திருப்பத்தூர் மாவட்டம் ஆம்பூர் அருகே செங்கிலிகுப்பம் பகுதியில் அதிர்ச்சிகரமான சம்பவம் ஒன்று நடந்துள்ளது. பழுதடைந்த வீட்டின் சுவர் இடிந்து விழுந்ததில், 10ம் வகுப்பு படித்து வந்த பள்ளி மாணவன் சம்பவ இடத்திலேயே உயிரிழந்தார். இந்த சம்பவம் பொதுமக்களிடையே பேரச்சத்தை ஏற்படுத்தியுள்ளது.
செங்கிலிகுப்பத்தைச் சேர்ந்த இளங்கோவன், சில ஆண்டுகளுக்கு முன் உடல்நலக் குறைவால் காலமானார். அவரது மனைவி சரிதா, 16 வயது மகன் வெற்றிமாறனை வளர்த்து வந்தார். ஆம்பூர் பகுதியிலுள்ள அரசு மேல்நிலைப்பள்ளியில் 10ம் வகுப்பு படித்து வந்த வெற்றிமாறன், நேற்று (ஜூன் 23) பள்ளியில் இருந்து வீட்டிற்கு வந்துள்ளார்.
அப்போது, உணவு சாப்பிடுவதற்காக வீட்டில் அமர்ந்திருந்தபோது, ஏற்கனவே விரிசல் ஏற்பட்ட பழைய சுவர் திடீரென இடிந்து விழுந்தது. அதில் சிக்கிய சிறுவன் தலைநசுங்கி, சம்பவ இடத்திலேயே உயிரிழந்தார். வீட்டின் சத்தம் கேட்டவுடன் ஓடிய வந்து பார்த்த சரிதா மற்றும் உறவினர்கள், நடந்ததை உணர்ந்ததும் கதறி அழுதனர்.
சம்பவம் குறித்து தகவல் அறிந்த ஆம்பூர் போலீசார், உடனடியாக சம்பவ இடத்திற்கு விரைந்து சென்று வெற்றிமாறனின் உடலை மீட்டு, பிரேத பரிசோதனைக்காக ஆம்பூர் அரசு மருத்துவமனைக்கு அனுப்பி வைத்தனர். மேலும் இது தொடர்பாக வழக்குப் பதிவு செய்து தீவிர விசாரணை நடத்தி வருகின்றனர்.
ஏற்கனவே கணவனை இழந்த சரிதா, தற்போது தனது ஒரே மகனையும் இழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது. சம்பவம் குறித்து அப்பகுதி மக்கள் கூறுகையில், “பழுதடைந்த வீட்டில் வசித்து வந்தவர்களுக்கு அரசு வீடமைப்புத் திட்டத்தின் கீழ் உடனடி உதவி வழங்க வேண்டும். மேலும், இப்படியான குடும்பங்களுக்கு விரைவில் நிவாரண நிதி மற்றும் மனநல ஆலோசனை வழங்கப்பட வேண்டும்” எனக் கோரிக்கை வைத்துள்ளனர்.
Read more: நவக்கிரக பிரதிஷ்டை: சபரிமலையில் ஜூலை 11 ஆம் தேதி நடை திறப்பு..!! – ஆன்லைன் முன்பதிவு தொடக்கம்
