40 வயதிற்குப் பிறகு, உடலில் பல மாற்றங்கள் ஏற்படுகின்றன. வளர்சிதை மாற்றம் குறைதல், எலும்பு அடர்த்தி குறைதல், ஹார்மோன் சமநிலையின்மை போன்ற பிரச்சனைகள் தொடங்குகின்றன. இந்த வயதில் நாம் உண்ணும் உணவுதான் நமது ஆரோக்கியத்தை தீர்மானிக்கிறது. 40 வயதிற்கு மேற்பட்டவர்கள் தங்கள் உணவில் சேர்த்துக்கொள்ள வேண்டிய முக்கியமான உணவுகள் குறித்து பார்க்கலாம்..
நார்ச்சத்து நிறைந்த உணவு: வயது ஆக ஆக செரிமான மண்டலத்தின் செயல்பாடு குறைகிறது. இதனால் மலச்சிக்கல் மற்றும் வாயுத் தொல்லைகள் ஏற்படலாம். ஓட்ஸ், பார்லி, முழு தானியங்கள் மற்றும் பச்சை காய்கறிகளை உட்கொள்வது உடலுக்குத் தேவையான அளவு நார்ச்சத்தை வழங்குகிறது. இது இரத்த சர்க்கரை அளவைக் கட்டுப்பாட்டில் வைத்திருக்க உதவுகிறது.
கால்சியம் மற்றும் வைட்டமின் டி: 40 வயதிற்குப் பிறகு, எலும்புகள் பலவீனமடையும் அபாயம் உள்ளது. குறிப்பாக பெண்களுக்கு ஆஸ்டியோபோரோசிஸ் எனப்படும் எலும்புப்புரை நோய் பொதுவாகக் காணப்படுகிறது. பால், தயிர், பனீர், கேழ்வரகு போன்ற கால்சியம் நிறைந்த உணவுகளை உட்கொள்ள வேண்டும். எலும்புகள் கால்சியத்தை உறிஞ்ச வைட்டமின் டி தேவைப்படுகிறது, எனவே தினமும் சிறிது நேரம் சூரிய ஒளியில் இருப்பது நல்லது.
புரதங்கள் அவசியம்: வயது ஆக ஆக தசை வலிமை குறைகிறது (சார்கோபீனியா). இதைத் தடுக்க, பருப்பு வகைகள், சோயா, முட்டை, கோழி போன்ற புரதச்சத்து நிறைந்த உணவுகளை உண்ண வேண்டும். இது தசைகளை வலுப்படுத்துவது மட்டுமல்லாமல், உடலுக்கு ஆற்றலையும் அளிக்கிறது.
ஒமேகா-3 கொழுப்பு அமிலங்கள்: இந்த வயதில் இதய ஆரோக்கியத்தில் மிகவும் கவனமாக இருக்க வேண்டும். அக்ரூட் பருப்புகள், பாதாம், ஆளி விதைகள் மற்றும் மீன் போன்றவற்றை உண்பது உடலுக்கு ஒமேகா-3 கொழுப்பு அமிலங்களை வழங்குகிறது. இது கெட்ட கொழுப்பைக் குறைத்து, மாரடைப்பு அபாயத்தைத் தடுக்கிறது. இது மூளையை சுறுசுறுப்பாக வைத்திருக்கவும் உதவுகிறது.
ஆன்டிஆக்ஸிடன்ட்கள்: உடலில் உள்ள செல்கள் சிதைவடைவதைத் தடுக்க, பெர்ரி பழங்கள், நெல்லிக்காய், கிரீன் டீ மற்றும் வண்ணமயமான காய்கறிகளை உட்கொள்ள வேண்டும். இவை நோய் எதிர்ப்பு சக்தியை அதிகரித்து, புற்றுநோய் போன்ற நோய்களிலிருந்து பாதுகாக்கின்றன. இவை சருமத்தில் சுருக்கங்கள் ஏற்படுவதைத் தடுத்து, இளமையாகக் காட்டுகின்றன.
உப்பு மற்றும் சர்க்கரை உட்கொள்வதைக் குறைக்கவும். ஒரு நாளைக்கு குறைந்தது 3 முதல் 4 லிட்டர் தண்ணீர் குடிக்கவும். எண்ணெயில் பொரித்த உணவுகளைத் தவிர்க்கவும். சமச்சீர் உணவு மற்றும் வழக்கமான உடற்பயிற்சியின் மூலம், 40 வயதிற்குப் பிறகும் 20 வயது இளைஞரைப் போல சுறுசுறுப்பாக இருக்கலாம்.
