அண்டை நாடுகளான பாகிஸ்தான் மற்றும் ஆப்கானிஸ்தான் இடையே கடந்த சில மாதங்களாக புகைந்து கொண்டிருந்த எல்லைப் பிரச்சனை, தற்போது ஒரு முழுமையான போராக வெடித்துள்ளது. வெள்ளிக்கிழமை அதிகாலை, பாகிஸ்தான் விமானப்படை ஆப்கானிஸ்தானின் தலைநகர் காபூல் உள்ளிட்ட முக்கிய நகரங்கள் மீது அதிரடியாக குண்டுமழை பொழிந்தது. இந்தத் தாக்குதலைத் தொடர்ந்து, இரு நாடுகளுக்கும் இடையே இப்போது நேரடிப் போர் தொடங்கிவிட்டதாகப் பாகிஸ்தான் பாதுகாப்புத் துறை அமைச்சர் அதிகாரப்பூர்வமாக அறிவித்துள்ளார். இது ஆசியப் பிராந்தியத்தில் பெரும் பதற்றத்தை உருவாக்கியுள்ளது.
வியாழக்கிழமை இரவு ஆப்கானிஸ்தான் எல்லைப் பகுதியில் தலிபான் படைகள் பாகிஸ்தான் வீரர்கள் மீது தாக்குதல் நடத்தியதே இந்த மோதல் உச்சமடையக் காரணமாக அமைந்தது. இதற்குப் பதிலடி கொடுக்கும் விதமாக, பாகிஸ்தான் போர் விமானங்கள் காபூல், கந்தஹார் மற்றும் பக்தியா மாகாணங்களில் உள்ள தலிபான் ராணுவ முகாம்களை குறிவைத்துச் சரமாரியாகக் குண்டுகளை வீசின.
காபூலில் சுமார் இரண்டு மணி நேரத்திற்கும் மேலாகப் போர் விமானங்களின் இரைச்சலும், அடுத்தடுத்து வெடிச்சத்தங்களும் கேட்ட வண்ணம் இருந்தன. தலிபான்களின் உயர்மட்டத் தலைவர் தங்கியிருக்கும் கந்தஹார் நகரிலும் போர் விமானங்கள் வட்டமிட்டதால் மக்கள் பெரும் அச்சத்திற்கு உள்ளாகினர்.
கடந்த அக்டோபர் மாதத்தில் எல்லையில் ஏற்பட்ட மோதலில் இருபுறமும் 70-க்கும் மேற்பட்டோர் உயிரிழந்தனர். அதன் பிறகு இரு நாடுகளுக்கும் இடையிலான எல்லைப் போக்குவரத்து முற்றிலும் முடக்கப்பட்டது. பாகிஸ்தானுக்குள் தாக்குதல் நடத்தும் ஆயுதமேந்திய குழுக்களுக்கு ஆப்கானிஸ்தான் புகலிடம் அளிப்பதாக பாகிஸ்தான் தொடர்ந்து குற்றம் சாட்டி வருகிறது. ஆனால், இந்த ஆதிக்க குற்றச்சாட்டுகளைத் தலிபான் அரசு திட்டவட்டமாக மறுத்து வருகிறது. கத்தார் மற்றும் துருக்கி போன்ற நாடுகள் மேற்கொண்ட சமாதான முயற்சிகள் தோல்வியடைந்த நிலையில், இப்போது நிலைமை கையை மீறிப் போயுள்ளது.
பாகிஸ்தானின் இந்த வான்வழி தாக்குதலில் தங்களது வீரர்கள் 8 பேர் கொல்லப்பட்டதாக தலிபான் அரசு தெரிவித்துள்ளது. மேலும், எல்லைப் பகுதியில் உள்ள அகதிகள் முகாம் ஒன்றில் விழுந்த எறிகணையில் சிக்கி ஒரு பெண் உட்பட 7 பேர் பலத்த காயமடைந்துள்ளனர். மறுபுறம், பாகிஸ்தான் வீரர்கள் சிலரை தாங்கள் உயிருடன் சிறைபிடித்திருப்பதாக தலிபான்கள் கூறி வருகின்றனர். ஆனால், பாகிஸ்தான் அரசு இதனை மறுத்துள்ளது. “எங்கள் பொறுமைக்கு ஒரு எல்லை உண்டு, இனி உங்களுடன் சமரசம் கிடையாது; இது நேரடிப் போர்” எனப் பாகிஸ்தான் பாதுகாப்புத் துறை அமைச்சர் கவாஜா ஆசிப் தனது சமூக வலைதளப் பக்கத்தில் பதிவிட்டுள்ளார்.
இரு நாடுகளும் பின்வாங்க தயாராக இல்லாத சூழலில், எல்லையில் தரைப்படை மற்றும் விமானப்படை வீரர்களின் எண்ணிக்கை அதிகரிக்கப்பட்டுள்ளது. இந்த மோதல் ஒரு நீண்டகாலப் போராக மாறினால், அது எல்லையில் உள்ள பொதுமக்களையும் அகதிகளையும் மிக கடுமையாகப் பாதிக்கும்.
Read More : காலையிலேயே ஷாக்..!! அதிமுகவுடன் கூட்டணி கிடையாது..!! வதந்திகளுக்கு முற்றுப்புள்ளி வைத்த விக்கிரமராஜா..!!
