இஸ்ரேலுக்கும் ஹமாஸ் அமைப்பினருக்கும் இடையே நடக்கும் யுத்தமானது தொடர்ந்து நீடித்து வருகிறது. ஆக்கிரமிப்பு தொடர்பாக நடந்துவரும் இந்த போரில் ஆயிரக்கணக்கான அப்பாவி மக்கள், பலியாகி வரும் தகவல்கள் அதிர்ச்சியை ஏற்படுத்தி வருகிறது. அக்டோபர் 7ஆம் தேதி தொடங்கிய இந்த போரில் பாலஸ்தீனியர்கள் சுமார் 3000 பேரும், இஸ்ரேலியர்கள் சுமார் 1400 பேரும் பலியாகியுள்ளதாக தகவல் வெளியாகியுள்ளது.
குறிப்பாக இஸ்ரேலின் கோர தாக்குதலால், காசாவில் வாழும் குழந்தைகள், கர்ப்பிணி பெண்கள், முதியோர்கள் என்று ஏராளமானோர் பாதிக்கப்பட்டுள்ளனர். இதற்கிடையே, ஐநா சபை வெளியிட்டுள்ள தகவல்களின் படி, காசாவில் சுமார் 50,000 கர்ப்பிணிகள் மருத்துவ உதவிகள் கிடைக்காமல் அவதிப்படுவதாக தகவல் வெளியாகியுள்ளது. அதிலும் அடுத்த ஒரு மாதத்தில் 5,500 பேருக்கு பிரசவம் நடக்கும் நிலையில், இருப்பதாக தெரிகிறது.
பாதுகாப்பான முறையில் குழந்தை பிறப்புக்கு கேள்விக்குறி எழுவதோடு, குழந்தை வளர்ப்பும் சிக்கலுக்கு உள்ளாகியுள்ளதாக ஐநா தெரிவித்துள்ளது. காசாவில் ஒட்டுமொத்தமாக 25% வீடுகள் சிதைக்கப்பட்டுள்ளன. 59 மருத்துவமனைகள், 170 கல்வி நிலையங்கள், குடிநீர் மற்றும் சுகாதார நிலையங்கள் மீது தாக்குதல்கள் நடத்தப்பட்டுள்ளன. இதைவிட கொடூரம் என்னவென்றால், ஒவ்வொரு 15 நிமிடத்திற்கு 1 குழந்தை பலியாகி வருவதாக தகவல்கள் வெளியாகியுள்ளன. கர்ப்பிணி பெண்கள் மற்றும் குழந்தைகளின் பாதுகாப்பு உறுதி செய்ய வேண்டும் என்பதே உலக மக்களின் ஒற்றை வேண்டுகோளாக உள்ளது.
