கோவை மாவட்டத்தில் நடிகர் விஜய்யின் தமிழக வெற்றிக் கழகத்திற்கு ஆரம்பகட்டத்திலேயே ஒரு சறுக்கல் ஏற்பட்டுள்ளது. அக்கட்சியைச் சேர்ந்த 20-க்கும் மேற்பட்ட இளைஞர்கள் திடீரென கட்சியிலிருந்து விலகி, அதிமுகவில் தங்களை இணைத்துக் கொண்டது அரசியல் வட்டாரத்தில் பேசுபொருளாகியுள்ளது.
கோவை சுகுணாபுரத்தில் உள்ள அதிமுக தலைமை நிலைய செயலாளரும், முன்னாள் அமைச்சருமான எஸ்.பி. வேலுமணியின் அலுவலகத்தில் இந்த இணைப்பு விழா நடைபெற்றது. தொண்டாமுத்தூர் தொகுதிக்கு உட்பட்ட சுண்டக்காமுத்தூர் மற்றும் ராமசெட்டிபாளையம் பகுதிகளைச் சேர்ந்த தவெக இளைஞர்கள், எஸ்.பி. வேலுமணி முன்னிலையில் முறைப்படி அதிமுகவில் இணைந்தனர்.
அதிமுகவில் இணைந்த இளைஞர்கள் இதுகுறித்துத் தெரிவிக்கையில், எடப்பாடி பழனிசாமியின் ஆளுமையான தலைமை மற்றும் அதிமுக ஆட்சிக் காலத்தில் கொண்டுவரப்பட்ட மக்கள் நலத்திட்டங்கள் தங்களை வெகுவாகக் கவர்ந்ததாகக் கூறினர். குறிப்பாக, மற்ற கட்சிகளைக் காட்டிலும் அதிமுகவில் இளைஞர்களுக்கு உரிய அங்கீகாரமும், முக்கியத்துவமும் அளிக்கப்படுவதே தங்களது இந்த முடிவுக்குக் காரணம் என்றும் அவர்கள் நெகிழ்ச்சியுடன் குறிப்பிட்டனர்.
தற்போது 20 பேர் மட்டுமே அதிமுகவில் இணைந்துள்ள நிலையில், இது ஒரு தொடக்கம்தான் என சொல்லப்படுகிறது. தவெக-விலிருந்து மேலும் 100-க்கும் மேற்பட்ட இளைஞர்கள் அதிமுகவுக்கு மாறத் தயாராகி வருவதாகவும், அதற்கான முதற்கட்டப் பேச்சுவார்த்தைகள் முடிந்துவிட்டதாகவும் அதிமுக தரப்பு தகவல்கள் தெரிவிக்கின்றன. ஒருபுறம் தவெக தனது கட்டமைப்பை வலுப்படுத்தி வரும் சூழலில், கோவையின் கோட்டையாக கருதப்படும் அதிமுகவில் இளைஞர்கள் தஞ்சம் புகுவது அக்கட்சிக்கு ஒரு பின்னடைவாகவே பார்க்கப்படுகிறது. அதே சமயம், கோவை மாவட்டத்தில் இளைஞர்களிடையே தங்களுக்கு இருக்கும் செல்வாக்கு குறையவில்லை என்பதை இந்த நிகழ்வு நிரூபித்துள்ளதாக அதிமுகவினர் உற்சாகத்தில் உள்ளனர்.
Read More : கோடையிலும் வாடாத மாடித் தோட்டம்..!! மண்ணின் ஈரப்பதத்தை தக்கவைக்க சூப்பர் டிப்ஸ்..!!
