தைலாபுரம் இல்லத்தில் நடைபெற்ற பாமக அவசர செயற்குழு கூட்டம், தமிழக அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது. இந்தக் கூட்டத்திற்குப் பிறகு செய்தியாளர்களை சந்தித்த பாமக நிறுவனர் மருத்துவர் ராமதாஸ், தனது மகன் அன்புமணி ராமதாஸ் குறித்து வெளியிட்ட அதிரடி அறிவிப்பு பலரையும் திகைக்க வைத்துள்ளது. டெல்லி உயர்நீதிமன்ற தீர்ப்பை சுட்டிக்காட்டிய அவர், அன்புமணி ராமதாஸ் இனி பாமக-வின் தலைவராக நீடிக்க தகுதியில்லை என்றும், கட்சியின் பெயர், கொடி மற்றும் சின்னம் ஆகியவற்றை அவர் பயன்படுத்தக் கூடாது என்றும் திட்டவட்டமாக தெரிவித்தார்.
கட்சியின் அடிப்படை உறுப்பினர் பொறுப்பில் இருந்தே அன்புமணி நீக்கப்பட்டிருப்பதை நினைவுபடுத்திய மருத்துவர் ராமதாஸ், இந்தச் சூழலிலும் அவர் தன்னை தலைவர் என அழைத்துக்கொள்வது நீதிமன்றத்தை அவமதிக்கும் செயலாகும் என கடும் கண்டனம் தெரிவித்தார். மேலும், ஊடகங்கள் இனி அவரைப் பாமக தலைவர் என சித்தரிக்க வேண்டாம் என்றும் அவர் கேட்டுக்கொண்டார்.
சட்டமன்றத் தேர்தலுக்கான கூட்டணி நிலைப்பாடு குறித்துப் பேசிய ராமதாஸ், பாமக அமைக்கவுள்ள கூட்டணி மக்கள் போற்றும் ஒரு நேர்மையான வெற்றிக் கூட்டணியாக அமையும் என நம்பிக்கை தெரிவித்தார். சேலம் பொதுக்குழுவில் தனக்கு வழங்கப்பட்ட அதிகாரத்தின்படி, கூட்டணி குறித்த இறுதி முடிவை மிக விரைவில் அறிவிக்க இருப்பதாகவும் அவர் கூறினார். குறிப்பாக, இந்த தேர்தலில் போட்டியிட இதுவரை 4,109 விருப்ப மனுக்கள் குவிந்திருப்பது, கட்சியின் வரலாற்றில் ஒரு புதிய மைல்கல் என்றும், இது கட்சியின் பலத்தையே காட்டுவதாகவும் அவர் மகிழ்ச்சியுடன் குறிப்பிட்டார்.
Read More : ஆற்றில் தென்பட்ட மர்ம உருவம்..!! 7 தலைகள் கொண்ட ராட்சத பாம்பு..!! தீயாய் பரவிய வீடியோ..!! உண்மை என்ன..?
