இந்தியாவின் வீதிகளில் ஒரு காலத்தில் கார் அல்லது பைக் வைத்திருப்பதே அந்தஸ்தின் அடையாளமாக பார்க்கப்பட்டது. ஆனால், இன்று நிலைமை தலைகீழாக மாறியுள்ளது. வாகனங்கள் இல்லாத வீடுகளே இல்லை என்னும் அளவுக்குப் போக்குவரத்துத் துறை அசுர வளர்ச்சி கண்டுள்ளது. புதிய வாகனங்களின் விலை உயர்வால், பலரும் தற்போது பழைய வாகனங்களை (Second hand vehicles) வாங்குவதில் அதிக ஆர்வம் காட்டி வருகின்றனர்.
இருப்பினும், வாகனத்தை வாங்கும்போதோ அல்லது விற்கும்போதோ அதன் உரிமையை (RC Transfer) முறையாக மாற்றுவது எவ்வளவு முக்கியம் என்பதைப் பலரும் உணர்வதில்லை. ஒருவேளை வாகனம் விபத்தில் சிக்கினால், ஆர்.சி புத்தகத்தில் பெயர் மாறாமல் இருந்தால் சட்ட ரீதியான சிக்கல்கள் அனைத்தும் பழைய உரிமையாளரையே சேரும் என்பதை நினைவில் கொள்ள வேண்டும்.
முன்பெல்லாம் ஆர்.சி. புத்தகத்தில் பெயர் மாற்றம் செய்ய பல நாட்கள் அலைந்து திரிய வேண்டியிருந்தது. ஆனால், 2026-ஆம் ஆண்டில் இந்தச் செயல்முறைகள் அனைத்தும் டிஜிட்டல் மயமாக்கப்பட்டு எளிமையாக்கப்பட்டுள்ளன. மத்திய சாலைப் போக்குவரத்து அமைச்சகத்தின் ‘வாகன்’ (Vahan) போர்டல் அல்லது ‘பரிவஹன்’ (parivahan.gov.in) இணையதளம் மூலம் வீட்டிலிருந்தே இந்தப் பணிகளை முடிக்கலாம். ஆன்லைனில் விண்ணப்பிக்கும்போது வாகனப் பதிவு எண் மற்றும் என்ஜின் எண்களைக் குறிப்பிட்டு, ஆதாருடன் இணைக்கப்பட்ட ஓடிபி (OTP) மூலம் விவரங்களைச் சரிபார்க்க வேண்டும். பின்னர் ‘Transfer of Ownership’ என்ற வசதியைத் தேர்ந்தெடுத்து, வாங்குபவரின் விவரங்களைப் பதிவிட்டுத் தேவையான கட்டணத்தைச் செலுத்தினால் போதுமானது.
நவீனத் தொழில்நுட்ப வசதிகளின்படி, நீங்கள் ஆன்லைனில் விண்ணப்பிக்கும்போதே உங்கள் வாகனத்திற்கான டோல் கட்டணப் பாக்கிகள் அல்லது அபராதங்கள் ஏதேனும் நிலுவையில் உள்ளதா என்பதைச் செயற்கை நுண்ணறிவு தொழில்நுட்பம் தானாகவே ஆய்வு செய்யும். பாஸ்டேக் (FASTag) நிலுவைத் தொகை இருந்தால், அதைச் செலுத்திய பிறகே உங்கள் விண்ணப்பம் அடுத்த நிலைக்குச் செல்லும். விண்ணப்பம் வெற்றிகரமாகச் சமர்ப்பிக்கப்பட்டதும், புதிய ஆர்.சி புத்தகம் தபால் மூலமாக உங்கள் வீட்டு முகவரிக்கே வந்து சேரும்.
வாகனத்தின் உரிமையாளர் இயற்கை எய்தியிருந்தால் ‘படிவம் 31’ மூலமும், ஏலத்தில் எடுக்கப்பட்ட வாகனங்களுக்கு ‘படிவம் 32’ மூலமும் விண்ணப்பிக்க வேண்டும். அதேபோல், ஒரே மாநிலத்திற்குள் வாகனம் கைமாறினால் 14 நாட்களுக்குள்ளும், வெளிமாநில வாகனம் என்றால் 45 நாட்களுக்குள்ளும் பெயர் மாற்றம் செய்வது கட்டாயமாகும். இந்தத் காலக்கெடுவைத் தவறினால் அபராதம் விதிக்கப்படும். வெளிமாநில வாகனங்களுக்குப் பழைய மாநில ஆர்.டி.ஓ-விடம் இருந்து தடையின்மைச் சான்றிதழ் (NOC) பெறுவது மிக முக்கியமான நடைமுறையாகும். முறையான பெயர் மாற்றம் மட்டுமே வாங்குபவர் மற்றும் விற்பவர் இருவருக்கும் எதிர்கால சட்டப் பாதுகாப்பை உறுதி செய்யும்.
Read More : இந்த 5 ரூபாய் நோட்டு இருந்தா நீங்க தான் கோடீஸ்வரர்..!! அரிய நோட்டுகளுக்கு சந்தையில் திடீர் கிராக்கி..!!
