்திரங்கள் கொண்டு வருதல் மற்றும் தேர்தல் பணியாளர்களுக்குப் பயிற்சி அளித்தல் போன்ற பணிகள் நடைபெற வேண்டியுள்ளதால், மதுராந்தகம் மற்றும் தாராபுரம் தொகுதிகளில் வாக்குச்சாவடிகளாக செயல்படும் அரசு மற்றும் அரசு உதவிபெறும் பள்ளிகளுக்கு அக்டோபர் 5 மற்றும் 6 ஆகிய இரு நாட்கள் முழு விடுமுறை அளிக்கப்படுகிறது. அதேபோல், தேர்தல் நாளன்று பொதுமக்கள் மற்றும் ஆசிரியர்கள் வாக்களிக்க ஏதுவாக, இவ்விரு தொகுதிகளில் உள்ள அனைத்து தனியார் பள்ளிகளுக்கும் அக்டோபர் 6-ஆம் தேதி ஒரு நாள் விடுமுறை விடப்பட்டுள்ளது.
Read More : கட்டுப்பாட்டை இழந்த ஆம்னி பஸ்..!! தண்ணீர் லாரி மீது மோதியதில் சுக்குநூறாக நொறுங்கிய பயங்கரம்..!!
