ஆந்திரப் பிரதேசத்தின் கர்னூல் மாவட்டத்தில் ஒரு பெண், தனது முன்னாள் காதலரின் மனைவியும் மருத்துவருமான ஒருவருக்கு HIV வைரஸை ஊசி மூலம் செலுத்திய சம்பவம் அதிர்ச்சியை ஏற்படுத்தி உள்ளது.. இந்த வழக்கில் அந்தப் பெண் உட்பட நான்கு பேர் கைது செய்யப்பட்டுள்ளதாக காவல்துறை தெரிவித்துள்ளது. தனது முன்னாள் காதலனை வேறொரு பெண்ணை திருமணம் செய்ததால் அவரை பழிவாங்க திட்டமிட்டுள்ளார்.. மேலும், அந்த தம்பதியை பிரிக்க வேண்டும் என்ற நோக்கத்தில் அந்த பெண் இந்த கொடூர செயலை செய்துள்ளார்..
முக்கிய குற்றவாளி கர்னூலைச் சேர்ந்த பி. போயா வசுந்தரா (34) என அடையாளம் காணப்பட்டுள்ளார். மற்ற குற்றவாளிகள் அடோனியில் உள்ள ஒரு தனியார் மருத்துவமனையில் செவிலியராகப் பணிபுரியும் கொங்கே ஜோதி (40) மற்றும் அவரது 20 வயது மதிக்கத்தக்க 2 பிள்ளைகள் ஆவர். இவர்கள் நால்வரும் ஜனவரி 24 அன்று கைது செய்யப்பட்டனர். பாதிக்கப்பட்ட பெண் கர்னூலில் உள்ள ஒரு தனியார் மருத்துவக் கல்லூரியில் உதவிப் பேராசிரியராகப் பணிபுரிகிறார் என்றும் மேலும் அவர் வசுந்தராவின் முன்னாள் காதலரின் மனைவி எனவும் காவல்துறையினர் தெரிவித்துள்ளனர்..
காவல்துறை அதிகாரி ஒருவர் இதுகுறித்து பேசிய போது “தனது முன்னாள் காதலன் மற்றொரு பெண்ணை திருமணம் செய்துகொண்டதை ஏற்றுக்கொள்ள முடியாததால், குற்றவாளி அந்தத் தம்பதியைப் பிரிக்க சதி செய்தார்,” என்று கூறினார்.
குற்றவாளி மற்ற 3 பேருடன் சேர்ந்து, ஒரு சாலை விபத்தை அரங்கேற்றி இந்தத் தாக்குதலைத் திட்டமிட்டதாக காவல்துறை தெரிவித்துள்ளது.
“ஜனவரி 9 அன்று, மதியம் 2.30 மணியளவில், பாதிக்கப்பட்ட பெண் தனது பணியை முடித்துவிட்டு மதிய உணவிற்காக தனது ஸ்கூட்டரில் வீடு திரும்பிக்கொண்டிருந்தபோது, விநாயக் காட் அருகே கே.சி. கால்வாய் அருகில் மோட்டார் சைக்கிளில் வந்த இரண்டு பேர் வேண்டுமென்றே அவர் மீது மோதினர். இதனால் அவர் கீழே விழுந்து காயமடைந்தார்.
பின்னர் குற்றவாளிகள் அவருக்கு உதவுவது போல் நடித்து அவரை அணுகினர். அவரை ஒரு ஆட்டோவில் ஏற்ற முயன்றபோது, வசுந்தரா HIV ஊசியை செலுத்தி உள்ளார்.. எனினும், பாதிக்கப்பட்டவர் கூச்சலிட்டதும் வசுந்தரா அங்கிருந்து தப்பி ஓடிவிட்டார்,” என்று காவல்துறை தெரிவித்துள்ளது.
ஒரு ஆய்விற்காக மாதிரிகள் தேவைப்படுவதாக கூறி, ஒரு அரசு மருத்துவமனையில் சிகிச்சை பெற்று வந்த நோயாளிகளிடமிருந்து HIV பாதிக்கப்பட்ட ரத்த மாதிரிகளை இந்தக் குழு பெற்றதாக காவல்துறையினர் தெரிவித்தனர்.
குற்றவாளி HIV பாதிக்கப்பட்ட ரத்தத்தை ஒரு குளிர்சாதனப் பெட்டியில் சேமித்து வைத்திருந்ததாக கூறியுள்ளார்.. இருப்பினும், தொற்று ஏற்படுவதற்கான சாத்தியக்கூறுகளை காவல்துறை குறைத்து மதிப்பிட்டது. “குளிர்சாதனப் பெட்டியில் சேமித்து வைத்திருந்தாலும் கூட, அந்த வைரஸ் பல நாட்களுக்கு உயிருடன் இருக்க முடியாது என்றும், ஒரு வெளிப்பொருள் உடலில் நுழைவது மட்டுமே கவலைக்குரிய விஷயம் என்றும் காவல்துறை கூறியது,” என்று அந்த அதிகாரி தெரிவித்தார்.
பாதிக்கப்பட்டவருக்கு உடனடியாக மருத்துவ சிகிச்சை அளிக்கப்பட்டது, தற்போது அவர் நலமுடன் இருக்கிறார். “பாதிக்கப்பட்டவர் ஒரு மருத்துவர் என்பதால், அவருக்குப் பரிசோதனைகள் மற்றும் மருந்துகளைப் பற்றித் தெரியும் என்றும், பிற மருத்துவர்கள் மூன்று வாரங்களுக்குப் பிறகு மீண்டும் வருமாறு அவருக்கு அறிவுறுத்தியுள்ளனர் என்றும் காவல்துறை தெரிவித்தார்.. பாதிக்கப்பட்ட பெண்ணின் கணவரும், ஒரு மருத்துவர் தான்.. அவர் ஜனவரி 10 அன்று கர்னூல் மூன்றாம் நகர காவல் நிலையத்தில் புகார் அளித்தார். இதையடுத்து வசுந்தரா மீது வழக்கு பதிவு செய்யப்பட்டது. அவரிடம் தொடர்ந்து விசாரணை நடைபெற்று வருகிறது..
இந்தத் தாக்குதலைத் திட்டமிட்டதில் சம்பந்தப்பட்ட மீதமுள்ள சதிகாரர்களை அடையாளம் கண்டு கைது செய்ய மேலதிக விசாரணை நடைபெற்று வருவதாக காவல்துறை தெரிவித்துள்ளது.
Read More : 11 பேர் பலி, 12 பேர் காயம்..! கால்பந்து மைதானத்தில் துப்பாக்கிச்சூடு..! மெக்சிகோவில் சோகம்..!
