உத்தரபிரதேசம் மாநிலம் கான்பூரில் மக்களை ஏற்றிச் சென்ற டிராக்டர் குளத்தில் கவிழ்ந்த விபத்தில் 32 பேர் பரிதாபமாக உயிரிழந்தனர்.
கான்பூரில் உள்ள ஃபதே பூரில் சந்திரிகா தேவி கோயிலுக்கு 50 பேர் கிராம மக்கள் டிராக்டரில் பயணித்தனர். கதம்பூர் பகுதியில் சென்று கொண்டிருந்தபோது திடீரென டிராக்டர் தடுமாறி குளத்தில் கவிழ்ந்தது. இதில் தலைகுப்புற விழுந்ததில் அனைவரும் நீரில் மூழ்கினர்.
தகவல் அறிந்து வந்த கிராம மக்கள் மீட்கும் பணியில் ஈடுபட்டனர். சம்பவ இடத்திலேயே 26 பேர் பலியான நிலையில் மேலும் 6 பேர் மருத்துவமனையில் உயிரிழந்தனர். இதில் பெரும்பாலானோர் குழந்தைகளும் பெண்களும் ஆவர்.
இறந்தவர்களுக்கு அம்மாநில முதல்வர் யோகி ஆதித்யநாத் இரங்கல் தெரிவித்துள்ளார். ’’கான்பூரில் நிகழ்ந்த டிராக்டர் விபத்தால் நான் துயரமுற்றேன். தஙக்ள் நெருங்கிய அன்பானவர்களை இழந்தஅனைவரும் உள்ளனர். காயமுற்றவர்களுக்கு பிரார்த்தனைகள் . ’’ என்றார்.
பிரதமர் மோடியும் இறந்தவர்களுக்கு இரங்கல் தெரிவித்துள்ளார். உயிரிழந்தவர்களின் குடும்பங்களுக்கு தலா 2 லட்ச ரூபாயும் , படுகாயம் அடைந்தவர்களுக்கு ரூ.50 ஆயிரம் நிவாரணமும் வழங்கப்படும் என பிரதமர் மோடி தெரிவித்துள்ளார்.
இதனிடையே இறந்த அனைவரையும் ஒரே இடத்தில் இறுதிச் சடங்கு செய்து அடக்கம் செய்ய முடிவு செய்யப்பட்டுள்ளது. கிராமமே அழுகுரலால் நிறைந்து உள்ளது. பார்ப்பவர்களின் கண்களை குளமாக்கும் வகையில் இந்த கோரச் சம்பவம் நிகழ்ந்துள்ளது. அடக்கம் செய்வதற்காக 40 கிலோ மீட்டர் தொலைவில் உள்ள சுடுகாட்டிற்கு 16 ஆம்புலன்சில் கொண்டு செல்லப்பட உள்ளது.
