தமிழக அரசு ஊழியர்கள் மற்றும் ஓய்வூதியதாரர்களின் நீண்டநாள் எதிர்பார்ப்பை நிறைவு செய்யும் வகையில், 2026-ஆம் ஆண்டு பிறப்பிலேயே ஒரு இனிப்பான செய்தி வெளியாகியுள்ளது. அகில இந்திய நுகர்வோர் விலை குறியீட்டின் (AICPI) சமீபத்திய புள்ளிவிவரங்களின்படி, அரசுப் பணியாளர்களுக்கான அகவிலைப்படி (DA) 5 சதவீதம் வரை உயரக்கூடும் எனத் தெரியவந்துள்ளது.
தற்போது நிலவி வரும் விலைவாசி உயர்வு மற்றும் பணவீக்கத்தை கருத்தில் கொண்டு, அரசு ஊழியர்களுக்கு வழங்கப்பட்டு வரும் 58 சதவீத அகவிலைப்படியை 63 சதவீதமாக உயர்த்த மத்திய அரசு திட்டமிட்டுள்ளது. இதற்கான அதிகாரப்பூர்வ அறிவிப்பு மத்திய அரசால் வரும் மார்ச் மாதம் வெளியிடப்பட வாய்ப்புள்ளது. வழக்கம்போல, மத்திய அரசின் அறிவிப்பைத் தொடர்ந்து தமிழக அரசும் தனது ஊழியர்களுக்கான அகவிலைப்படி உயர்வை உடனடியாக அறிவிக்கும் என எதிர்பார்க்கப்படுகிறது. குறிப்பாக, தமிழகத்தின் இடைக்கால பட்ஜெட்டில் இதற்கான முறையான அறிவிப்பை முதல்வர் மு.க.ஸ்டாலின் வெளியிடுவார் என்று அரசு ஊழியர்களும், ஆசிரியர்களும் மிகுந்த ஆவலுடன் காத்திருக்கின்றனர்.
இந்த 5 சதவீத உயர்வு என்பது ஊழியர்களின் அடிப்படை சம்பளத்தைப் பொறுத்து மாறுபடும். உதாரணமாக, ஒரு ஊழியரின் அடிப்படைச் சம்பளம் 40,000 ரூபாய் எனில், 58 சதவீத அகவிலைப்படியின் கீழ் அவர் 23,200 ரூபாயைப் பெற்று வருகிறார். இது 63 சதவீதமாக உயரும்போது, அவருக்குக் கிடைக்கும் அகவிலைப்படி 25,200 ரூபாயாக அதிகரிக்கும். இதன் மூலம் மாதம் 2,000 ரூபாய் வரை கூடுதல் வருமானம் கிடைக்க வாய்ப்புள்ளது. அடிப்படைச் சம்பளம் அதிகமாக உள்ள உயர்மட்ட அதிகாரிகளுக்கு இந்த உயர்வு இன்னும் கணிசமாக இருக்கும்.
வீட்டு வாடகைப்படி மற்றும் நிலுவைத் தொகை :
7-வது ஊதியக் குழுவின் பரிந்துரைப்படி, அகவிலைப்படி 50 சதவீதத்தை கடந்துவிட்டாலே வீட்டு வாடகைப்படி (HRA) மற்றும் இதர படிகளும் தானாகவே உயர வேண்டும் என்ற விதி உள்ளது. இதனால் ஊழியர்களின் ஒட்டுமொத்தச் சம்பளம் (Gross Salary) கணிசமாக உயரக்கூடும். இந்த உயர்வு ஏப்ரல் மாதச் சம்பளத்துடன் சேர்த்து வழங்கப்படலாம் என்றும், ஜனவரி முதல் மார்ச் வரையிலான மூன்று மாத காலத்திற்கான நிலுவைத் தொகை (Arrears) ரொக்கமாகவோ அல்லது சேமிப்பு நிதியிலோ சேர்க்கப்பட வாய்ப்புள்ளது.
8-வது ஊதியக் குழுவின் நிலை என்ன..?
8-வது ஊதியக் குழுவை அமைப்பதற்கான முதற்கட்டப் பணிகள் தொடங்கினாலும், அது நடைமுறைக்கு வர இன்னும் சில காலம் எடுக்கும் எனத் தெரிகிறது. அதுவரை பணவீக்கத்தின் தாக்கத்தில் இருந்து ஊழியர்களைப் பாதுகாக்க இந்த அகவிலைப்படி உயர்வு ஒரு வலுவான அரணாக அமையும்.
