நாக்பூர் – மும்பை இடையே 90 கண்டெய்னர்களுடன் சென்ற சரக்கு ரயில் மாயமானது அதிர்ச்சியை ஏற்படுத்தியுள்ளது.
நாக்பூரில் உள்ள சர்வதேச சரக்குப் பெட்டக முனைய டெப்போவில் இருந்து மும்பை ஜவஹர்லால் நேரு துறைமுகத்துக்கு 90 கன்டெய்னர்களுடன் சரக்கு ரயில் பிப்ரவரி 1ஆம் தேதி அன்று சென்றது. இந்த ரயிலில் அரிசி, காகிதம், பிளாஸ்டிக் பொருட்கள், ரசாயனப் பொருள்கள் உள்ளிட்ட ஏற்றுமதிக்கான பொருட்கள் இருந்தன. இந்த ரயில் 4 முதல் 5 நாட்களுக்குள் மும்பை சென்று சேர்ந்திருக்க வேண்டும். ஆனால், 12 நாட்களுக்கு மேலாகியும் ரயில் அங்கு சென்றடையவில்லை. ரயில் சரக்கு போக்குவரத்து தகவல் அமைப்பு மூலம் சரக்கு ரயில் எந்த இடத்தில் உள்ளது என்பது குறித்து கண்டறிய முடியும். ஆனால், இந்த சரக்கு ரயில் எங்குள்ளது என்பதைக் காண முடியவில்லை. இந்நிலையில், கன்டெய்னர் கார்ப்பரேஷன் நிறுவன முதன்மை மேலாளர் சந்தோஷ் குமார் சிங், சரக்கு ரயில் காணாமல் போனதை உறுதிப்படுத்தியுள்ளார்.
மேலும் அவர் கூறுகையில், காணாமல்போன சரக்கு ரயிலைத் தேடி வருகிறோம். ரயில் எங்குள்ளது என்பதை சரியாக கண்டறிய முடியவில்லை. இதற்கு தொழில்நுட்பக் கோளாறு காரணமாக இருக்கலாம். ரயில்வே அதிகாரிகள் ரயிலைக் கண்டுபிடிக்கும் முயற்சியில் தீவிரமாக ஈடுபட்டுள்ளனர்” என்றார். இந்த சரக்கு ரயில் கடைசியாக நாசிக் – கல்யாண் இடையே, ஓம்பர்மாலி ரயில் நிலையத்தில் காணப்பட்டதாகக் கூறப்படுகிறது. அதன் பிறகுதான் ரயில் இருக்கும் இடம் தெரியவில்லை என ரயில்வே அதிகாரிகள் கூறுகின்றன. இதற்கிடையே ரயில் காணாமல்போனது குறித்து தகவலறிந்த ஏற்றுமதியாளர்கள் அதிர்ச்சி அடைந்துள்ளனர்.
