இன்றைய நவீன சமையலறைகளில் தவிர்க்க முடியாத ஒரு பொருளாக அலுமினிய தாள் (Aluminium Foil) மாறிவிட்டது. உணவைச் சூடாக வைத்திருக்கவும், காய்கறிகளைப் பசுமையாகச் சேமிக்கவும் நாம் பயன்படுத்தும் இந்த மெல்லிய பளபளப்பான காகிதம், உண்மையில் ஒரு நிதானமான நஞ்சு என்பது பலருக்கும் தெரிவதில்லை. மிக எளிதாகவும் மலிவாகவும் கிடைப்பதால் நாம் பயன்படுத்தும் இந்த தாள், நமது ஆரோக்கியத்திற்கு எத்தகைய அச்சுறுத்தல்களை ஏற்படுத்துகிறது என்பது குறித்து சமீபத்திய மருத்துவ ஆய்வுகள் அதிர்ச்சியூட்டும் தகவல்களை வெளியிட்டுள்ளன.
சமீபத்தில் 2024 டிசம்பரில் ‘உணவு உயிரியல் அறிவியல்’ (Food Biological Sciences) இதழில் வெளியான ஆய்வின்படி, அதிக வெப்பநிலையில் சமைக்கப்பட்ட மீன் அல்லது இறைச்சிகளை அலுமினியத் தாளில் சுற்றி வைக்கும்போது, அந்த உலோகத்தின் துகள்கள் மிக எளிதாக உணவில் கசிகின்றன. குறிப்பாக சால்மன் மீன், கோழி இறைச்சி, தக்காளி மற்றும் பாலாடைக்கட்டி (Cheese) போன்ற உணவுகளைப் பயன்படுத்தி நடத்தப்பட்ட சோதனையில், அலுமினிய கசிவின் அளவு இயல்பை விட 40 மடங்கு அதிகமாக இருந்தது கண்டறியப்பட்டுள்ளது. நாம் ஆரோக்கியமானது என்று நினைத்து சாப்பிடும் உணவிலேயே கண்ணுக்கு தெரியாத உலோகத் துகள்கள் கலப்பது அபாயகரமானது.
மும்பை அப்பல்லோ ஸ்பெக்ட்ரா மருத்துவமனையின் நிபுணர் டாக்டர் சாயா வாஜா இதுகுறித்து கூறுகையில், தக்காளி, எலுமிச்சை, வினிகர் மற்றும் ஊறுகாய் போன்ற அமிலத்தன்மை (Acidic) கொண்ட உணவுகளுடன் அலுமினியம் மிக வேகமாக வினைபுரியும் என்று எச்சரிக்கிறார். இத்தகைய உணவுகளை அலுமினிய தாளில் சேமிக்கும்போது அல்லது அந்தப் பாத்திரங்களில் சமைக்கும்போது, உலோகம் உணவோடு கலந்து விடுகிறது. சூடான உணவை நேரடியாக அலுமினியத் தாளில் சுற்றுவதும், நீண்ட நேரம் அதிலேயே வைத்திருப்பதும் இந்த ஆபத்தை மேலும் அதிகரிக்கிறது.
தொடர்ச்சியாக இத்தகைய அலுமினியம் கலந்த உணவுகளை உட்கொள்வது நீண்ட காலத்தில் கடுமையான உடல்நலப் பாதிப்புகளுக்கு வழிவகுக்கும். குறிப்பாக எலும்பு தேய்மானம், சிறுநீரகச் செயல்பாடு குறைதல் மற்றும் நரம்பு மண்டலம் சார்ந்த கோளாறுகளை இது ஏற்படுத்தும். ஏற்கனவே சிறுநீரகப் பாதிப்பு உள்ளவர்களின் உடல், இரத்தத்தில் கலக்கும் அலுமினியத்தை வெளியேற்ற முடியாமல் திணறும் என்பதால் அவர்களுக்கு இது இரட்டிப்பு ஆபத்தாகும். எனவே, அலுமினியத் தாளுக்கு மாற்றாகத் துணிப் பைகள் அல்லது தரமான எஃகு (Stainless Steel) கலன்களுக்கு மாறுவதே ஆரோக்கியமான எதிர்காலத்திற்கு வழிவகுக்கும்.
